رواية انهيار قلب للكاتبة وردة الفصل الحادي عشر

ملك انهارت علي الارض وفضلت تعيط كتير مش عارفه تعمل ايه ولا هتتصرف ازاي هي عندها احساس قوي ان كلام شريف صح ..حست ان كلام باباها صح وان أمير راجع ينتقم منها ...( كلمت نفسها بغضب ) مش هسمحلك يا أمير تدمرني وانت اللي بدأت تلعب معايا والشاطر اللي يكسب في الاخر..

قامت غيرت هدومها وركبت عربيتها وطلعت علي شريف اللي اول ما شافها ابتسم ..

ملك بعصبية : بنتي فين ؟

شريف : مع الداده بتاعتها فوق !

ملك بصتلة بغضب وطلعت عند بنتها بسرعة تشوفها ..دخلت اوضتها لقتها في وسط لعب كتير ..جرت عليها حضنتها مليكة حببتي عمل فيكي ايه؟


مليكة : اهدي يا ماما انا كويسه وبفرحة شوفتي يا ماما بابا خدني جبلي لعب كتير ازاي بدأت تفرجها اللعب وهي مبسوطة وفرحانه ..


ملك بتنهيدة : يعني انتي مش زعلانه انك هنا ..

مليكة : تؤ انا بحب هنا ! و عايزاكي معايا كمان هنا..

ملك بإستغراب : طيب يا حببتي نامي وارتاحي....مليكة نامت وملك خرجت وسابتها لقت شريف في وشها ..


شريف وقف قدامها وبصلها من فوق لتحت وشدها عليه لحد ما قربها منه وبيهمس قدام شفايفها : انتي بتاعتي انا يا ملك محدش يقدر ياخدك مني انا بس اللي اقرر اذا كنتي هتكملي معايا ولا لاء مش حد تاني..


ملك شدت نفسها بعيد عنه : انت انسان مريض يا شريف عايز كل حاجة تكون ملكك وبس وبأي تمن بتحب تسيطر علي كل اللي حواليك حتي لو الحاجة دي مش بتاعتك... وجودي دلوقتي مش معني اني رجعتلك لا انسي ..انا وانت خلاص بح روح للي شبهك واللي شخصيتهم ضعيفة قدامك وبيخضعوا لسيطرتك ..بس أنا غير ...


لسه هتمشي مسكها من درعها : اوعي تفكري اني عايزك ترجعي ليا حبا فيكي لا الحكايه كلها زي ما انتي قولتي بحب كل حاجة تكون ملكي وحدش يفكر ياخد مني حاجة غصب اوي يتمرد عليا ..انتي زيك زي اي حاجة عجبنتي وحبيت تكون من ضمن ممتلكاتي ودلوقتي عايز حقي فيكي ...


ملك بصتلة بصدمه : نعم !! انت ملكش اي حقوق عندي انت فاهم ..

شريف : مهو مش بمزاجك قال كلامة وشالها ودخل بيها علي اوضتهم وهي بتضرب فيه وتشتمة انه يسبها بس هي دي متعته بيكون مبسوط معاها اكتر لما
هي ترفضة ، ومهما كانت تصرخ او تتوسلة مبيسمعش كلامها كان بيعاقبها وبينتقم منها علي كل جاحة عملتها معاه الفترة اللي فاتت....
الصبح حنين دخلت عند ناديه تطمن عليها ..
ناديه : شافت ملامح وشها عرفت انها عيطت كتير .. سألتها ..اتخانق معاكي ..؟

حنين : هزت دماغها بمعني لا ..

نادية : انتي ليه ساكتة علي الوضع ده هو جوزك وليكي حقوق عنده ؟
حنين بصتلة بصدمة : قصدك ايه يا ماما مش فاهمة وضع ايه اللي انا ساكتة عنه..

نادية : حنين انا عارفه طبيعة العلاقة بينكم وعارفه انه ملمسكيش ولا قربلك ولا بيقتي مراته دلوقتي فهمتي..


حنين بصت للارض بوجع : ايوا يعني المفروض اعمل ايه اروح اتخانق معاه واقوله ان ليا حقوق عندك وانت مقصر فيها ..عايزني اعمل كده !

نادية : مش لازم تقولي الحاجات دي مش بتيجي بالكلام محتاجة فعل ...شوفي هو بيحب ايه واعمليه حببيه فيكي خليه ميشوفش غيرك ..
غيري من نفسك انزلي روحي كوافير جددي كل حاجة فيكي خليه يشوف جمالك الحقيقي وانك احلي منها مليون مرة..
حنين : وانا عمري ما هغير من نفسي علشان حد لازم هو يحبني لشخصي انا ..افهميني يا ماما اللي بيحب بجد مبيشوفش عيوب في اللي قدامة حتي لو كان كله عيوب !
اللي بيحب بجد هيشوف اللي بيحبها دي ملكه جمال العالم حتي لو مكنتش بالجمال الكافي .!

ولو هيحبني علشان شكلي اتغير شوية يبقي صدقيني الحب ده مش هيطول هيجي عليه فترة وهيموت ....


ناديه : علي الاقل جربي والحب مع الوقت هيجي لو مجاش النهارده فيه بكرا أمير بيحب الاطفال جداا تخيلي كده لو قدرتي تجبيلة عيل ولا اتنين ساعتها هينسي كل حاجة وهتبقي انتي وولاده اهم حاجة في حياتة..

حنين هزت دماغها : ربنا يسهل ..محتاجة حاجة اعملها لحضرتك ..
ناديه : لا شكرا..
أمير بيكلم ملك ما بتردش عليه فنفخ بضيق ورمي الموبيل من ايده وقام وقف قدام الشباك الباب خبط ومصطفي دخل يهزر ..
أمير بجمود : الحكايه مش ناقصة رخامة خالص يا مصطفي ..
مصطفي رفع حاجبة : ليه مالك فيك ايه
امير وهو باصص علي موبيلة اللي اعلن عن وصول رسالة من رقم هو يعرفة كويس..مسك الموبيل بسرعة وقرا الرسالة كز علي انيابه وبلع ريقة بصعوبه
مصطفي : في ايه وليه وشك اتغير اول ما شوفت الرسالة دي ..

أمير بجمود : مفيش نازل وراجع تاني سلام

مصطفي : استني بس فهمني في ايه
أمير ماردش عليه ..كان ما سك موبيلة وبيتصل عليها وهي مابتردش نهائي عايز يفهم معني كلامها ده ايه وليه وصل عربيتة وهو بيخبط في كل حاجة حواليه واخيرا ردت عليه ببرود
ملك : نعم مش بعتلك الرسالة بتكلمني تاني ليه؟
أمير : نعم هو ايه اللي بتكلمني ليه ذ ..

وايه الرساله دي ممكن افهم ييعني ايه انساني وانك رجعتي لجوزك ...كنتي بتلعبي بيا تاني يا ملك..

ملك ببرود اكتر : بالظبط كدا
أمير بصدمة : يعني ايه
ملك : يعني اللي فهمتة
أمير بنفاذ صبر : حصل ايه ملك هو جوزك هددك بحاجة او مغصوبة مثلا انتي امبارح بس كنتي بتعيطي ومش عايزا ترجعيلة ايه اللي جد..
ملك : معلش بقي كنت مغفلة !
أمير بعصبية : اتكلمي كويس ايه اللي اتغير من امبارح للنهاردة علشان تبقي بالبرود ده !

ملك : انت عايز مني ايه وبأي حق بتعلي صوتك عليا كده روح لمراتك وعيش حياتك ..

أمير : مراتي !!
ملك : ايوا مراتك ايه كنت فاكرني مش هعرف وانك راجع بس علشان تنتقم مني طلعت احقر انسان شوفته في حياتي ..
كنت مستعدة اعوضك عن كل للحظه عذاب عشتها بسببي ..كنت هبدا معاك صفحة جديدة انا وانت بعض كنت راسمه حياه لينا فوق الخيال وكل للحظه غباء مني حصلت زمان كنت هتلاشها وتبقي العيشة بينا مبنيه علي الحب وبس.

أمير ابتسم بوجع : وبعد فترة تزهقي وتبعدي عني تاني ..صح !! للاسف يا ملك خلتيني فقدت فيكي الثقة وللابد

انا يمكن فعلا حابب اخليكي تدوقي نفس وجعي واللي عيشتة بسببك علشان بس تعرفي كمية الوجع اللي اتوجعتها منك ...ولو فاكرة انك لما ترجعي لجوزك بتعقبيني او بتوجعيني مثلا فاحب اقولك مبقاش يفرق معايا خلاص ..

ملك بضيق منه : بجد !! مبقاش يفرق معاك

وانت فعلا كنت راجع تنتقم مني وبس ماشي يا أمير انت اللي ابتديت متلومش غير نفسك....قالت كلامها قفلت وهي هتموت من الغيظ ..

أمير بعد ما فصلت غمض عنية ورجع بدماغه لورا حس بتعب الدنيا كلة في اللحظة دي اتجمع فيه دور عربية بسرعة وطلع بيها علي البيت دخل اوضته لقي حنين اللي حست بيه قربت منه فيك ايه مالك..


أمير بتعب : تعبان بس شويه وعايز انام ممكن.!

حنين : اه طبعا ..بس شكلك تعبان اوي ابلغ سامح..

أمير : لا هنام وهكون كويس ..قال كلامه وغمض عنية بتعب انفاسة مكنتش منتظمة وبيعرق بطريقه تخوف حنين فضلت مراقباه وخايفة عليه عايزا تصحية وفي نفس الوقت خايفة لحد ما لقتة مره واحد بيكح بإستمرار ..حنين جرت حابت ميه وحاولت تخليه يشرب ..أمير انت تعبان انت خدت دواءك..


أمير بصلها : دواء ايه ؟

حنين : أمير انا عارفة بتعبك فمتحاولش تخبي عني خدت دواءك !!
أمير بتعب : لا ..
حنين : طيب هو فين ؟ وانا هجيبه ليك .!

أمير : مش عايز اخده ...انا عايز اموت وارتاح..

حنين بلهفة : بعد الشر عليك اوعي تقول الكلمه دي تاني أمير علشان خاطري قولي فين الدواء ..

أمير : خلص بقالة يومين ونسيت اجيبة !

حنين بصدمة : خلص !! حرام عليك انت ليه بتعمل في نفسك كده ..انا هتصرف هطلع لسامح اخليه يشوف حل بسرعة ..سابتة وراحت ل سامح لقت فرح ..في حاجة يا حنين؟
حنين بإحراج : كنت عايزا الدكتور سامح اسئلة في حاجة..
فرح : سامح راح الفيلا العمال طلبوا حاجات وراح يوديها قولي عايزا ايه وانا هساعدك ..
حنين : لا خلاص لما هو يرجع بعد اذنك
فرح بضيق : اتفضلي ..حنين مشت وفرح تمتمت ودي عايزا سامح تسأله في ايه ان شاء الله ..

أمير بدأ جسمة يرتعش وحنين خافت اكتر مسكت موبيل أمير تشوف اسم سامح وفعلا لقت الرقم ..كلمتة وهي بتعيط الحقني أمير بيموت..

سامح : طيب اهدي متخافيش اديلة الدواء وانا خمس دقايق وهكون عندك..
حنين بعياط اكتر : قال ان الدواء خلص
سامح بزهق : طيب حاولي تدفيه كويس وانا ثواني وهكون عندك
حنين : حاضر ..قربت منه حاولت تدفيه علي قد ما تقدر ..سمعته بينادي علي اسمها ..ملك انتي جنبي ..
حنين بوجع : انا معاك ..
أمير : متسبنيش خليكي معايا اوعي تمشي..
حنين : مش همشي !

أمير : ملك انا بحبك ..

حنين غمضت عنيها بوجع وانا كمان بحبك ..بصتلة لاقته اغمي عليه حاولت تفوق فيه مبيردش عليها هنا خلاص مينفش يسكت صرخت عليه فكرته مات
سامح كان داخل البيت سمع صرختها جري علي الاوضه واول ما شافه شالة بسرعة ونزل بيه علي تحت الكل اتجمع علي اللي حصل..
ناديه ماله ابني فيه ايه حد يطمني..
فرح : اهدي يا ماما مفيش حاجة.

سامح كان سايق بسرعة البرق وهو في الطريق كلم المستشفي تكون في استقبالة واخير وصل دخل علي الاجهزة بسرعه وفضل معاه جوه كتير

الكل برا الخوف والتوتر هيموتهم ..سامح خرج والكل جري عليه
فخر الدين : ماله أمير يابني طمني عليه
سامح بتنهيده : الحمد لله كويس عدت علي خير ..
ناديه : اللي حصل معاه ده ليه فهمني ؟

سامح بص لحنين : مفيش حاجة هو بس الضغط عنده علّي شويه بس متخافوش

فرح بصتله بشك وخدته علي جنب ضغط ايه ده اللي يخليه يدخل العنايه المركزه ...
سامح : اششش اسكتي هفهمك بعدين حاولي تطمني اهلك لما نشوف هيحصل ايه..
فرح بدموع : هو فيه ايه ماله أمير !
سامح : أمير عندة القلب يا فرح بقاله تلات سنين بيعاني لواحده ..
فرح بصدمة انت بتقول ايه : عنده القلب اخويا انا..

سامح : للاسف ..بس ان شاء الله خير خلي بالك بس من ابوكي وامك اصل يروحوا فيها..

فرح : ماشي بس طمني هيعيش..
سامح : ان شاء الله..

عدي يومين والاعصاب مشدوده أمير في العناية ومحدش فاهم الوضع غير فرح وحنين ..لحد ما أمير فاق وبقي نوعا ما كويس ..واتنقل لاوضه عاديه..

ناديه خدته في حضنها كده بردو تخضنا عليك ..
أمير : أنا كويس يا ماما متخافيش..
حنين : قربت منه حمدلله علي سلامتك..

أمير بإبتسامة : الله يسلمك ..امال بابا فين ..صوت من وراه انا اهو الف سلامة عليك يا حبيبي كده تعمل فينا كده..

أمير : أنا اسف ...
شويه وسامح دخل : ايه ياعم عايز تقعد هنا في المستشفي وتدلع علينا كتير يلا قوم روح ..

أمير : انا لو عايز ادلع هيكون هنا في المكان ده...ونبي تسكت ..

سامح : سكت ...وهما بيتكلموا دخل عامل النظافة ينظف الاوضه ..
أمير اخد بالة منه : عم سيد انت معقوله..!!

عم سيد : أمير وراح يسلم عليه مالك يابني الف سلامة عليك..

أمير بص ل سامح وقرر كلامه : لا ابدا كنت بدلع عليهم بس شويه..عامل ايه يا راجل يا طيب ..
عم سيد : الحمد لله ماشيه ..

أمير : ليه بتشتغل أن الاوان ترتاح بقي..

عم سيد : اكل العيش مفهوش راحه يابني والحمد لله ان لاقي حد بيرضي يشغلني وانا في السن ده..
أمير : ربنا يعينك..
عم سيد : ياااااارب..
أمير رجع البيت وحنين طول الوقت جنبه قريبه منه مبتسبهوش للحظة شافت ان شخصية أمير مرحة كتير ..
تحب تأكل ايه بقي علي الغداء النهاردة
أمير : لا مش هتغدا هنا اتخنقت من قاعدة البيت عايز اخرج ..

حنين : طيب هتروح فين !

أمير : مش عارف بس هخرج
وفعلا قام خرج ولقي نفسه رايح المستشفي عند سامح قابل عم سيد وخده بالحضن وساله انت جاي ليه تاني..
أمير ضحك : نسيت اقولك انا اصلي شريك في المستشفي دي ..
عم سيد: بتتكلم بجد طب ازاي..
أمير : لا ده الموضوع كبير تعالي اقعد هحكيلك فضل يحكي معاه كتير وكان عايز يفضفض عن اللي جواه
عم سيد : ياااه كل ده علشان تعرف ان ربنا بيعوض .
أمير : الحمد لله..
عم سيد سكت شويه ... أمير عايز اقولك سر وأن الاوان انك تعرفه تعرفه !!!
أمير بإستغراب : سر ايه ده ؟
عم سيد : ........؟؟
رواية انهيار قلب للكاتبة وردة الفصل الثاني عشر

أمير كان مستني عم سيد يتكلم ويقوله ايه هو السر اللي ميعرفهوش : ساكت ليه يا عم سيد قول تعرف ايه ؟


عم سيد بتنهيدة : طبعا انت عارف اني لكنت بشتغل جنيني زمان عند حماك الله يسامحه بقي وقتها كنت بالصدفة في الجنينه ومحدش كان واخد بالة مني وسمعت كلام يخصك ..


أمير بسيمع منه بترقب : هااا سمعت ايه ؟!

عم سيد هحكيلك بس حاول تسمعني للاخر : انت عندك بنت وملك معملتش اجهاض زي ما اوهموك ..فلاش باك**

حسين بعصبية : اعقلي يا ملك وروحي شوفي بيتك وجوزك وسيبك من الكلام الفارغ اللي في دماغك ده ؟


ملك بعياط : يابابا بقولك حاسه انه بيخوني دا غير انه بقي عصبي فوق ما تتخيل لدرجة بحس انه اتجنن خلاص وبخاف ليقوم يعمل حاجة في بنتي ..


حسين : لا حول ولا قوة الا بالله مش هرد عليكي !

ملك : انت ليه مش عايز تفهمني شريف من ساعة الدكتور ما بلغه انه معندهوش ١٪ يخلف وهو اتجنن خلاص سهر وشرب لما زهقت ..
حسين : اعذريه دي حاجة مش سهلة علي اي راجل يستحملها خبر انه مبيخلفش صدمة .. المفروض انك توقفي جنبه وتساعديه يتخطي المحنه دي..
ملك : اساعده !! لو علي المساعدة فأنا قدمت ليه اكبر مساعدة وكتبت بنتي بإسمة وحرمتها من ابوها علشانه..اعمل ايه اكتر من كده ..
حسين : متعمليش قومي روحي بيتك وفتره وهتعدي مش عايز مشاكل كل يوم والتاني اعتمدي علي نفسك شويه ..

باك**

عم سيد : اول ما سمعت الكلام اتصدمت واللي كنت شاكك فيه طلع صح بنت ملك اتولت بعد جوازها بسبع شهور بس وساعتها قالوا انها اتولدت بنت سبعة والكل صدق بس انا مصدقتش ..بس مكنش معايا دليل لحد ما سمعت بوداني وعرفت الحقيقه ..حاولت بكل الطرق اوصلك معرفتش ..لما فقدت الامل ..

أمير كان بيسمع منه وهو مش مصدق ازاي قدرت تعمل كده فيه ازاي هان عليها تعذبه كده من غير رحمة ولا ضمير ..


عم سيد بص ل أمير اعذرني يا بني مكنش ينفع اسكت علي حاجة زي كده دور علي بنتك ربيها في حضنك انت دلوقتي تقدر توقف في وشهم ..بيهز أمير ..انت سامعني..


أمير قام وقف ومكنش شايف قدامه قلبه مش مستحمل صدمات تانيه مش عايز يصدق جاحة زي كده ركب عربيته واول مره من زمن طويل دموعه تنزل افتكر كل اللي حصل معاه زمان للحظه باللحظة حس بكل للحظة وجع عشها وازاي اتعامل اسوء معامله ...**

أمير قاعد علي اعصابه وكل ما يرن عليها تلفونها يديه مقفول يضايق اكتر واكتر ..واخير صوت الباب اتفح ودخلت شايله اكياس كتيرة في ايدها...
أمير بصلها بضيق : كنتي فين وازاي تخرجي من غير ما اعرف ..
ملك ببرود : كلمتك وتلفونك كان غير متاح ..

أمير بتريقة : والله غير متاح ! بص للاكياس اللي في ايدها وايه الحاجات دي كلها جبتي فلوس منين ؟


ملك : كنت مع اصحابي وعجبتني شويه حاجات فاستعملت الفيزا بتاعتي !

أمير بعصبية : نعم !! احنا هنعيد الكلام تاني وبعدين انا مش لسه جايبلك اللبس الشهر اللي فات لازمتها ايه الحاجات دي كلها..

ملك بنفاذ صبر : كنت مع اصحابي وهما اشتروا حاجات كتيرة واتكسفت مشتريش زيهم كنت عايزني اعمل ايه؟ كنت في وضع محرج !


أمير بصدمة : اشريتي كل ده علشان لقيتي نفسك بس شكلك وحش قدام صحابك وبعصبية طيب يا ملك الحاجات دي ترجعيها مكان ما جبتيها ..يا اما هيكون ليا تصرف تاني مش هيعجبك ..

ملك : ارجعها فين ! انت مكبر الموضوع كده ليه ..وبعدين انا مخسرتكش حاجة كلها بفلوسي ..

أمير غمض عنيه بصدمة الكلمه جرحته : وعلشان هي بفلوسك مش هقبل بيها في بيتي غير لما ابقي مقصر معاكي ...قرب منها مسك ايدها ومسك الاكياس يلا تعالي عرفيني جبتي الحاجات دي منين علشان هنخرج نرجعها ..


ملك شدت ايدها منه : مش هنخرج نرجع حاجة يا أمير ولو مصمم اوي كده اننا نخرج يبقي هخرج علي بيت اهلي احسن !!

أمير وقف بصدمة : انتي بتهدديني يا ملك بتمسكيني من ايدي اللي بتوجعني
ملك : انت اللي بتوصلني لكده وانا خلاص مبقتش مستحمله العيشه دي وانت مش قادر تفهم وبتعمل مشاكل علي اسباب تافها.. لما زهقت بجد !

أمير كز علي انيابه : زهقتي !! ماشي يا ملك اعملي اللي يريحك قال كلامه وخرج من الشقه وقفل الباب بقوة نزل قعد علي القهوة وكل ما يفتكر كلامها يتخنق وبيفكر ازاي حياتهم هتكمل بشكل ده وياتري فعلا هي معاها حق وهو مزودها زياده عن الزوم ..


الوقت عدا محسش بيه قام روح يتكلم معاها بهدوء ويحاول يوصل معاها للحل يرضي بيه الطرفيين وصل الشقة لقاها هاديه دخل اوضه النوم ملقهاش فيها قبلة اتقبض نادا عليها مفيش حد بيرد جري فتح الدولاب ملقاش هدومها وقف مصدوم معقوله مشت وسابته كان هيتجنن ازاي قدرت تعمل كدا.. خبط دماغه كذا خبطة في الدولاب علي غبائها ..ليه يا ملك عملتي كدا ليه ؟؟!!


لملم من نفسة وقام راح يشوفها وصل البيت محدش رضي يدخله حس بالذل والاهانه رجع علي شقته حاول يكلمها كتير معرفش يوصلها نهائي كل يوم يروحلها وبردو مش عارف حتي يكلمها لحد ما زعق كتير وخرج ليه حماه وقاله ان خلاص كل حاجة انتهت وبنتي مش عايزاك..


أمير : انت بتقول ايه طيب خليها هي تقول الكلام ده بنفسها وبعدين طلاق ايه اللي بتتكلم عنه انت ناسي انها حامل في ابني !


حسين : ابنك خلاص ملك نزلته ودي الورقه اللي تثبت كلامي اظن ده اكبر اثبات انها خلاص مبقتش عايزاك ويلا اتفضل امشي من هنا ..


امير وقف مصدوم الدموع بتلمع في عنيه خد الورقه وطلع بيها بسرعه علي الدكتور اللي اثبتله الكلام صح ..أمير مسك في خناقه ازاي عملت كده من غير اذن مني انا هوديك في ستين داهيه..

الدكتور خلص نفسه منه بالعافيه وطلب الامن شالوه رموه برا..

باك **


أمير فاق من الماضي اللعين اللي مصمم يدمر كل حياته وينهيها بالبطيء شغل عربيه واول مكان راحة كان عند الدكتور لازم يتاكد لازم يقطع الشك باليقين..كان سايق وهو مش شايف قدامه كل تفكيرة كان في ملك واللي عملته معاه


وصل للمستشفي ونزل وهو بيتنفس بصوت عالي وصل لمكتب الدكتور حاولت السكرتيره تمنعه معرفتش كان زي الاسد المدبوح ودخل لقي الدكتور مسكه من رقبته خنقه ..


أمير : قولتلي عملت اجهاض وطلعت بتكدب عليا ليه عملت كده ..

الدكتور وهو بيحاول ياخد نفسه : انت مين وبتتكلم عن ايه ..

أمير بعين حمرا : انا اللي دمرت حياته وعيشته في كدبه سنين ..ايه مش فاكرني..

الدكتور بصله كتير يفتكر ملامح وشه ...افتكرتني عرفت جريمتك اللي عملتها في حقي قبضت كتير اوي كده ..
الدكتور بعصبية : انت عايز ايه ؟

أمير : عايز اعرف الكلام اللي قولته ليا زمان كان بجد ولا كان تأليف منك؟

الدكتور : انا معرفش انت بتتكلم عن ايه ؟

أمير بنفاذ صبر : يبقي اتشاهد علي روحك انا خلاص معنديش الحاجه اللي اخاف عليها..


الدكتور بسرعه : معملتش اجهاض مراتك وقتها اول ما شافت اوضه العمليات خافت وحسين علشان صحبي طلب مني تقرير ان حصل اجهاض نتيجه نزيف حاد وطلب مني ابلغك كده وقتها..


أمير ساب ايده حس بشلل بكل جسمة رجليه خانتة انهار علي اقرب كرسي ..في نفس اللحظة امن المستشفي دخل يتعامل مع أمير ..الدكتور شاورلهم ان مفيش حاجة خلاص..قرب من امير .. انا اسف يابني كان غصب عني والله ...


أمير بصله بوجع : أسف ياااه انت عارف انت عملت فيا ايه ..انت دبحتي بسكيه باردة ازاي جالكم القلب تعملوا فيا كده

عملتلكوا ايه اذيتكم في ايه كان بيتكلم ودموعه علي خدة ..مسح دموعه بسرعه وكز علي انيابه مبقاش انا أمير خطاب ان ما دفعتكم تمن اللي عملتوه فيا ..قال كلامه ومشي وهو في الطريق كلم مصطفي وطلب منه عدد كبير من رجاله محترفه..

مصطفي بإستغراب : عايز الرجاله دي ليه يا أمير ..

أمير بنرفزة : نفذ وخلاص يا مصطفي نص ساعه وتكون اتصرفت ..
مصطفي : طيب طيب اهدي هشوف واكلمك...

أمير فصل معاه ووصل بيت شريف وقف قدامه بيبصلة بحقد وكره موبيلة رن ومصطفي بلغه ان حضر الرجاله اللي طلبها ...


أمير : هبعتلك العنوان ده ابعتهم عليه ومتجيش معاهم ..

مصطفي : ليه ؟
أمير بعصبية : من غير ليه مفذ وبس ومتتعبش اعصابي معاك !

مصطفي بضيق : شاف المسج وخد الرجاله وراح ل أمير ..

أمير اول ما شافه انت ايه اللي جابك!
مصطفي : مينفعش اسيبك وانا مش عارف انت بتعمل ايه وبتخطط لايه..
أمير بصله بضيق وكلم الرجاله في حاجة جوا الفيلا دي تخصني وعايزها ..

واحد من الرجاله اتكلم : حاجة ايه دي يا بيه ؟

أمير : طفله عمرها ٦ او ٧ سنين هي في العمر ده الطفله دي تلزمني من غير ما يصبها اي ضرر هتقدرو تعملوا كدا
ولا...

الرجاله في صوت واحد : نقدر طبعا هنعمل مراقبه كويسه وندرس المكان كويس وفي الوقت المناسب هنقتحم الفيلا وهتكون عندك..


أمير : كويس اوي هستني منكم خبر واللي هتطلبوه هتاخدوه بس في المقابل تكون البنت عندي ..بص ل مصطفي يلا بينا علشان نسيبهم يشوفوا شغلهم


ركبوا العربيه ومشوا ..مصطفي ممكن تفهمني فيه ايه ومين البنت دي اللي انت عايزها انا مش فاهم..

أمير بجمود : مش مهم تفهم ..المهم دلوقتي عايز مكان يكون آمان اقعد فيه الفترة الجايه..

مصطفي بعصبية : لا مهو انا لازم افهم ايه اللي انت بتعمله ده ؟

أمير : هفهمك بس الاول اللي انا عايزه يخلص..يلا هنزلك تشوف مكان آمان لحد ما اروح البيت واجيب حنين ..بصله علشان خاطري يا مصطفي نفذ اللي بقولك عليه وكلها ساعات وهتعرف كل حاجة بنفسك علشان مفيش فيا دماغ لا احكي ولا اتكلم ..

مصطفي بضيق : ماشي يا أمير لما اشوف اخرتها معاك ايه ..بالنسبة للمكان عندي شقه في الشيخ زايد لسه شريها في مكان هادي ومطترف عن الناس ممكن تروحه ..


أمير : كويس جدا هات المفتاح..

مصطفي : اتفضل ..
أمير : تابع انت بقي مع الرجاله وانا هروح اخد حنين وهسبقك علي هناك ..
حنين كانت قاعدة مستنياه وهي قلقانه عليه اتأخر كتير برا كلمته كذا مرة ماردش اتكسفت تكلمه تاني وسابته علي راحته بس من جواها مضايقه ومخنوقة..ناديه دخلت تقعد معاها شافتها متوترة : مالك يا حنين مش علي بعضك ليه كدا..
حنين : لا ابدا قلقانة علي أمير خرج وهو لسه تعبان ..
ناديه ابتسمت : أمير طول عمرة مبيحبش قاعدة البيت حتي لو كان فيه تعب الدنيا..وهما بيتكلموا دخل سامح بتعب وارهاق.. السلام عليكم..
حنين /ناديه : وعليكم السلام
سامح : هي فرح لسه مجتش من الشغل ؟

ناديه : لا مش المفروض تيجو مع بعض.

سامح : لا انا خرجت بدري وروحت علي الفيلا اتابع اخر الاخبار ايه وكدا ..

ناديه : والله ما عارفه لازمتها ايه الفيلا دي ما البيت هنا اهو واسع وزي الفل ..المهم احضرلك العشاء ..


سامح : لا هستني فرح والاولاد كمان هكلمها تجيبهم معاها من النادي علشان معرفتش اعدي عليهم.. ..


ناديه وهي بتقوم توقف : طيب هعملك كوبايه عصير فرش تشربها عقبال لما يوصلوا بالسلامة..

سامح ابتسم وبص ل حنين : عامله ايه يا حنين اخبارك..

حنين : كويسه ...سكتت شويه وبعدها قام قربت منه ينفع اسألك سؤال ..

سامح : اه طبعا انفضلي ..
حنين :انت كدكتور شايف أمير ازاي يعني تعبة وكدا..

سامح بتنهيدة : الوضع عن أمير ميطمنش خصوصا انه بيهمل في علاجه كتير ..

حنين : طيب هو مفيش حل غير العلاج
سامح : مفيش غير انه يعمل عمليه زرع قلب والنوع ده من العمليات بيكون صعب جدااا ونسبة النجاح فيها بتكون ضعيفة وسبق وعرضت الفكرة علي أمير بس هو رفض ...

حنين بترقب : طيب لو معملش العمليه هيعيش ..

سامح : الاعمار دي بإيد ربنا وطول ما هو واخد باله من صحته مش هيقابلة مشاكل ..حنين انا شايف في عنيكي حب كبير ل أمير ...أمير محتاج الحب ده منك اوي الايام الجايه محتاج حاجة قويه تخليه يعافر ويعيش علشانها
حنين كانت لسه هترد أمير دخل عليهم فسكتت ..وهو بصلهم بشك ...السلام عليكم

سامح : وعليكم السلام هااا عامل ايه النهاردة ؟

أمير : احسن الحمد لله بص لحنين تعالي عايزك..

حنين اسأذنت من سامح وقامت وراء أمير اللي ملامح وشه متغيرة ..

أمير اول ما دخلت وقفلت الباب وراها كلمها بحدة : كنتي بتتكلمي في ايه مع سامح واول ما شوفتوني سكتوا كأنكم شوفتوا عفريت..

حنين بصدمة : هنكون بنتكلم في ايه ..كل الحكايه كنت بسألة عن صحتك بما انه دكتورك وعارف كل حاجة عنك.

أمير بصلها بشك : انت عرفتي منين بموضوع مرضي ده ؟

حنين : سمعتك انت وسامح وانتوا بتتكلموا وعرفت !

أمير بتريقة : وياتري بقي بعد ما عارفتي حابه تكملي مع واحد مريض زي ولا تطلقي علشان تعيشي حياتك مع راجل سليم ؟؟

حنين دموعها سبقتها وبصت لعنيه بتركيز يمكن يشوف حبها ولهفتها عليه : لا مش حابه اطلق وانت مش مريض بالنسبالي علشان انا بحبك انت ويهمنيش اي حاجة تانيه غير ان اكون معاك وبس...

امير ضحك بصوت عالي لدرجة قلبت معاه بكحة... حنين بخوف قربت منه انت كويس ؟

أمير اخيرا هدا وبصلها واتكلم بحدة : كويس بس ونبي بطلي اسطوانه انك بتحبيني والكلام الفارغ ده علشان الكلام سهلة اوي وياما سمعت منه كتير وكانت النتيجة زي ما انتي شايفة كدا ..تعرفي انا دلوقتي بس اتاكدت انكم كلكم شبة بعض فصيلة واحده بتتفتنوا في الكلام وتباينوا انكم بتحبونا وهتموتوا علينا لكن لو جيتي للحقيقة انتوا كائنات بتعشق نفسها وبس....!


حنين الدموع لمعت في عنيها : بس انا مش شبة حد وصوابعك مش زي بعضها وياريت تبطل تقارني بحد علشان انت متعرفنيش ولا تعرف اللي جوايا...


أمير بحده : طيب اسكتي وياريت انتي تبطلي كلامك واسلوبك ده وافتكري اتفاقنا كويس واني قولتها ليكي صريحة انا مش بحبك....

حنين غمضت عنيها بوجع ولسه هتخرج من الاوضة صوته وقفها : رايحة فين انا لسه مخلصتش كلامي ..حضري شنطة هدومك علشان هنقولهم اننا هنسافر فترة اغير فيها جو علشان تعبان وكدا..

حنين بإستغراب : هنسافر فين ؟ وليه انا هسافر معاك ممكن تسافر مع حد من صحابك علي الاقل هيكون احسن مني


أمير نفخ بضيق : ممكن تسمعي كلامي ده اللي نقوله اننا هنسافر بس الحقيقه هتكون غير كده وهتعرفي بعدين كل حاجة ..حضري بس هدوم ليكي وانا هطلع ابلغ ماما وبابا تكوني جهزتي

حنين كانت عايزا تعترض بس لقت نفسها بقوله : ماشي ...
أمير : اه واعملي حسابي في شنطة لهدوم ليا ...قدامك قد ايه وتخلصي تجهيز الشنط؟
حنين : مش كتير ..
امير تمام مستنيكي برا ..

أمير خرج وهي وقفت تبص علي مكان خروجة وقامت تجهز الشنط وهي دموعها علي خدها..


ناديه بإبتسامة : فكرة كويسه اهم حاجة انكم تتبسطوا تروحوا وترجعوا بسلامة فخر الدين : اهم حاجة خلي بالك من صحتك كويس

أمير ابتسم : حاضر ...
حنين خرجت وأمير بصلها : جاهزة ..هزت دماغها بمعني اه سلمت علي عليهم وناديه وصتها علي امير وانهم ياخدوا بالهم من نفسهم ..
أمير حط الشنط في العربيه وركبوا ومحدش فيهم بيتكلم نهائي ..قطع الصمت رنت الموبيل اللي فرحت أمير جدااا ...يعني البنت معاكم انت متأكد يا مصطفي..
مصطفي بضيق : امال بكلمك اهزر في ايه يا أمير.

أمير : طيب خد الرجالة واطلع بيهم علي الشقة وانا ثواني وهكون عندك..

خلص المكالمه وهو جواه احساس غريب يا تري بنته شكلها ايه وهيعرف يتعامل معاها ولا لاء...

حنين : ممكن افهم في ايه واحنا رايحين فين ؟ ومين البنت اللي انت يتتكلم عنها دي...

أمير : ثواني وهتعرفي كل حاجة... حنين سكتت بس كانت هتموت وتعرف في ايه وصل العمارة لقي مصطفي مستنيه خده وصلة لشقة عند البنت
أمير بلهفة : مليكة فين ؟
مصطفي بإستغراب : مليكة مين ؟
أمير : البنت يا مصطفي ..
مصطفي : مربوطة جوه علي الكرسي..
أمير بعصبية : مربوطة !! ودخل يجري يحلها ويشيل اللصقة من علي بوقها وهو بيردد حبيبت ابوكي ازاي الحمير يربطوكي كده ...انا آسف يا قلب ابوكي..
حنين ومصطفي بصوا لبعض بصدمه وفي صوت واحد : ابوها ..
رواية انهيار قلب للكاتبة وردة الفصل الثالث عشر

أمير بخوف ولهفة بيحل الحبل اللي مليكة مربوطة بيه وهو بيشتم علي رجالته الغبية ازاي يربوطوا طفلة بالشكل ده ..أنا آسف يا قلب ابوكي خلاص حلها وخدها في حضنه تحت صدمة من مصطفي وحنين اللي واقفين فاتحين بوقهم ومش فاهمين حاجة ..ابوها ازاي ؟ وامتي !! ...


مليكة صرخت وبإيدها بتضرب في أمير وبتطلب منه يبعد عنها...ابعد اني انت مش بابا انت وحش ابعد عني انا عايزا مامي..


أمير : اهدي يا حببتي انا بكون ابوكي يا مليكة انا بابا يا حبيبتي ..

مليكة بعدت وراحت في اخر الاوضته وغطت وشها وبدأت في الصريخ انت مش بابا هاتولي مامي انا عايزا مامى..
أمير بيحاول يقرب منها مطصفي مسكه من ايده تعالي معايا برا ..بص ل حنين حاولي تتصرفي وتهديها..

خد أمير وخرج برا الاوضة وحنين واقفه مذهوله من اللي حصل قدامها منظر مليكة خلاها صعبت عليها ..قربت منها لقت جسمها بيتنفض وبتعيط وبردد انا عايزا مامي ودوني لماما..


حنين : حببتي اهدي وانا هوديكي لماما ..

مليكه بصتلها ببراءه وبتمسح دموعها : بجد يا طنط هتوديني ل ماما..
حنين نزلت لمستواها ومسحت لها دموعها بحنان : لو بطلتي عياط هوديكي ..

مليكة ببراءه : حاضر مش هعيط تاني..


أمير حكي ل مصطفي علي حكايه مليكة وازاي عرف بيها ..شوفت يا مصطفي بعد العمر ده كله يطلع عندي بنت وانا معرفش ومحروم منها وكمان رافضاني ...رافضة وجودي..


مصطفي بزعل علي صديق عمرة : البنت معذوره بردو يا أمير هي متعرفكش ولا عمرها شافتك عايزها تعمل ايه تخدك بالحضن مثلا رد فعلها طبيعي جدا لطفلة في سنها ده ...فكر فيها كده البنت فجأة لقت نفسها في حضن واحد غريب وبيقولها انا ابوكي وهي عمرها ما شافته ولا تعرف عنه حاجة ده غير الطريقه اللي جت بيها عايزها تعمل ايه يعني..


أمير بجمود : هي السبب في اللي انا وصلتله ده وبقهر من جواه بس مبقاش انا ان ما ندمتها علي كل حاجة عملتها فيا....

مصطفي : اللي جاي مش سهل وملك مش هتسكت وممكن تبلغ الشرطة وساعتها هتدخل في مشاكل انت في غني عنها...

أمير : مش هتقدر تبلغ ..لو عملت كده وبلغت تبقي هي اللي جابته لنفسها انت ناسي انها كتبت البنت بإسم راجل غيري

دي لواحدها ممكن تخليني اسجنها واوديها في ستين داهيه بس انا مش هعمل كده ..انا هحرمها منها طول عمرها زي ما حرمتني منها هخليها تتمني بس تلمحها من بعيد ومش هتعرف ...
حنين خرجت والاتنين بصولها..
أمير بلهفه : ايه الاخبار ؟

حنين : نامت ..

مصطفي بتنهيدة قام وقف : طيب الوقت اتاخر وانا لازم امشي هنتواصل مع بعض ونشوف هنعمل ايه وايه اللي هيحصل ..
أمير : ماشي انا كدا كدا مش هعرف اخرج الايام الجايه وهحتاجك كتير معايا..
مصطفي : طيب يلا بعد اذنكم

مصطفي مشي وأمير قعد حط وشه بين ايديه بتعب ..حنين قربت منه بهدوء ممكن افهم ايه اللي حصل ده..

أمير بصلها : عايزا تفهمي ايه؟
حنين : كل حاجة ازاي دي بنتك وانت كنت تعرف بوجودها ولا لاء ..
امير بجمود : ايوا بنتي ومكنتش اعرف حاجة عنها غير النهاردة بس ..
حنين بإستغراب : ازاي ؟؟ طيب ليه مكنتش تعرف عنها حاجة وليه اصلا ملك خبت عنك حاجة زي كده ؟
أمير بضيق : معنديش اجابه علي كلامك
ومعرفش ليه عملت كده فيا ..

كمل بوجع كل اللي فاكره اني معملتش معاها حاجة في حياتي غير اني حبيتها وهي قابلت الحب ده بالخاينه والاذية ليا حرمتني من بنتي حرمتني من حاجات كتيرة اوي وعدتني بيها ومنفذتهاش..عنيه بدأت تلمع بالدموع انا من زعلي علي اللي هي عملته فيا تعبت عضلة قلبي ضعفت بسببها وبسبب اللي شوفته معاها واهمتني بالحب وخلتني واقفت في وش الدنيا كلها علشانها قالتلي انها متقدرش تعيش من غيري ولا ثانيه خلتني حبتها لدرجة الجنون عملت حاجات عمري في حياتي ما عملتها اشتغلت ليل نهار علشانها وكنت راضي وفي الاخر سابتني ودمرتني خدت منها الصدمة مرتين مرة لما عرفت انها اجهضت اللي في بطنها والمرة التانيه لما عرفت اني عند بنت وعايشة مكتوبه بإسم راجل غيري ..تفتكري انا كده وحش انا استاهل منها كده.


حنين قربت ومنه وهي بتمسح دموعها وكل اللي عملته انها خدت أمير في حضنها وهو ما صدق انها ضمهi وبقي زي العيل الصغير اللي كان تايه ولقي حضن امه عيط من قلبه عيط علي حياته اللي ادمرت عيط علي بنته اللي عاش محروم من ضمة منها ...


حنين : أمير علشان خاطري كفايا كل ده غلط علي صحتك اهدي علشان خاطري..

امير بدا يهدي شويه شويه وهو لسه في حضنها..
حنين بهمس خدت دواءك ؟
أمير : هز دماغه بمعني لا..
حنين لسه هتقوم علشان تجيلة ميه ياخد علاجة رفض ...ممكن متبعديش كمان شويه هاخده..
حنين ابتسمت : حاضر ..خدت نفس طويل ومدت ايدها تمسح علي شعره وهو استكان في حضنها ونام ....

ملك بعياط هستيري بنتي اتخطفت يا شريف انا عايزا بنتي هاتولي بنتي ...

شريف بعصبية : اهدي يا ملك لما الداده تفوق ونفهم منها ايه اللي حصل علشان اعرف اتصرف..
ملك : انت لسه هستني لما تفوق علشان تتصرف وانا معرفش حاجة عن بنتي
الدكتور بصلهم بنفاذ صبر وبص ل فاطمة اللي مغمي عليها اثر خبطة علي دماغها ..مدام فاطمة انتي سمعاني
فاطمة وهي بتتكلم بالعافيه : سمعاك..
شريف بسرعة قرب منها : مليكة فين يا فاطمة وايه اللي حصل ..

فاطمة بصوت ضعيف : خطفوها !

شريف : مين حد تعرفيه شكلهم كان ايه ؟
فاطمة وهي بتاخد نفسها بالعافيه : لا معرفهومش كانوا تلات رجاله ملتمين واول ما شوفتهم حد ضربني علي دماغي ومشوفتش حاجة بعد كدا..
ملك بعياط : طيب بنتي عملتلهم ايه علشان ياخدوها بصت ل شريف وانت مستني ايه بلغ الشرطة تتصرف..

شريف بزهق : اهدي يا ملك كدا كدا الشرطة مش هتتحرك غير بعد ٢٤ساعة من اختفائها يعني البلاغ مش هيفيد بحاجة ..

ملك : امال اسيب بنتي تروح مني واقف اتفرج ..

شريف : اطمني انا هتصرف وبنتك في خلال ساعات هتكون عندك وفي حضنك ..بس انتي اهدي وسبيني اتصرف من غير ما الشرطة تدخل في حاجة ..


ملك بحدة : قدامك تلات ساعات لو بنتي مرجعتش فيهم هبلغ ومش هستني انت فاهم ..

شريف : هتكون عندك في اقل من كده كمان ثقي فيا ..
ملك انهارت في العياط ياتري فيكي يا حبيت مامي عملوا معاكي ايه ..
شريف سابها وخرج جمع كل رجالته وهو بيزعق : ازاي يا شوية تران حد يدخل الفيلا ويخطف البنت ويعطل الكامرات وانتوا موجدين ؟؟
الرجالة : ......
شريف بعصبية اكتر : انطقوا ..

واحد من الرجاله اتكلم : غلطة غير مقصودة ياشريف بيه ومحدش معصوم من الغلط..

شريف : هي فعلا غلطة اني اعتمدت علي ناس زيكم ..اسمعوني كويس معاكم ساعة تكون البنت عندي تعملوها ازاي معرفش كل اللي اعرفه ان البنت تكون عندي في خلال ساعة ولو البنت مجتش في خلال الساعة دي اتشهدوا علي ارواحكم..
الرجالة بصت لبعضها وهمت بالتنفيذ : مفهوم يا فندم ...
شريف بحدة : يلا اتحركوا..

الرجاله مشت وتلفون شريف رن بصله بزهق مش وقتك خالص... خير بتتكلمي ليه ؟

مايا بإستغراب : مالك متعصب كده ليه ؟
شريف بزهق : اخلصي يا مايا في ايه ؟
مايا : في مصيبة !!
شريف بقلق : مصيبة ايه ؟

مايا : حسين شاكك في العميل بتاعتنا وبدا يسأل وراه ولو عرف حاجة هنروح كلنا في داهية ..

شريف كز علي انيابه : هو يوم باين من اوله اقفلي يا مايا وانا هتصرف ..خلص المكالمه لقي ملك وراء منه بتبصلة بإحتقار : لدرجادي مش قادر علي بعدها في عز اللي احنا فيه ده بتكلمها هتفضل طول عمرك زباله..

شريف : افهمي يا ملك انا مفيش بيني وبين مايا حاجة غير الشغل وبس ..

ملك بقرف منه : ميهمنيش اعرف ايه اللي بينكم انا كل اللي يهمني بنتي وبس انا عايزا بنتي ..
شريف قرب منها يهديها وهي بعدت نفسها بعيد عنه : طيب خلاص ممكن تهدي اصل يجرالك حاجة وانا واعدتك هجبلك بنتك وانا عند واعدي ...

أمير نايم في حضن حنين اللي كانت فرحانه ومبسوطة وهو بين ايدها ..كرهة ملك اكتر ما بتكرها لانها مش بس خدته منها لا دي جرحته وكانت السبب في دمار صحته ...فاقت علي صوت مليكة بتعيط بصت ل أمير اللي صحي وقام عايز يدخلها.


حنين : استني بلاش تدخلها انت علي الاقل النهاردة اما احاول افهمها الوضع

أمير : طيب انا مش عايزها تعيط ..

حنين : انا هتصرف معاها وانت خد دواءك ...دخلت علي مليكة وخدتها في حضنها تهديها ..

مليكة : انتي هتوديني امتا عند ماما ؟

حنين : احنا دلوقتي باليل ومينفعش نمشي نامي دلوقتي وبكرا هوديكي اتفاقنا..

مليكة : اتفاقنا.. باست حنين من خدها انتي طيبة اوي يا طنط ..
حنين ابتسمت علي برائتها وفضلت جنبها لحد ما راحت في النوم ....

طول اليل رجالة شريف بدور وعايزا تعرف مين الرجاله اللي قامت بالمهمة دي وخطفت البنت لحد ما وصلوا ليهم ومسكوهم وكلموا شريف وبلغوه بالاخبار الجديدة ...


شريف بإبتسامة : هاتوهم علي المخرن الكبير وانا ثواني وهكون هناك ..

& امرك يا شريف بيه ..

شريف ابتسم وطلع يطمن ملك ان قبل النهار ما يطلع هتكون مليكة في حضنها..

ونزل راح المخزن يستني الرجالة اللي وصلوا بالعربيات ونزل منها رجالته وتلات رجالة متربطين اترموا تحت رجل شريف اللي ماسك السلاح في ايده وبيبصلهم بشر ...بقي انتوا بقي اللي اتجرأتوا ودخلتوا الفيلا عندي وكمان ايدكم تتعدي علي ممتلكاتي ..

الرجاله بزعر : احنا ملناش دعوه يا بيه احنا بنفذ اوامر وبس ومكناش نعرف حضرتك..

شريف بغضب : مين اللي بعتكم ولحساب مين بتشتغلوا..

&احنا عبد المامور يا بيه ودي شغلتنا ومنقدرش نقول بنشتغل تحت ايد مين شوف احنا عملنا معاك ايه غلط واحنا نصلحة..


شريف سكت شويه : ماشي فين البنت اللي خطفتوها من الفيلا عندي..ودتوها فين..

&ودناها لواحد اسمة أمير في شقه في الشيخ الزايد ..
شريف بصدمة : أمير !! كز علي انيابه وبص لرجالته حضروا العربيات والسلاح بسرعه انت اللي بتعجل بموتك يا أمير .....؟؟؟
رواية انهيار قلب للكاتبة وردة الفصل الرابع عشر

أمير دخل الاوضة بسرعة لقي حنين نايمة جنب مليكة صحاها : حنين اصحي لازم نمشي من هنا حالا..

حنين بخضة : ليه ؟ حصل ايه ؟

أمير وطي علي البنت شالها : مفيش وقت هفهمك بعدين يلا بسرعه ..خدهم ونزل ويادوب ركب العربية ومشي ..شريف ورجالتة وصلوا المكان طلعوا الشقة وكسروا الباب دخلوا ملقوش حد رجالته فتشت الشقة حته حته مفيش اثر.... شريف بعصبية شدشدة خبط بإيده الحيطة يعني ايه انضحك علينا وطلع مفيش حد هنا

الرجالة : اظاهر كده يا بيه.

شريف بغيط : بص لرجالته بغل تعالوا ورايا ولسه هيطلع من الشقة لمح سلسة مليكة علي الارض ..كانت سلسة مميزة عند مليكة بتضم صوره ليها مع مامتها بص لسلسة وكلم نفسة : كانوا هنا وهربوا ...بغضب اكتر اهرب يا أمير لما شوف اخرك هتروح مني فين وصدقني حتي لو روحت اخر الدنيا بردو موتك هيكون علي ايدي ...


أمير وصل عند مصطفي اللي نزل من عربيتة بخوف وقلق : أمير انت كويس ..

أمير : اطمن بخير وحنين ومليكة في العربية وكله تمام ..
مصطفي اتنهد : الحمد لله اني كلمتك في الوقت المناسب والا والله واعلم ايه كان هيحصل !!

أمير : انت عرفت منين ان شريف رايح لينا هناك ..

مصطفي : الراجل الكبير اللي كلمتة وبعت ليا رجالتة نفدت المهمة عرف ان واحد اسمة شريف بيدور وراء اللي حصل وكمان خطف الرجالة اللي خطفت مليكة من عندة كلمني وقالي ان حياتك في خطر ..ساعتها مبقتش عارف اعمل ايه ولا اتصرف ازاي وخوفت عليك يجرالك حاجة ..

أمير : هيعملي ايه يعني هي البلد سيبة

مصطفي : يا أمير افهم الراجل الكبير بلغني ان شريف مش سهل ومش بيهمة القانون ..ده من النوعية اللي بتاخد حقها بدرعها
أمير كز علي انيابة : يعني ايه !! والمفروض بقي انا اسمع كلامك ده واخاف منه ..هو ملوش معايا حاجة دي بنتي مش بنتة وانا اللي معايا الحق مش هو ..

مصطفي : ولحد ما تثبت انها بنتك لازم تكون في مكان محدش يعرفة نهائي ومتأمن كويس اوي علشان اللي حصل من شويه ده ميتكررش تاني ..

أمير بتفكير طلع موبيلة وكلم طلعت وحكاله الوضع وطلب منه يحميه هو وبنتة لحد ما يشوف هيعمل ايه ؟
طلعت : متقلقش يا أمير شوية وهنزل اقبلك اوديك مكان آمان ..
أمير : متشكر اوي يا طلعت مش هنسالك ابدا وقفتك جنبي..

طلعت : بس يا عبيط انت اخويا ومش عايز اسمع منك الكلام ده تاني.


شريف وصل الفيلا وملك اول ما شافته طلعت تجرب عليه بلهفة : جيت بنتي هي فين وبتجري تهرول للعربية شريف مسكها من ايدها وكتفها وضمها لحضنة جامد ...أنا آسف يا ملك بس صدقيني انا مش هسكت وفي اقرب وقت هتكون في حضنك..

ملك بعصبية شدت نفسها من حضنة وبتضربة بإيدها بكل قوتها في صدرة : اصدقك !! قولتلي من شويه بنتك هتكون في حضنك وايه النتيجة روحت ورجعت من غيرها صح و عايزني اصدقك كانت بتتكلم وهي بتصربة في صدرة ومنهارة من العياط ..شريف مسك ايدها بالعافية حاول يهديها معرفش لحد ما وقعت بين ايديه واغمي عليها ..شالها وصرخ في رجالته تجيب الدكتور بسرعة...

طلعت خد أمير وحنين ومليكة وراحوا الفيلا بتاعته علي الطريق الصحراوي متأمنة كويس ومفيش اي حد يقدر يقربلها نهائي..

أمير بيكلم طلعت متشكر اوي يا ومكملش كلامه وطلعت قاطعة : بردو هتقول متشكر انا همشي احسن علشان مش عايز اسمع منك كلام يزعلني وكمان الحق ارجع القاهرة قبل النهار ما يطلع المهم انت خلي بالك من نفسك وانا معاك ومش هسيبك ومتخافش من اي حاجة ..طول ما انا جنبك.

أمير ابتسم : انت طول عمرك جنبي

طلعت مشي وأمير دخل عند حنين ومليكة يطمن عليهم لقاهم نايمين قرب من مليكة باسها بحب وعنية راحت علي حنين لقاها صاحية : منمتيش ليه
حنين اتعدلت : مش جيلي نوم وانت
أمير بتنهيدة : عادي بفكر بصلها حنين انتي مستعدة تربي مليكة وتعتبريها بنتك
حنين : أنت عندك شك في كده..
أمير : أنا بسألك..

حنين : بصت لعنيه بتركيز هقولها ليك يا أمير انا بحبك ... بحبك من ساعة ما عرفت يعني ايه حب ومستعدة افديك بروحي ..

أمير بيحاول ميضعفش قدام كلامها بس لقي نفسه غصب عنه قرب منها انفاسهم اختلطت ببعضها شفايفهم اتقابلت مع بعضها وبعد ثواني أمير بعد وقام
سابها وخرج علي برا يتمشي في الجنينه وهو بياخد نفسه وبيفكر هيعمل ايه هيكمل مع حنين وينسي الماضي ولا هيتصرف ازاي في الايام الجايه افتكر ملك واللي عملته فيه اتنهد يا تري هيعقابها علي حرمانه من بنته السنين دي كلها ...

حنين جنب مليكة حاطة ايدها علي شفايفها وبتفتكر لمست امير ليها وتبتسم كانت حاسة انها طايرة من السعادة لحد ما نامت ووصحت علي ايدين مليكه بتصحيها : طنط ممكن تصحي اليل خلاص خلص ..

حنين صحت وبصت علي مليكة ابتسم : صباح الخير يا حبيبتي ؟
مليكة : صباح النور اليل خلص وانتي واعديني ان اول ما يخلص هتوديني ل ماما..
حنين سكتت ومش عارفة تقولها ايه : حببتي بس انا معرفش مكان ماما فين ؟

مليكة بصتلها بغضب : انتي بتكدبي عليا قولتيلي هوديكي لماما وطلعتي بتكدبي وفتحت في العياط..

حنين قربت منها تهديها : حببتي متعيطيش وصدقيني انا مش بكدب انا فعلا معرفش مكانها..
مليكة : طيب ليه قولتي ليا هتوديني ليها لما متعرفيش مكانها انتي كدابة انتي كدابه..
حنين حاولت تقرب منها رافضت وبعدت بعيد عنها ومش راضية تبطل عياط نهائي ..
أمير دخل عليهم وشاف حنين بتحاول تتكلم معاها وتسكتها وهي مش راضية..
سبيها يا حنين وروحي اعملي فطار لينا كل حاجة هتلاقيها موجودة في المطبخ..
حنين بصتلة : طيب وهي هتعمل معاها ايه

أمير : روحي بس جهزي فطار علشان خاطر البنت وانا هتصرف..

حنين : طيب وخرجت وسابتهم..
أمير قرب من مليكة بهدوء بيبصلها بتركيز ومرة واحدة ابتسم ايه ده عيون حبيبة بابي شبة عيوني ..مليكة تلقائي سكتت وبصتلة وعنيهم اتقابلت ..
مليكة : بس انت مش بابي..
أمير ابتسم : لا ابوكي وانتي بنتي واتحرمنت منك ومكنتش اعرف بوجودك
مليكة ببراءه : طيب وبابا شريف..
أمير كز علي انيابة : ده اللي سرقك مني وحرمني من اني اشوفك اضمك لحضني اسمع منك كلمة بابا.

مليكة ببراءه اكتر : بس انت مش جوز ماما ازاي بقي هكون بنتك..

أمير ابتسم بوجع علي براءة بنتة : مين قال اني مكنتش جوزها ..انا ومامتك كنا احلي زوجين عيشنا مع بعض فترة كانت وما زالت احلي فترة في حياتي بس القدر والنصيب فرق بينا واتحرمنا من بعض ..

مليكة : يعني ماما مراتك ومرات بابا شريف كمان ...

أمير : ملك كانت مراتي وبعدين سبنا بعض وهي اتجوزت شريف ده ..وخدوكي مني ..

مليكة سكتت وده شجع أمير انه يقرب منها ..خايفة مني يا مليكة ..

مليكة بصتلة : وهزت دماغها بمعني لا ..وهو ابتسم طيب صدقتي اني ابوكي وكمل ده حتي عيونا شبة بعضها في دليل اكبر من كده ولا انتي ايه رايك كلامي غلط ..

مليكة بصتلة كتير شافت عنيها في عيون أمير غصب عنها ابتمست ...وهنا أمير مستحملش بُعدها وشدها لحضنة ويشم ريحتها ودقات قلبه بدق بعنف يااااه يا مليكة لو تعرفي كنت محتاج لحضنك ده قد ايه حاسس انه اداني عمر فوق عمري ..


مليكة كانت هاديه في حضنه كانت عايزا تقوله انها كمان نفس احساسها وعمر ما شريف ضمها كده ولا حست الاحساس ده ..بعدت عن حضنة.. طيب انا عايزا اكلم ماما ونروحلها انا وانت ونعيش تاني مع بعض كلنا..


أمير خد نفس طويل واتكلم ياريت كان ينفع : بس مينفعش علشان انا وماما مبقناش مع بعض ؟

مليكة : يعني ايه ؟
أمير : يعني انتي عيشتي مع ماما كتير وجه الدور عليا انا بقي تعيشي معايا ..
مليكة بصدمة : بس انا عايزا ماما معايا انا مقدرش اعيش من غير ماما..

أمير : هيكون عندك ماما حنين هتحبيها وتحبك ..

مليكة بعنف وبغضب : بس انا مش هحبها ولا عايزاها انا عايزا مامي ملك مقدرش اعيش من غيرها..

أمير ابتسم : لو سمعتي كلامي وبقيتي شطوره ساعتها بس هجبها تعيش معانا هنا ..هااا قولتي ايه..

مليكة : مش بتكدب عليا زي طنط حنين !

أمير ضيق عنية : هي طنط حنين كدبت عليكي في ايه..

مليكة بحدة : اه كدبت قالت هتوديني لماما ورجعت قالت متعرفش مكانها..
امير ابتسم : بس فعلا متعرفش مكانها ومكدبتش عليكي ..

مليكة : بس قالت هتوديني ودي تعتبر كدبة وانا خلاص مش بحبها..

أمير : طيب وانا بتحبيني ؟؟
مليكة بصتلة وسكتت : انا جعانة ..

أمير بتنهيدة : تعالي نفطر شالها وخرج لقي حنين عملت فطار قعد وخد مليكة علي رجلة وبدا يأكلها في بوقها ...


عند ملك شريف قاعد جنبها بعد ما خدت مهدي واستسلمت للنوم..وكل ما يشوف شكلها يتخنق ويضايق ويتوعد ل أمير ..قام وقف وخرج لرجالتة يزعق ويجبوله أمير بأي تمن ....

في لبنان
حسين بيزعق مع مايا ..كنتي فين وتعرفي الراجل ده منين..
مايا بنفاذ صبر : في ايه يا حسين ده عميل تبع الشركة اللي بتعامل معاها مع عدنان بيه ..
حسين : ايوا وانتي مالك بيه تخرجي معاه بتاع ايه ..وبعدين انا خلاص هلغي الشراكة مع الراجل اللي اسمة عدنان ده راجل سمعته مش مظبوطة ..

مايا شهقت بصدمة : انت بتقول وبعدين انت مينفعش تاخد قرار زي ده من غير علم كل اعضاء مجلس الادارة..ده غير العقد اللي بينا وعليه شرط جزاء قد كده

ايه انت بتقول اي كلام وخلاص..

حسين : انا عارف انا بعمل ايه كويس وحضري نفسك هننزل مصر بكرا..

مايا بغيظ : انت اللي بتجيب اخرتها يا حسين بإيدك .
مليكة وامير خلصوا فطار وطلع كرتونه فيها عروسه جميلة فرحت بيها جدااا
وخدتها وقعدت تلعب معاها ..وأمير بيبص عليها ..حنين قربت منه هتعمل ايه..

أمير نفخ بضيق : مش عارف بس مبسوط انها بتلعب ..

حنين : دي طفله هتلعب شويه وهترجع تسأل تاني علي مامتها ومش هتنسي بسهولة..

أمير : عارف بس هي شويه وهتتعود

حنين : طيب واللي جاي ملك و جوزها مش هيسكتوا وانا خايفة عليك ..

أمير : متخافيش وسبيها علي ربنا المهم خلي بالك انتي من مليكة علشان عندي مشوار مهم ..

حنين : حاضر ..

ركب عربيته وطلع علي طريقة للقاهره وهو في الطريق نزل عمل مكالمة ل تلفون ملك رنه والتانيه ردت عليه الخدامة بتاعتها..وقالتة انها تعبانة ومش قادرة ترد علي حد..


أمير : قوليلها مليكة بنتك عايزا تكلمك..

الخدامة اول ما سمعت الكلام بسرعة ادتها التلفون وقالتلها ان مليكة هتكلمها..
ملك مجرد ما سمعت اسم بنتها خطفت الموبيل بسرعة وبلهفة : مليكة حبيبة ماما .

امير بجمود : انا أمير ومليكة معايا في آمان متخافيش عليها..

ملك بصدمة : أمير انت طيب مليكة معاك بتعمل ايه؟
أمير : مع ابوها يا ملك في نظرك البنت بتكون مع ابوها بتعمل ايه ..مع ابوها اللي حرمتيه منها ..
ملك بعياط : طيب مليكة فين هي كويسه طمني عليها..
أمير : كويسه ولو عايزا تشوفيها تعالي شوفيها بنفسك واطمني عليها بس لو حد يشوف وانتي جايه والا ساعتها مش هتشوفيها مدي الحياه..
ملك : هاجي ولواحدي متخافش ..انتو فين ؟

أمير ادلها العنوان وقعد يستناها ..وهي قامت بسرعه وخرجت غصب عن الامن وركبت عربيتها بسرعة وهي بتسوق بأقصي سرعه ممكنه الامن خرج وراها وكلموا شريف وحكوله اللي حصل واتنرفز عليهم : يعني ايه خرجت ومقدرتوش عليها رجاله انتوا ولا خيال مائته عينكم عليها لحد ما اوصل عندكم انتو فاهمين وابعتلي اللوكيشن بسرعه.


أمير كان قاعد مستني في عربيته وهو بيهز رجليه بعنف وبيفكر في الخطوة اللي هيعملها دي صح ولا غلط قطع تفكيرة ملك وهي بتكلمه وبتقوله انها وصلت المكان وهو مش موجود..

أمير : انزلي من عربيتك هتلاقي تاكسي علي ايدك الشمال في الجنب التاني اركبي فيه..
ملك : من غير ما تسألة جرت ركبت فيه
وتاكسي اتحرك في الطريق المعاكس وبكدة قدر يشتت العربيه اللي كانت وراها......؟؟؟
رواية انهيار قلب للكاتبة وردة الفصل الخامس عشر

التاكسي وصل ملك عند أمير وهي نزلت تهرول للعربية وبلهفة : بنتي فين ؟؟ فين مليكة وديتها فين ..؟


أمير بيصحح كلامها : قصدك بنتي اللي لعبتي عليا لعبة قذرة وحرمتيني منها..

ملك بعصبية : بنتي فين يا أمير وبطل طريقتك واسلوبك ده ومدخلش البنت في الخلافات اللي بينا..

أمير : اللي بينا !! احنا مفيش حاجة بينا غير بنتي واخدتها خلاص وهحرمك منها طول حياتك هخليكي تتعذبي نفس عذابي وتجربي وجع قلبي اللي وجعتهولي..


ملك بصدمة : انت اتجننت عايز تحرمني من بنتي !!

أمير بغضب : ايه الجنان في كده ما انتي سبق وحرمتيني منها وبكل جبروت نسبتيها ل شخص تاني بس خلاص حقي ورجعتة ليا من تاني ...
ملك بعياط : طيب هي فين وديتها فين وديني ليها عايزا اشوفها ..

أمير : تشوفيها !! لا مهو انا جيبك هنا دلوقتي علشان افهمك حاجة عايزك تنسي ان ليكي بنت نهائي علشان خلاص انتهت علاقتك بيها من هنا ورياح وزي ما حرمتيني منها زمان انا هحرمك منها دلوقتي وتشربي من نفس الكاس اللي شربتيني منه وزي ما نسبتيها لأب غير ابوها انا كمان هعمل نفس الشىء وهنسبيها لام غيرك تربيها علي مزاجي انا وبطريقتي انا..


ملك بتبصلة بصدمة : انت بتقول ايه عايز تاخد بنتي مني يا أمير عايز تموتني بقهرتي عليها..

أمير بجمود : بنتي كده كده هخدها سواء بمزاجك او لا ويكفي اني هعدي الموضوع من غير شوشرة ومحاكم ووديكي في ستين داهية بسبب اللي عملتيه ..

ملك بإنهيار : ماشي عارفة ان غلطت في حقك كتير انا مش بنكر ده وبندم علي ده وكنت عايزا اصلح الغلط واقولك اننا عندنا بنت ونكمل حياتنا مع بعض بس انت اللي سبتني رجعت بس علشان نتقم مني.


أمير بسخرية : بقيت انا اللي سبتك دلوقتي وبعدين جايه تصلحي الغلط امتا وبعد ايه تفتكري لما تقوليلي ان عندنا بنت دي كانت هتقربنا من بعض وهتخليني احبك ..انا مش عايز اقولك انا بقيت بكرهك اد ايه وبقرف منك قد ايه .


ملك لسه هتتكلم امير شاورلها تسكت ممكن تسكتي مش عايز اسمع منك حاجة الكلام خلص وملوش لازمة اسمعة لانه مش هيغير حاجة ..دلوقتي انا هخدك عند بنتك مش علشان تشوفيها لا علشان بس تفهميها انها بنتي وتعرفيها الحقيقة كاملة ..


ملك بلهفة : موافقة بس وديني ليها المهم اشوفها..

أمير خد نفس طويل وشغل العربية ومشي وطول الطريق ساكتين تماما....
شريف بعصبية : يعني ايه هربت منكم يا شويه تران هاه حد يفهمني ازاي هربت منكم وبدا يضرب فيهم واحد واحد..

الرجالة : نزلت من عربيتها وركبت تاكسي في الطريق المعاكس لينا وعقبال ما نزلنا علشان نطلع وراها كأنها فص ملح وداب ......


شريف بعصبية : علشان اغبية وقف ياخد نفسه وجواه نار ممكن تحرق كل اللي حوالية اكيد راحتلة ومعاه دلوقتي ذوتها اوي يا أمير مش انا اللي ادخل في حاجة زي دي واخسر فيها كز علي انيابة انا هعرف ازاي اخليك تركع تحت رجلي وتجي تطلب مني السماح ساعتها بس اخلص عليك بنفسي بص علي رجالته باحتقار اسمعوا اللي هقول عليه بالحرف الواحد والمرة دي لو حصل اي غلط صدقوني مش هرحمكم... ...


الرجالة : احنا تحت امرك يا بيه ...

شريف حكي لرجالته اللي هو عايزه يتنفذ والرجالة همت بالتنفيذ ... ثواني وموبيلة رن وكانت مايا رد عليها ..خير ! مش كل شويه هتصدعيني ..
مايا بغضب : انت كمان مش عجبك مش كفايا بحل كل المصايب اللي هنا لواحدي ..

شريف بضيق : اخلصي وقولي في ايه بسرعة علشان مصدع..

مايا بزهق : حسين عامل مشاكل مع عدنان وعايز يلغي الصفقة ومصمم علي كده..

شريف : يعني ايه يلغي الصفقة هو اتجنن ولا ايه ..

مايا : زي ما سمعت وحاولت معاه بكل الطرق وبقي خطر علينا جدا..
شريف بضيق : خلي عدنان يتصرف ويخلص الموضوع من غير شوشرة ..

مايا : ابتسمت وتمتمت في سرها اخيرا هخلص منه عقبال بنتة ...شريف قولتي حاجة..

مايا بسرعة : لا ابدا هبلغ عدنان وهكون معاك بأخر الاخبار ..

شريف : اخبار الصفقة ايه الكمية اللي طلبتها موجودة..

مايا : موجودة وكلة تمام ..
شريف : بلغي عدنان اني مش عايز غلطة ..
مايا : متقلقش طول ما انا موجودة..
شريف بضيق : اما اشوف يلي اسيبك عندي شغل دلوقتي سلام....

أمير وصل بملك الفيلا ..كانت حنين بتحاول تقرب من مليكة وهي رافضة قربها نهائي وزعلانة منها ..

حنين طيب الجميل هيفضل زعلان مني كتير كده..
مليكة .....

حنين : طيب يا ستي حقك عليا متزعليش وتعالي نلعب مع بعض لعبة هتعجبك اوي..

مليكة : بس انا مش عايزا العب معاكي ومش عايزاكي انتي تكوني ماما ..

حنين كانت لسه هترد عليها شافت أمير وملك دخلين عليها اتجمدت مكانها اول ما شافتهم ..وملك جرت علي بنتها خدتها في حضنها وبدأت تبوس في كل حته في وشها وحشتيني اوي يا حبيبة ماما

حنين بصتلهم بصدمة ورجعت بصت علي أمير اللي اتجاهل نظراتها وقرب من مليكة : جبتلك مامتك زي ما وعدتك اهو ياستي يا رب تكوني مبسوطة..
مليكة بفرحة : مبسوطة اوي..

حنين طلعت تجري علي فوق وهي بتمسح دموعها وبتكلم نفسها : يعني ايه هيرجعوا لبعض طيب وانا وكلامه ليا بتاع امبارح ده كان ليه ..

أمير حس بوجع حنين بس هو معندهوش وقت يشرحلها وجهة نظرة بص علي ملك بحدة شوفتي بنتك ياريت تفهمي بنتك بقي انا ابقي مين وشريف يبقي مين ؟؟ ..

مليكة سألتها : صحيح يا ماما ده بيكون بابا الحقيقي وبابا شريف لا..

ملك هزت دماغها بمعني اه
مليكة بزعل : طيب ليه كذبتي عليا وقولتي انه بابا..
ملك : حصلت ظروف هي اللي خلتني اقولك كده ..
مليكة : ظروف ايه دي .

ملك بصت للارض وسكتت... وأمير هو اللي كمل علشان كنت فقير مش غني زي شريف سابتني علشان تعيشك في مستوي عالي هو ده السبب اللي خلاها حرمتني منك وبعدت..


ملك : أمير حرام عليك كفاية..

أمير : لا مش كفايه لازم تعرف الحقيقة كاملة امال انا جيبك هنا ليه جوبي علي بنتك عرفيها مين فينا اللي غلط في حق التاني..

مليكة كانت بتتفرج عليهم بتحاول تفهم بس مش قادرة تستوعب لحد ما أمير شدها لحضنة وشاور بإيدة علي ملك ..امك دي ورتني جميع انواع العذاب علشان ارضيها وفي الاخر سابتني وطلبت الطلاق ومش بس كده عملت تقرير مزور انها اجهضت اللي في بطنها وانا صدقت لحد ما عرفت بالصدفة اني عندي بنت ومكتوبة بإسم راجل غيري انتي يا مليكة بنتي وهما سرقوكي مني حرمنوني من العيشه معاكي احلي ايام حياتي..


مليكة بصت لملك و سألتها : الكلام ده صح يا ماما ..

ملك زادت في العياط وبس ..
مليكة : طول الوقت كنت بسألك ليه بابا شريف مش بيحبني وكنتي بتهربي من سؤالي دلوقت بس فهمت ليه علشان انا مش بنتة ..انا بكرهك اوي يا ماما بكرهك..

ملك بصدمة : مليكة لا افهميني ..

مليكة : حضنت أمير ..بابا مشيها من هنا انا مش عايزاها..
أمير اول ما سمع كلمة بابا غمض عنيه بفرحة وضمها لحضنة اكتر وخدها وطلع بيها علي فوق وساب ملك منهارة من العياط في الارض..
دخل الاوضه عند حنين وعطالها مليكة : ممكن تخليكي جنبها ..

حنين خدتها منه : حاضر..حطتها علي السرير وغطتها كويس وقعدت تلعب في شعرها ..وأمير مراقبها انا هنزل ثواني وراجع حاولي تخليها تنام..حنين هزت دماغها وهو خرج نزل عند ملك اللي كانت مكانها متحركتش بتفتكر شريط حياتها بالكامل افتكرت ازاي خسرت أمير ودلوقتي بنتها


أمير نزل واقف قدامها : مش عارف افرح فيكي ولا ازعل عليكي ..ليه يا ملك ليه عملتي كده ...عملتي كده علشان الفلوس طيب ما انا وعدتك اني هعمل المستحيل علشانك ..


ملك بعصبية : انا اللي وحشه وواحدة زبالة خلاص عرفت وانت ملاك وعملت اللي تقدر عليه علشان تكره بنتي فيا يا رب تكون ارتاحت ..

أمير : مين قال اني مرتاح ؟ انا زعلان علي بنتي فكرك سهل علي طفلة زيها تستحمل كل اللي حصل ده او هي حاسة بيه دلوقتي

ملك : وكل ده بسبب مين مش بسببك !!

أمير : لا يا ملك مش بسببي ...كل اللي حصل في حياتنا بسببك انتي وبسبب طمعك ..ودلوقتي اتفضلي علشان اوصلك مكان ما جبتك ..
ملك بصتلة : مش خايف اقول لشريف علي مكانك..
أمير ابتسم بسخريه : لا مش خايف زمن الخوف خلاص انتهي خافي انتي بس علي نفسك من اللي جاي..

خدتها وصلها وقبل ما تنزل من العربية بصتلة بغضب : مش هتكون اغلي من بنتي يا أمير خليك فاكر الكلمة دي كويس ..قالت كلامها ونزلت وهو ابتسم بوجع وشغل عربية ومشي كلم طلعت وهو في الطريق وبلغة بكل اللي حصل وطلب منه يمشي في اجرأءات اثبات النسب علشان يكتب مليكة بإسمة..

طلعت : انا كلمت المحامي وبدأ في كل حاجة متقلقش.. بس انت المكان بقي خطر عليك دلوقتي ولازم تغيرة ..

أمير : متخافش الفيلا متأمنة كويس ..

طلعت بتنهيدة : براحتك وانا هبعتلك رجالة تانيه كمان ..
ملك دخلت الفيلا والكل اول ما شفوها جريوا عليها يطمنوا شريف كان في المكتب وخرج علي الدوشه لقي ملك جري عليها وخدها في حضنة بس اتفاجي اللي اغمي عليها بين ايديه شالها بسرعة وطلبوا ليها الدكتور علق ليها محاليل ازاي تسبوها من غير اكل مهي لازم يغمي عليها طالما هي بالشكل ده ..

شريف : يا ريت تشوف شغلك وانت ساكت .....

أمير وصل ودخل الفيلا وطلب من الرجالة تفتح عنيها كويس واي حاجة يبلغوة بيها ..وطلع عند حنين لقاها خارجة من الاوضة واول ما شافته مسحت دموعها بسرعة ..قرب منها مليكة نامت..
حنين بصوت مبحوح : ايوه ..
أمير بصلها : كنتي بتعيطي..
حنين بصتلة وبصت للارض وساكتت
أمير : قرب منها وبإيدة رفع وشها وعنيهم اتقابلت مع بعضها ..حنين قلبها بيدق بعنف غمضت عنيها بضعف وأمير بيقرب منها باس عنيها الاتنين وبهمس مش عايز اشوف دمعه واحدة تنزل من عيونك تاني ..حنين قلبها هيخرج من مكانة من لمستة ليها وهو مكمل لحد ما وصل لشفايفها واول ما حس انها متجاوبه معاها شالها وراح بيها علي الاوضه...

شريف جنب ملك بيبصلها وجواه نار مش عارف يطفيها اشمعنا هي بذات اللي حبها عدت عليه الاحلي منها بمراحل ومحدش عرف ياخد مكانها كان نفسه يخلف منها ساعتها بس كانت حياتهم هتكون مستقرة خد نفس طويل افتكر كام مرة ذكرت اسم أمير وهي معاه وكان بيعدي ويسكت علشان ميخسرهاش غمض عنية بضيق ونار مولعة في قلبة مش بتهدأ..

موبيلة رن وكان واحد من رجالة رد عليه : اللي امرت بيه تم يا فندم والامانه موجودة في المخزن الكبير زي ما طلبت..

شريف ابتسم بنصر : تمام انا ثواني وهكون عندك فصل المكالمة يا تري يا أمير لما تعرف اللي انا عملتة هتعمل ايه عايز اشوفك دلوقتي وكمل كلامه بضحكة عالية...؟؟
رواية انهيار قلب للكاتبة وردة الفصل السادس عشر

حنين فتحت عنيها ملقتش أمير جنبها قامت اتعدلت وهي لسه مش مستوعبة اللي هي فيه يا تري ده كان حلم ولا حقيقة ..قامت لبست هدومها وخرجت لقت أمير في اوضة مليكة وخدها في حضنة ونايم ابتسمت علي شكلهم ونوعا ما حست بشوية غيرة من ناحية مليكة ..قفلت الباب عليهم وراحت علي المطبخ تحضر ليهم فطار وهي بتفكر يا تري أمير فعلا حبها وعلشان كده اعتبرها زوجة ليه ولا علشان تكون ام لبنتة وبس.


وهي غرقانة بتفكيرها... أمير واقف مراقبها وهي مش حاسة بوجوده نهائي لحد ما قرب منها وحضنها من ضهرها ...وبهمس صحيتي امتا؟

حنين بخضة ورعشة خفيفة من ضمتة : من شوية وقولت اعمل فطار ..
أمير لفها ليه وعنيهم اتقابلت مع بعضها : واية الريحة اللي تجنن دي ؟
حنين بكسوف بصت للارض : دي كيك بالشكولاتة عملتة علشان مليكة ويارب يعجبها..
أمير ابتسم وبإيده رفعلها وشها لما عنيها اتقابلت مع عنيه : لو طعمها زي ريحتها فاكيد هتعجب مليكة وابو مليكة كمان قرب باس جبينها بوسه طويلة وهي اول ما قرب غمضت عنيها وضربات قلبها بدق بعنف مش عارفة تسيطر عليها..

أمير شافها مغمضة ووشها احمر من الكسوف ابتسم طيب اسيبك تكملي عقبال ما اعمل مكالمة ل مصطفي اطمن علي احوال الشغل.. سابها وخرج وهي تلقائي حطت ايدها علي وشها اللي بيطلع نار وبتحاول تاخد نفسها بالعافيه مش عارفة ..بتحاول تتنفس بصوت عالي علشان تهدي من توترها..

أمير طلع الاوضه وبيدور علي موبيلة لحد ما لقاه بيفتحة مش بيفتح معاه بعرف انه فاصل شحن وبضيق وده وقتك يعني وصلة للشحن وقعد جنية ثواني واول ما فتحة لقي رساله بعدد مكلمات كتيرة من اخته ..اتخض ورن عليها جرس واتنين لحد ما ردت عليه وهي منهارة ..

أمير بلهفة : في ايه يا فرح حد جرالة حاجة ..

فرح بشهقات : زياد يا أمير زياد راح مني.. وكملت عياط..
أمير بلع ريقة بصعوبة : مالة زياد وراح منك ازاي ..
فرح بتتكلم بس امير مش فاهم منها حاجة من عياطها ..
أمير : فرح ابوس ايدك بطلي عياط وفهميني في ايه ولا اقولك اديني سامح
فرح بشهقات عاليه : سامح مش هنا راح يبلغ الشرطة ..

أمير : طيب اقفلي انا هكلمة ..فصل معاها وكلم سامح عرف ان زياد اختفي من النادي ومش لقينة ...طيب انا جايلك متقلقش ...غير هدومة ونزل راح ل حنين ...

امير : حنين انا نازل القاهرة خلي بالك من مليكة وضعها يخوف من امبارح وهي ساكتة ولو حصل ايه حاجة كلميني..
حنين مليكة أمانة معاكي حطيها في عنيكي..
حنين بقلق : طيب فهمني نازل القاهرة ليه حاجه؟
أمير : مفيش وقت اشرحلك حاجة خالو بالكم انتوا من نفسكم كويس ..وقبل حنين ما تتكلم كان هو مشي ..
حنين بخوف : يارب استرها !!

شريف شاف زياد ابتسم هو نايم ليه ..

# من المخدر يا باشا ؟
شريف : بس المفروض يكون فاق ؟
# هديلة ابره وبعدها هيفوق يا باشا
شريف : طيب فوقه عايزو صاحي علشان اسمع صوته لخاله ...
# حاضر يا باشا..
شريف : استني صوره الاول كذا صوره وهو كدا ..

الراجل بتاعة صوره وهو خد الصور يتفرج عليها ويقلب فيها ويبتسم ... خد الصور يوريها ل ملك علشان يفرحها..وصل اوضتها لقاها صاحيه

شريف : عاملة ايه دلوقتي ..
ملك : كويسه..
شريف نفخ بضيق وقعد قصادها : كنتي معاه !
ملك : ايوه ...وشوفت مليكة عندة كملت بعياط انا خسرت بنتي يا شريف..
شريف كز علي انيابة وقام ضمها لحضنة يهديها : بنتك في خلال ساعات هتكون في حضنك وصدقيني المرة دي بجد وهو بنفسة اللي هيجبها لحد عندك هنا ..
ملك بعدت عنه : انت هتعمل ايه ؟

شريف بإبتسامة : انا عملت خلاص وطلع موبيلة وراها الصور ..

ملك بعدم فهم : مين ده ؟
شريف : عرفت بالصدفة انه عندة اخت وده ابنها يعني جاي جاي وساعتها هعرفة مين هو شريف...
ملك بصدمة : انت ازاي تعمل كده الواد ده لازم يرجع ل امة حالا انت ازاي كده لدرجادي معندكش قلب ازاي تدخل طفل ملوش لازمة في حاجة زي كده ..
شريف بعصبية : نعم ياختي والله هو اللي ابتدأ ولا انتي ناسية بنتنا اللي خطفها ...
ملك : بس مليكة بتكون بنتة هو مش بنتك..!

شريف بصدمة : بنتة !! بقت دلوقتي بنته ومش بنتي يا ملك..

ملك : شريف افهم مليكة في الاول وفي الاخر بتكون بنت أمير وخلاص عرف الحقيقه وانا مقدرش احرمها منه و مينفعش انت تروح تخطف عيل وتحرق قلب امة عليه....
شريف كز علي انيابه : يعني ايه ؟! انتي راضيه انه ياخد مليكة وينسبها ليه..
ملك : حقة يا شريف دي بنتة صحيح قلبي محروق عليها بس ده كان غلطي من الاول ..
شريف بجمود قام وقف : انا ماشي
ملك : استني ..علشان خاطري يا شريف ودي الواد ل امة وخرج العيال من اي خلافات بتحصل بينا..
شريف بضيق بصلها ومشي من غير ما ينطق ..

أمير وصل عند اخته وخدها في حضنة يهديها : اهدي يا فرح متقلقيش هيكون كويس ..

فرح بعياط : زياد يا أمير مش هيرجع ليا تاني ..
أمير بغضب : اسكتي يا فرح زياد كويس والشرطة بتشوف شغلها وهيرجع لحضنك بطلي كلامك ده..
نادية جبتلها كوباية عصير تشربها رفضت تشرب وكملت عياط..
امير نفخ بطيق خليكي معاها يا ماما وانا هروخ ل بابا وسامح اشوفهم وصلوا لإيه..
ناديه : ابقي طمني يابني لو فيه جديد..

أمير : حاضر ولسه هيمشي ناديه واقفتة ..فين حنين يا أمير مجبتهاش معاك ليه سبتها لواحدها ؟

أمير : بعدين يا ماما هجيبها سلام دلوقتي.. نزل راح ل سامح اللي كان حاطط دماغة بين ايديه بيأس ..
أمير حط ايده علي كتفة : ايه يا سامح وصلت لايه ..
سامح بحزن : ولا حاجة فريق البحث شغال ولحد دلوقتي مفيش اخبار عنه
أمير : ان شاء الله خير وهيلقوه ..
سامح : ياارب..

شريف قاعد يفكر في كلام ملك ويكز علي انيابة بضيق يا تري ينفذ كلامها ولا هيتصرف من دماغة واخير استقر علي قرار وخلي رجالتة ترجع زياد مكان ما جابوه..

ملك كانت قاعدة علي اعصابة واول ما حست بدخول شريف جرت عليه : عملت ايه ..
شريف سكت شويه وبعدها اتكلم عملت زي ما انتي عايزا ..
ملك ابتسمت : شكرا يا شريف وصدقني الولاد ملهومش ذنب في حاجة..
شريف : طيب ومليكة خلاص استغنيتي عنها ...
ملك : مستغنتش بس حابة احل المشكة من غير خناق ..
شريف : يعني ايه هتروحي تتحيلي عليه وتقوليله ونبي رجعلي بنتي !

ملك : اكيد مش هعمل كده بس اللي انت عملته مش حل ومتنساش لو أمير بلغ عني ورفع قضية اثبات نسب انا ممكن اتسجن ..وندخل في حوارات ملهاش اول من اخر وجريد تكتب وتبقي فضيحة ليك وليا ...دا غير بقي اهم حاجة نفسية مليكة اللي هتتأثر بكل المشاكل دي..

شريف : تمام اعملي اللي يريحك يا ملك واللي انتي شيفاه صح بعد اذنك داخل انام علشان تعبان..

ملك : اتفضل ...طلعت برا الجنينه تتمشي وتفكر هتعمل ايه هي مش هتستحمل فكرة ان بنتها واحدة غيرها تربيها وفي نفس الوقت عايزه تعدي الامور من غير مشاكل علشان متخسرش أمير تاني وانه لازم يرجعلها بأي تمن وانه من حقها هي مش حد تاني بعد تفكير كتير كلمت شخص تعرفة وطلبت منه حجز تذكرتين سفر ليها هي مليكة في اقرب فرصة ..


الشخص : بس كده انتي تؤمري ..

ملك : متشكرة جداا لذوقك بس ليا طلب كمان مش عايزا اي حد يعرف بمعاد السفر وبالاخص شريف..
الشخص : اكيد طبعا فاهم !
ملك فصلت المكالمة وهي مبسوطة...

رجالة شريف رمت زياد من العربية قدام النادي وهربت والناس شافت اللي حصل جرت علي الواد تشوفة والشرطة راحت علي اللمة وعرفت انه نفس موصفات الطفل اللي بيدورو علية وبلغت وونقلوة المستشفي سامح كلم فرح وراحوا كلهم علي المشتشفي وهناك فرح خدت زياد في حضنها وبتعيط وتحمد ربنا انه رجع ليها بخير وسلامة ..


أمير غمض عنيه بفرحة وحضن سامح وبعد اجرأءات كتيرة رواحوا علي البيت

وفرح حاضنة ابنها وبتعيط ..
فخر الدين : خلاص بقي يا فرح ابنك في حضنك احمدي ربنا..
فرخ : غصب عني يا بابا كنت خايفة ميرجعش ليا تاني..
ناديه : وليه يابنتي التشاؤم ده بس الحمد لله عدت علي خير..
أمير قرب من فرح : حمدلله علي سلامتة يا حببتي ومعلش لازم امشي انا سايب حنين لواحدها ...
نادية : انتي ليه مجبتهاش معاك نفسي افهم..

أمير : بكرا تفهمي يا ماما يلا سلام..

ناديه : مشت واره أمير انت فيه حاجة مخبيها علينا حنين كويسه ...
أمير : مفيش يا ماما بس حابين نكون لوحدنا بس مش اكتر
ناديه بعدم تصديق : ماشي يا أمير براحتك...

أمير باس دماغها ونزل ركب عربيته وراح عند حنين و بنتة وهو بيفكر في كل اللي حصل النهاردة مع زياد مكنش منطقي واختفائه كان فيه غموض ..وصل الفيلا لقي طلعت قاعد مع حنين وسمع صوت ضحكة حنين كز علي انيابة دخل وعنيه كلها شرار..السلام عليكم..

طعلت وعليكم السلام : ايه ياعم كل ده تأخير ..
أمير بيتكلم وعينة علي حنين بيبصلها بطريقة كلها غضب : معلش ظروف هز دماغة ل حنين فين مليكة ..
حنين بخوف من نظراته : نايمة ..
أمير : طيب اطلعي عندها ..

حنين : حاضر ..

طلعت ضحك : في ايه بتعملها كده ليه احرجتها علي فكرة..
أمير خد نفس طويل :عادي اقعد انت ومتشغلش بالك ..
طلعت بتنهيدة : طيب زياد كويس..
أمير : الحمد لله ...جعان اخلي حنين تعمل عشاء ..
طلعت : لا حنين جابت كيك كان جميل بصراحة وأكلت منه كتير قبل ما تيجي..
أمير ابتسم ابتسامة باهتة : اها كويس ..
طلعت : انا زودت عدد الرجاله ودلوقتي مفيش مخلوق يقدر يقرب من الفيلا..وكمان بخصوص ورق اثبات مليكة المحامي هيكلمك وهيتابع معاك ودلوقتي بقي اقدر امشي ..

أمير : متشكر يا طلعت علي تعبك معايا النهاردة ووجودك مكاني النهاردة ..

طلعت بتنهيدة هتشكرني تاني : طيب هقوم انا بقي علشان متأخرش ..
أمير خليك قاعد شويه..
طلعت : لا ملوش لازوم اسيبك انت مع عيلتك.....أمير وصله للعربية لحد ما مشي وبعدها طلع عن مليكة يطمن عليها لقاها نايمة بص لحنين هي نايمة من امتا..
حنين : بعد العصر بشوية ..

امير بخوف عليها من نومها الكتير قرب منها باسها بحب وقام وقف مسك ايد حنين بحدة وخدها علي اوضتهم ..

حنين بوجع من مسكتة : في ايه يا أمير ..
أمير بعصبية : المفروض اسألك انا واقولك في ايه وليه طلعتي تقعدي مع راجل غريب وكمان تضحكي وتعلي صوتك بالشكل ده ..
حنين : بس طلعت مش غريب ..

أمير الكلمة نرفزتة بزيادة : اتكلم بحده ومين انتي علشان تقولي غريب ولا قريب هاه ردي ..اظهار انكم كلكم زي بعض وفصيلة واحدة وانا اللي فكرتك غير..

قال كلامة وخرج وسابها راح نام جنب مليكة والغضب والغيرة هيجننوه ..
حنين بصدمة رمت نفسها علي السرير واتفتحت في العياط هي معملتش حاجة تستاهل اللي هو عملة ده ليه دايما شايفها وحشة اوي كده ...

الصبح ملك صحت علي خبر كان اكبر صدمة ليها وهي وفاته حسين بحادثة قضاء وقدر مكنتش مصدقة الخبر يعني ايه ...

شريف بيمثل الزعل : البقاء لله يا حببتي وشدي حيلك ..
ملك : شريف اكيد الخبر ده مش صح ودي كدبه من الاعلام قول ان كلامي صح ..
شريف: للاسف الخبر صح...
ملك حست بدوران لا مش صح اكيد في حاجة غلط فضلت تقرر الكلام لحد ما اغمي عليها وشريف جري شالها وطلب ليها الدكتور ...
وراح يكلم مايا يعرف منها الاخبار ..
مايا : متقلقش عدنان خلص كل حاجة ..

وزي ما انت شوفت كده قضاء وقدر..

شريف : طيب البضاعة جاهزة انا عايز منها كمية اليومين دول ..
مايا : هبلغ عندنان وهرد عليك..
شريف شاف الدكتور خارج : طيب اقفلي وهكلمك بعدين ..راح عليه هااا يا دكتور ايه الاخبار ؟؟
الدكتور : انا دلوقتي بس فهمت سبب الاغماء الكتير عند مدام ملك وبإبتسامة
المدام حامل..

شريف فتح بوقه من الصدمة : حامل ازاي وامتا ..

الدكتور : هو ايه اللي ازاي بقولك حامل المفروض تفرح ...المهم قبل ما انسي هات ليها الادويه دي ضروري وابقي خليها تتابع مع دكتور نساء كويس..ولسه الدكتور هيمشي شريف مسكة من ياقته تعالي هنا انت متاكد من الكلام اللي قولتة ده ..
الدكتور بصدمة : ازاي تمسكني بطريقة دي انت اتجننت ..
شريف بعصبية : انت لسه شوفت جنان انتطق اتكلم ..
الدكتور : ايوا صح وتقدر تتأكد بنفسك لما تعمل تحليل دم .

شريف وقف مصدوم حامل ازاي ومن مين خطر علي بالة أمير اتجنن ودخل علي ملك وهو عفريته طالعة ..

شدها وقفها قدامة وبعين كلها شر خونتيني معاه يا ملك وفاكرة اني مش هعرف..
ملك بتعب : انت بتقول ايه ؟
شريف : بقول انك طلعتي حامل عارفة يعني ايه حامل يا ملك حامل وانا مبخلفش خونتيني معاه وانتي لسه علي زمتي مصبرتيش حتي لما تتطلقي ...
ملك : انت اتجننت يا شريف خاينه ايه وقرف ايه اللي بتتكلم عنها ابعد عني مش ناقصة جنان ..

شريف : انا بقي هوريكي الجنان اللي بجد وبدا يضرب فيها ضرب موت علشان كده راضيتي تسيبي بنتك عنده طلعتي متفقة معاه وانا اللي قاتل نفسي عليكي لا انا بقي هموتك انتي واللي في بطنك علشان ارتاح منك ..

ملك خلاص خلصت في ايده وبدأت تنزف والدم غرق كل هدومها وهو شاف منظرها والدم اللي بقي مغرق المكان اتصدم ورجع خطوة للوراء بخوف....؟؟
رواية انهيار قلب للكاتبة وردة الفصل السابع عشر

عربية الاسعاف وصلت المستشفي ونزلت منها ملك وحاله من الهرج والمرج والممرضه بتصرخ بأعلي صوتها بسرعه المريضه هتموت مننا ..شريف كان معاهم ومصدوم من المنظر ..شاف دكتور حازم جاي يجري وبيدخل العمليات مسكة من هدومة وبدموع اول مرة حازم يشوفها : مش عايزها تموت انت فاهم ..


شريف بضيق منه : ربنا يستر وتعدي علي خير بعد اذنك...قال كلامة ودخل اوضة العمليات يشوف شغلة..

شريف غمض عنيه وسند نفسه علي الحيطة وهو بيلعن نفسه وغبائه وجعة منها خلاه نفسه يقتلها بس في نفس الوقت قلبه ميقدرش يعيش من غيرها...
ليه عملتي كده فيا يا ملك ذنبي اني حبيتك عارف اني غلط وعملت حاجات كتير غلط في حياتي حتي جوازي منك كان بطريقة غلط بس كله مكنش بإيدي حبك في قلبي خارج كل ايرادتي...

ممرضه خرجت تجري بسرعه وهو وقف بقلق مش فاهم اللي بيحصل ثواني ورجعت معاها دكتور تاني ودخلت العمليات وقبل ما تدخل الاوضه شريف مسكها من ايدها ملك مالها مراتي مالها..

الممرضة : ربنا يستر ادعيلها ..وسابته ودخلت وهو الدنيا اسودت في شه من تاني...،،

أمير : مالك يا مليكة فيكي ايه ...

مليكة : .....
أمير اتصنع الزعل : مش عايزا تردي علي بابا طيب ليه مين زعلك ...انا زعلت في حاجة..
مليكة : .....
أمير خد نفس طويل يهدي بيه نفسه : طيب قولي ايه اللي يريحك وانا وعد مني اعمله عايزا تروحي عن ماما قومي معايا وانا اوديكي..
مليكة : لا مش عايزا اروح ..
أمير بتنهيدة : امال مالك ساكتة ليه ؟
مليكة : مش حابة اتكلم ..

أمير ابتسم : طيب مش عايزا تتعرفي علي جدو وتيتا وعمتو كمان ..

مليكة بصتلة : مين دول ؟
أمير : دول اهلي انا بابا وماما واختي ..دول الجزء التاني من عيلتك..
وكمان فرح عندها عمر وزياد هيفرحوا بيكي اوي لما يشوفوكي..
مليكة ابتسمت : يعني هو احنا ينفع نخرج من هنا اصل طنط حنين قالت مينفعش ولو خرجنا من هنا هنموت..
أمير شدها لحضنة : بعد الشر عليكي يا حببتي لا طبعا الكلام ده غلط ..وبصوت واطي حسابك معايا يا حنين ده كلام تقوليه للبنت..باسها من خدها وعلشان اثبتلك ان كلام حنين غلط هاخدت دلوقتي ونخرج نروح الملاهي واخر النهار هوديكي عند جدو وتيتا هاه قولتي ايه..

مليكة بفرحة : قولت موافقة طبعا..

أمير ضحك : طيب تحبي تأكلي ايه...
مليكة : اممممم مكرونه بالبشامل تعرف تعملها..
أمير ضحك : هو انا بعرف اعمل غيرها تعالي تعالي انتي جيتي في ملعبي ..
وطي شالها راحوا علي المطبخ وهما بيضحكوا مع بعض ..
أمير بصلها ايه رايك تساعديني ..
مليكة بإستغراب : اساعدك ازاي ؟؟

أمير ابتسم : انا هقولك تعالي الاول هلبسك دي..

مليكة : ايه دي ؟
أمير : دي يا ستي علشان هدومك تفضل نضيفة ..
مليكة بحماس : اوكية يلا نبدأ..
أمير : يلا بينا ..بدأ يجهز البشامل ومليكة بتساعدة حنين نزلت علي صوت ضحكهم وهزارهم مع بعضهم وواقفت تراقبهم من بعيد ..
أمير ابتسم : ايه رايك بقي في عمايل بابي انفع ...
مليكة : تنفع ايه دانتا طلعت اشطر من الداده فاطمة بكتير ..وكملت كلامها بضحك عليه..

أمير بصلها واكتشف ان ضحكتها شبة مامتها كتير وحس ان اللي قدمة دي ملك بكل تفاصيلها ونسخة منها..

مليكة شافت ملامح امير اتبدلت بطلت ضحك : بابا انت زعلت مني علشان بقول عليك زي داده فاطمة ! انا آسفة مكنش قصدي...
أمير خدها في حضنة : لا يا قلبي مزعلتش حد يزعل من روحة بردو ..
مليكة ابتسمت وباستة من خدة : طيب ايه عايزا ادوق المكرونه قدامها كتير ..
أمير ابتسم : لا خلاص ثواني بس .
حنين هنا قررت تدخل : صباح الخير ..
أمير من غير ما يبصلها : صباح النور..
حنين : محتاج مساعدة في حاجة ..
أمير : متشكر ..

مليكة : بابا بعد اذنك هطلع اجيب العروسه بتاعتي علشان تأكل معايا هى كمان..

أمير : ماشي حببتي ..
مليكة مشت وحنين قربت منه ..أمير أنا اسفة ..
أمير كان عطيلها ضهرة وماسك السكينه وبيقطع السلطة ..حط السكينة من ايدة ولف بصلها : آسفة علي ايه بالظبط ..
حنين : علي اي حاجة زعلتك مني واي تصرف زعلك ..

أمير بحدة : انتي كل تصرفاتك غلط حتي البنت مش عارفة تحتويها سيباها لواحدها ونازلة تضيفي الناس ودوقيهم عمايل ايدك علشان تسمعي كلمة ترضي بيها غرورك وتضحكي علشان تزفيتيها اكتر واكتر ..

حنين بصدمة : أمير انت بتقول ايه ؟
أمير : بقول اللي حصل مش هو ده اللي حصل بردو ..
حنين : لا طبعا كل الحكايه لما شوفته قاعد في التراس لواحدة قولت اعملة كوبايه قهوة يشربها وطلعت معاها طبق كيك من بابا الواجب والذوق..
أمير بعصبية : مش عايزو أنا الواجب والذوق ده من حضرتك انا كل اللي طالبة منك تشوفي بنتي وطلباتها وبس مش تسبيها خايفة بسبب كلامك ليها وتنزلي تعملي الواجب والذوق بتاعك..

حنين بإستغراب : كلام ايه ده اللي قولته ليها خلاها تخاف..

أمير : والله اسألي نفسك وشوفي انتي قولتي ايه وهي هتقولك..
حنين : انا مقولتش حاجة ..
أمير بزهق : طيب خلاص مقولتيش انا آسف انا غلطانك كويس كده !!
حنين بصتلة بغضب ولسه هتمشي صوته وقفها : حضري نفسك علشان هنمشي علي هنا..
حنين من غير ما تبصلة مشت وهي مخنوقة بالعياط طلعت علي فوق ومليكة كانت نازله واول ما شافتها ابتسمت بخبث ونزلت تجري عند أمير ....

وقت كتير عدا وملك لسه جوة في اوضة العمليات وشريف برا هيتجنن لحد ما خلاص فقط السيطرة علي اعصابة وفضل يخبط علي الباب بهستريه حازم خرج وبيحاول يهديه ..شريف اهدي مينفعش كده..

شريف بلهفة : ملك كويسة طمني عليها هتعيش..
حازم بتعب : هي كويسه اطمن
شريف خد نفسه وبصلة : طيب عايز اشوفها..
حازم بجمود : تشوف ايه مينفعش ملك صحيح عايشه بس ..
شريف بلع ريقة بصعوبة : بس ايه كمل..
حازم بضيق : محدش عاقل يعمل اللي انت عملته ده ملك كانت جاية خلصانة دمها متصفي يعني لو عدا ٤٨ ساعه الجاين دول بخير ساعتها بس اقدر اقولك انها ممكن تعيش..

شريف : يعني ايه ؟

حازم : يعني هي دلوقتي بين ايدين ربنا العمليه مكنتش سهلة واطريت اشيل الرحم علشان اسيطر علي النزيف وحاليا في العنايه لحد ما مرحلة الخطر تعدي ... اللي نفسي افهم انت ليه عملت كده ليه تخسر ابنك بإيدك..
شريف بعصبية : مكنش ابني انا مبخلفش وانت اكتر واحد عارف كده كويس...
حازم : وعرفت منين انه مش ابنك ؟
شريف بعصبية : انت مبتفهمش ما انت عارف اني مش بزفت بخلف..
حازم : بس ماشي علي العلاج لسه صح

شريف : ايوة بس انت قولت ان العلاج ده بس علشان يكون في امل اعمل طفل أنبيب ...

حازم : واهو الحمل حصل من غير عملية وانت ضيعته بغبائك ومش بس كده انت ضيعت فرصة حمل لملك نهائي وخلتها بين الحياه والموت ..
شريف بغضب اكتر : بقولك مش ابني ..
حازم : ماشي يا شريف هتاكد بنفسي من النقطة دي بس جهز نفسك بقي لو طلع كلامي صح للي هيحصل بعد كده ..قال كلامة وسابة ومشي وهو حط دماغة بين ايدية مستحيل يكون ابني ايوة انا متاكد ....

مايا خلصت اجرأءت نقل جسمان حسين للقاهرة بتكلم شريف مابيردوش عليها وده كان هيجننها الاجراءت في المطار مكنتش سهلة عليها زي ما كانت متخيلة وشريف مش موجود معاها ..لحد ما بصعوبة قدرت تخرج من المطار ومنها علي المدافن بحراسة مشدده ...

وبعد ما خلصت الدفن روحت علي بيت شريف وهي كلها غضب وشر واول ما وصلت بلغوها باللي حصل مع ملك ..
مايا بفرحة : يعني ماتت ولا لسه
فاطمة بصتلها بغضب : بعد الشر عليها ان شاء الله هتكون كويسة ..
مايا ابتسمت وطلعت علي المستشفي تعرف الاخبار بنفسها وهي في الطريق كلمت الرجالة البطاعة موجودة في المدافن عايزة مراقبة للمدافن ٢٤ ساعة لحد ما نشوف الوقت المناسب ونخرجها مفهوم..
## مفهوم يا فندم..

وصلت المستشفي وهي عندها أمل تكون ملك حصلت ابوها ساعتها هتكون كل حاجة ليها املاكهم وكمان شريف ..وصلت شافت شريف قاعد قدام اوضة العناية وملامح وشة متبدلة وشكلة يغني عن اي سؤال..قربت منة وحطت ايدها علي كتفة : شريف ..

شريف لف بصلها : انتي ايه اللي جابك هنا وعرفتي منين اصلا اني هنا ..
مايا : روحت علي البيت عندك وعرفت انك هنا من الدكتور حازم لما كلمتة ..ايه اللي حصل ل ملك..
شريف بجمود : معرفش وياريت لو سمحتي تتفضلي مش عايز اتكلم مع حد ولا اشوف حد ..
مايا : بس انا مش اي حد ..

شريف بعصبية : وانا بقولك مش عايز حد انتي ايه مبتفهميش ..

مايا بتنهيدة : ماشي يا شريف انا همشي بس حبيت ابلغك ان البضاعة وصلت وعايزا تتوزع شوف هتفوق امتا علشان نتابع شغلنا... قالت كلامها ومشت علي الدكتور تفهم منه ايه اللي حصل بالظبط.

أمير وصل بيت اهلة وهو مش عارف مدي صدمة اهلة هتكون ايه لما يشوفوا مليكة ..نزلوا من العربية ومليكة اتشعلقت في رقبتة وحنين وراء منهم متغاظة حاسة انها بتعبد عن أمير مش بتقرب والسبب مليكة ولازم تشوف معاها حل ..أمير رن جرس الباب وناديه فتحت وتفأجت بأمير وهو شايل مليكة وبيقولها سلمي علي تيته نادية يا ملوكه ..

نادية بعدم فهم : مين دي يا أمير ؟
أمير : بنتي يا ماما ..
نادية شهقت بصدمة : بنتك ازاي وامتي بصت علي حنين اللي متابعة في صمت ..في ايه فهمينوا ..
أمير : بابا فين وفرح وسامح والاولاد؟

ناديه : متغيرش الكلام وفهمني الاول دي تبقي مين ؟

أمير : بنتي يا ماما مليكة بنتي من ملك..
نادية وقفت فتحت بوقها من الصدمة ..وأمير فهمها كل اللي حصل وازاي عرف وهي بتسمعه دموعها علي خدها وعنيها علي مليكة اللي حستها نسخة من أمير ..يعني انا عندي حفيدة ومحرومه منها كل ده ..تعالي في حضن تيتيه يا قلبي ..مليكة كانت خايفة وفي نفس الوقت حست بحنان نادية قربت منها ودفنت نفسها في حضنها ..وامير ابتسم من قلبة مليكة قدرت تغير حياته للفرح والسعادة ...الكل اول ما شاف مليكة انصدم نفس صدمة نادية وفخرالدين زعل من سلبية ابنه وانه كان لازم ياخد حقة بسبب اللي عملوه فيه..

أمير بتنهيدة : انا سايب حقي لربنا هيخلصة منهم يابابا انا اهم شخص عندي دلوقتي هي بنتي وبس ..

حنين اول ما سمعت كلامة اضايقت ونار الغيرة اشتعلت في قلبها اكتر..
مليكة انشغلت مع ولاد فرح وقعدت تلعب معاهم وحنين وناديه قاموا يحضروا العشاء..
نادية بتتكلم كتير وحنين بتسمع وبس وبتكتفي بهز دماغة ..
ناديه بإستغراب : مالك يا حنين انتي مش مبسوطة بوجود مليكة في حياة أمير ..
حنين بتنهيدة : بالعكس كنت فرحانة جداا بس ..
نادية : بس ايه؟

حنين : بس أمير مبقاش شايفني كل اللي حسيتة انه عايزني اكون داده ليها وبس وقربه مني علشانها هي مش علشان بيحبني او عايزني جنبة

ناديه : ودي فيها ايه وليه اصلا تحسبيها كده ...هقولها ليكي نصيحة يا حنين وجود مليكة بينكم هيفرق جدااا وانتي وشطارتك كل ما هتحبيها أمير هيحبك وهيشيلك من علي الارض شيل قربي من مليكة حبيها خليها تحبك اكتر ما هتحب ابوها نفسة ساعدتها بس مش هيكون في اي مشاكل بينكم...
حنين : ربنا يسهل ..

نادية بإبتسامة : هاخد مليكة نام معايا اليلة حاولي انتي بقي تلطفي الجو بينكم وخليكي واعية وفهمية ان هو وبنتة رقم واحد في حياتك وانك هتعملي كل اللي هتقدري علية علشان تشوفيهم مبسوطين...

حنين : ودي الحقيقة انا نفسي في الاستقرار وبس واني اقدر اسعد أمير في حياته...
نادية : شوفتي اديكي قولتي أمير بس ونسيتي بنتة ...معلش عارفة انها هتكون مسؤليه عليكي بس انتي قدها يا حنين ..
العشاء جهز وقعدوا كلهم يأكلوا في وسط لمة عجبت مليكة جدا ...واخر اليل نادية اصرت انها تخليها تنام معاها وامير وافق ...سابها ودخل اوضتة لقي حنين لبسه لبس مغري وواقفة بتسرح شعرها قدام المريه اتجاهلها وراح ياخد هدومة من الدولاب راحت وراه وحصرته بإيدها ..هتفضل متجهلني كده كتير ..
أمير بصلها كتير : عادي مش تجاهل ..

حنين : امال تسميه ايه اللي انت بتعمله ده..

أمير بتفكير : ممكن اسميه عقاب مثلا..
حنين كشرت : طيب أنا اتأسف ولسه بردو العقاب مستمر..
أمير بيحاول ميضعفش قدامها بس مقدرش ريحتها وشكلها غصب عنة سحبتة ليها فلقي نفسه بيقرب منها : اه مستمر بس بطريقة تانيه .....!!!
عدا ٤٨ ساعة وملك لسه نايمة زي ما هي مفيش اي تغير نهائي ..شريف اتحايل علي الممرضة يدخل يشوفها دقيقتين بس وبعد محايلة منه وافقت تدخلة ..
الممرضه : استني البس دول الاول علشان تدخل بيهم ..

شريف : لبس ودخل شافها بين الاجهزة والخرطيم قلبة وجعه عليها ومقدرش يمنع دموعه من النزول ازاي قدر يعمل فيها كده ازاي وهو عمل المستحيل علشان تكون ملكة هو ..قرب مسك ايدها وباسها وبهمس أنا آسف سامحيني معرفش انا عملت كده ازاي عارف اني غبي ومتخلف كمان بس كل ده بسبب حبي ليكي وغيرتي عليكي ملك انا بعشقك مش بس بحبك انا معاكي اتخطيت الحب من زمان ..وهو بيتكلم سمع اخر صوت كان يتوقعة صوت الجهاز وهو بيعلن عن النهاية ...اتنفض بخوف ملك لا يا ملك متسبنيش لا يا ملك انا مقدرش اعيش من غيرك .....؟؟
رواية انهيار قلب للكاتبة وردة الفصل الثامن عشر

شريف اول ما سمع صوت الجهار بيصفر وبيعلن عن نهاية حياة ملك.. اتجنن وبص لملك وبيهزها بهستريه : لا يا ملك اوعي تسبيني اوعي يا ملك انا مقدرش اعيش من غيرك....

الممرضه دخلت بسرعة وطلبت الدكتور وشدت شريف طلعته برا..

شريف بزعر وخوف طلع وفضل يراقب حازم وهو بيعملها صدمات كهربه يمكن قلبها يستجاب للحياه تاني بس للاسف ملك رفضت الاستجابة وفارقة الحياه وللابد ..

شريف اول ما شاف الممرضه غطت وش ملك اتجنن ودخل علي حازم مسك فيه : انت غطيت وشها ليه ملك لسه عايشه..
حازم بحزن : شد حيلك يا شريف خلاص عمرها انتهي..

شريف صرخ صرخة هزت كل المستشفي : لا يا حازم حاول تاني مستحيل ملك تموت وتسبني بص علي ملك وجري كشف الغطاء من علي وشها اصحي يا ملك متعقبنيش العقاب ده اصحي خدي حقك مني اضربني اعملي اي حاجة بس متبعديش عني فضل يهز فيها بهسترية قومي يا ملك مش هسمحلك تسبيني انتي فاهمة

حازم شده حرام عليك بقي ارحمها كفايا كده ملك خلاص ماتت يا شريف فوق بقي....

شريف بصلة بصدمة : أنا اللي موتها صح انا قتلتها بإيدي ..

حازم علشان يعرف يسكتة عطاله حقنه مهدئه وخلتة راح في دنيا تانيه...

أمير صحي من نومه وهو بيص عرق وضربات قلبة سريعة غير العادي حاول يقوم ياخد دواءه معرفش حس بخمول في كل جسمة وكأن روحة بتتسحب منه بدا ياخد نفسه بإنتظام نادي بصوت واطي علي حنين ..

حنين قامت مخضوضة من شكلة : مالك ايه اللي تعبك..
أمير : متخافيش مفيش حاجة بس ممكن تجبيلي الدواء
حنين قامت بسرعة جابت ميه والدواء وساندتة يقعد علشان يعرف ياخد الدواء وعنيها بتلمع بالدموع من خوفها عليه
أمير خد الدواء وبيعمل شهيق وزفير علشان ضربات قلبة تنتظم ..شاف دموع حنين ضغط علي ايدها يطمنها وبصوت واطي : متخافيش انا كويس ..
حنين : انا السبب مش كده مكنش ينفع اتعبك اوي كده..

أمير : اشششش انتي مش السبب في حاجة وانا كويس بس ممكن اطلب منك طلب ..هتيلي مليكة عايزها في حضني ممكن..

حنين : بس هينفع اقلق ماما في وقت زي ده ؟
أمير : معرفش اتصرفي !!
حنين : لو وجودها هيريحك هتصرف اكيد ..قامت لبست هدومها وطلعت خبطت خبطة خفيفة علي اوضة نادية ..
وناديه قامت فتحت ليها الباب
حنين ..معلش يا ماما لو كنت قلقت نومك ..
ناديه : لا يا حببتي انا اصلا كنت صاحية علشان صلاه الفجر خلاص اهيه ..خير يا حببتي في حاجة؟

حنين : أمير عايز مليكة تكمل نوم في حضنة ممكن اخدها..

ناديه ابتسمت : اكيد طبعا استني هجبهالك ... دخلت شالت مليكة وعطتهالها ...حنين ..تسلمي يا ماما خدتها ودخلت بيها عند أمير اللي قعد يبوس فيها بطريقة غريبه وبعدها ضمها لحضنة ونام وكأنه خايف انه تضيع منه..
حنين فضلت مراقباه وهي خايفة لو في يوم جراله حاجة وسابها ازاي هتعيش من غيرة بعد ما صدقت انه بقي ملكها..
الفجر أذن قامت تتوضي وتصلي وتدعي ربنا يحفظة من كل شر....،،

شريف فاق وبقي زي المجنون وبيصرخ زي العيل الصغير اللي فقد امة ..ومش مصدق اللي حصل واللي هو عملة بإيدة

حازم مسكة وبعصبية : كفايا بقي يا شريف مش وقت ضعف منك دلوقتي او لوم لنفسك وافهمني في اللي هقوله علشان متروحش في ستين داهيه انا كتبت في التقرير انها كانت حامل ووقعت وحصل نزيف حاد ادي لسقوط الرحم والوفاه ...مش عايز تنطق كلمة انك مديت ايدك عليها علشان متدخلش في س وج انت فاهم ...
شريف سكت وبصلة وبدموع بتهدد بالنزول : طلع ابني مش كده ؟؟

حازم نفخ بضيق : خلاص اللي حصل حصل ومبقاش يفرق خلاص ملك ماتت ..

شريف بعصبية : وانا عايز اعرف !
حازم غمض عنية شويه ورجع بصلة بترقب : مش ابنك يا شريف ارتاحت كده وانسي خلاص هي ماتت وراحت عند اللي خلقها انساها هي متستهلش تعمل كل اللي انت بعملة في نفسك ده علشانها ؟
شريف حس بوجع رهيب في قلبة يعني خانتة وعملت نفس اللي هو عملة فيها كز علي انيابة بضيق ..
حازم : ودلوقتي لازم تفوق علشان نلم الموضوع بدل ما يكبر وتسلم مراتك علشان تدفنها ..شده من ايده وخلاها مضي علي استلام الجثة مع تصريح بالدفن ...
مليكة صحت لقت نفسها في حضن بابها ابتسمت وباستة من خدة ..

أمير اول ماحس بلمستها فتح عنيه ..

مليكة بضحكة شقلبت حالة : صباح الخير يا بابي ..
أمير قام اتعدل : احلي صباح الخير دي ولا ايه ومسكها يزغزغ فيها وهي تضحك
بصوت عالي ..خلاص بقي يا بابي هموت من الضحك..
أمير ضمها لحضنة : بعد الشر عليكي يا قلب بابي لو تعرفي يا مليكة بحب ضحكتك دي اد ايه بحس انها بتديني طاقه للحياه بطعم ولون تاني..
مليكة : اشمعنا ضحكتي يعني ؟

أمير بتلقائية : علشان كلها ضحكة مامتك..

حياه كانت داخلة وسمعت جملتة الاخيره اتصدمت ووشها جاب الوان بس حاولت تكون طبعية : صباح الخير ..
أمير : صباح النور
حنين قربت منه : عامل ايه دلوقتي ؟
أمير : الحمد لله كويس بكتير..
حنين : الحمد لله بصت لمليكة يلا تعالي معايا علشان تاخدي دوش واعملك تسريحة لشعرك جميلة ؟
مليكة مسكت في رقبة باباها : لا انا حابة اقعد مع بابا شويه
أمير باسها من خدها وبص لحنين : سبيها وحضري فطار علشان جعان ممكن ..
حنين ابتسمت : عيوني..

مليكة بصت لحنين بضيق وهي خارجة وكلمت بابها.. هي ليه قالت عيوني يعني احنا هناكول عنيها مثلا...

أمير ضحك علي كلامها : لا هي قصدها حاضر يعني...
مليكة : امممم...
موبيل أمير رن وقام يشوف مين لقاه مصطفي ابتسم ورد عليه : معلش يا صاحبي عارف اني مقصر معاك الايام دي..
مصطفي : انت فين يا أمير روحتلك الفيلا ملقتش حد فيها..
أمير : انا روحت بيتي عادي وهعيش حياتي ومش هخاف من حد !
مصطفي بتنهيدة : طيب عرفت الاخبار الجديده..
أمير : اخبار ايه ؟

مصطفي سكت شوية : ملك وابوها ماتوا!!

أمير بصدمة بص لبنتة ووطي صوته : انت بتقول ايه يا مصطفي انت اتجننت
مصطفي : للاسف ده اللي حصل واللي سمعته..خد نفس طويل
وكمان دفتة ملك كانت من شويه ..
أمير بعصبية : اسكت يا مصطفي واقفل مش عايز اسمع من تخريفك دي حاجة ..
مصطفي : مش تخريف يا أمير ده اللي حصل انا مكنتش مصدق زيك كده بس دي الحقيقة ..
أمير انهار علي اقرب كرسي : ماتوا ازاي ؟

مصطفي : معرفش تفاصيل بس بعت رجاله تبعي تعرف ايه الاخبار ..

أمير بجمود فصل الخط وعنية علي بنتة
اللي بتلعب قدامة ومرة واحده قام لبس هدومة وطلب من حنين تاخد بالها من مليكة علشان نازل لشغل ضروري ..
حنين : طيب انت تعبان كنت استنيت النهاردة في البيت..
أمير : خدت دوايا وكويس الحمد لله قال كلامة ومشي وهو بيحاول ميضعفش ودموعة تخونه في اي للحظة ركب عربيتة وطلع علي بيت شريف راقبة من بعيد شاف ناس كتير داخلة وخارجة نزل من العربية وهو لابس نظارتة الشمسية وراح علي البواب : السلام عليكم يا حج..

البواب : وعليكم السلام يابني !

أمير : خير هو في ايه عند شريف بيه اصلي شايف ناس كتير خارجة وطالعة ..
البواب بحزن : الست ملك مراته تعيش انت توفت النهاردة الفجر..
أمير بلع ريقة بصعوبة : ماتت !! طيب ايه السبب..
البواب : والله ما اعرف يا بيه من ساعة ما ابوها مات وهي الاسعاف جت خدتها وبعدها اتفأجئت انها ماتت..
أمير : طيب هي المدافن بتاعتهم فين ؟؟
البواب داله علي المكان وهو شكرة ومشي ركب عربيتة وطلع علي المدافن..

ونزل راح علي القبر اللي ملك مدفونه فيه وقف للحظة مش مستوعب انها هنا وخلاص بقت تحت التراب رقع قدام القبر وخلاص مقدرش يقاوم دموعة اكتر من كده حبها ومازال حبها ساكن في اعماق قلبة : ياااه يا ملك شوفتي الدنيا صغيرة ازاي شوفتي عملت فينا ايه شوفتي انتي بقيتي فين ! وانا فين ؟؟ أنا بس كان نفسي تستحملي معايا شوية كان نفسي تقدري حبي ليكي والله ما كان هينقصك حاجة بس انتي مستحملتش وزهقتي بسرعة ودورتي علي اللي هيعيشك نفس عيشت اهلك ومفكرتيش فيا والا اللي هيحصلي من بعدك...كسرتيني كتير اوي يا ملك.. كسرتي قلبي لما بعدتي عني وانا في اشد الحاجة ليكي ولما اوهمتيني انك قتلتي ابني وهو في بطنك...انتي متعرفيش أنا عدت عليا ايام ازاي من غيرك.. كنت بحس بالموت في كل ثانية من اللي عملتيه فيا.. وبعد كل ده كنت بحط ليكي اعذار ومعرفتش اكرهك ولا اخرجك من قلبي كان بيتكلم ودموعة مغرقة وشه مسح دموعة بس الحاجة الوحيده اللي هتخليني اسامحك علي كل اللي عملتية هي مليكة صحيح حرمتيني منها في عز ما كنت محتاجها بس وجودها في حياتي دلوقتي عوضني عن حاجات كتيرة اوي ..بس مش عارف اقولها ازاي علي خبر موتك خايف عليها اوي انا النهاردة حلمت انها بضيع مني وانا واقف مش عارف اعملها حاجة مجرد احساسي بالعجز وانها بروح قصاد عيني كان صعب اوي وحمدت ربنا انه كابوس مش حقيقة ..


شريف من وراه بالشر الدنيا كلة فيه : انت جابك هنا ودخلت هنا ازاي !!

أمير مسح دموعة بسرعة وقام نزل نظارته علي عنية ..
شريف هجم عليه ومسكة من هدومه بغل وشر : انطق ايه اللي جابك هنا هه جاي تطمن علي جريمتك
أمير بصدمة دفعة بعيد عنة : جريمة اللي بتتكلم عنها انت اظاهر جري لمخ حاجة ..
شريف قام هجم عليه تاني وضربه وقعة في الارض : انت السبب في هموتها ظهورك في حياتنا من تاني دمر كل حاجة بينا رجعت بس علشان تنتقم مني علشان خدتها منك زمان خلتها توقف قصادي وتطلب مني الطلاق ده غير خيانتك ليا اللي هدفعك حياتك مكانها علشان تعرف انت مين وانا مين انت حشرة ولا تسوي واقدر في ثانية افعصك بجزمتي كان بيتكلم وعنيه كلها شر وغل وكره ل أمير ..

أمير : داين تدان يا شريف بيه ربنا خدها منك زي ما انت خدتها مني زمان وحرمتني منها ومن بنتي ربنا اسمه الحكم العدل وده عدل ربنا ليك دلوقتي انك تشرب من نفس الكاس اللي انا شرب منه بسببك ..

شريف بعصبية شديده : وانا حقي هاخدة منك دلوقتي وهجم عليه بالضرب لحد ما مصطفي دخل بسرعة خلص أمير من ايده ونزل فوقه ضرب لحد ما شريف غاب عن وعيه فسابه وخد أمير بسرعة ومشي بيه....واول ما بعد عن المكان وقف العربية أمير انت كويس فيك حاجة طمني..
أمير : كويس متخافش !!
مصطفي بضيق : انت ايه جابك المكان ده انت اتجننت !
أمير : عادي جيت وخلاص ! بس انت عرفت انا هنا منين؟

مصطفي نفخ بضيق : من رجالتي وكنت جاي علشان اخدك والحمد لله اني جيت ..هو ايه اللي حصل خلاه ضربك كده...

أمير : بيقولي ان انا السبب في موتها ..
مصطفي : السبب في ايه بالظبط ؟
أمير : معرفش !!
مصطفي : انت مش شاكك في حاجة ملك وابوها يموتوا في نفس الاسبوع والاتنين في ظروف غامضة بالشكل ده؟
أمير بصلة : قصدك ايه؟
مصطفي : قصدي ان موتهم مش طبيعي وفي حاجة غلط ..
أمير بيفكر في كلام مصطفي ..
مصطفي : ايه سرحت في ايه؟
أمير : بفكر في كلامك..انت عارف لو كلامك ده صح يبقي شريف ده مجرم خطير انت مشفتهوش وهو بيهددني من شوية كان عامل ازاي ..
مصطفي : يلا اروحك ترتاح وبعد كده نفكر ونشوف الحكايه ايه بالظبط !!

شريف فاق وقام عدل نفسه وبيمسح الدم من علي بوقة بغل وقهر من جواه والله لموتك يا أمير انت ابتديت اللعب وانت متعرفش انت بتتعامل مع مين غلطتي من الاول اني سبتك عايش وقف قدام قبر ملك بغل وشر ..كان جاي يطمن عليكي كان جاي يتأسفلك انه مطلعش راجل معاكي عمل عملته وسابك متزعلش هخليه يحصلك في اقرب فرصة وساعتها ابقوا اتعاتبوا براحتكم اما انا بقي خدتي حقي منك وجه الدور عليه ..شريف خلاص اتحول لبركان غل وشر لو انفجر هيدمر كل حاجة حواليه

طلع موبيلة وكلم رجالته علشان تتجمع كلها وتستناها المخزن الكبير خلاص يا أمير نهايتك قربت ....؟؟؟؟؟
رواية انهيار قلب للكاتبة وردة الفصل التاسع عشر

أمير وهو في الطريق كلم المحامي يسألة عن ورق بنته خلص ولا لسه ..؟

المحامي : انا كنت في المحمكة من شويه وخلاص مليكة اتنقلت علي اسمك ..
أمير ابتسم : متشكر اوي علي تعبك يا صلاح بيه..

صلاح : العفوا ده شغلي وبصراحة الامور كانت ماشية كويس اوي وتحليل DNA ساعدني كتير وحظك الظابط صاحبي وخلص كل حاجة بسرعة..

أمير : مش عارف اقولك ايه بس بجد تسلم علي تعبك..
صلاح : انا تحت امرك في اي وقت انت وطلعت بيه ...
أمير فصل المكالمة وبص ل مصطفي : الحمد لله كده بقي بنتي اسمها مليكة أمير فخر الدين خطاب..
مصطفي ابتسم : ربنا يخلهالك وتفرح بيها يااااارب..

أمير افتكر ملك وموتها واتنهد : ياارب تفتكر يا مصطفي ايه سبب موت ملك وابوها المفأجي ده..تحليلك ايه؟

مصطفي : كل اللي اقدر اقوله ان فيه سر كبير وراء الموضوع واللي اسمة شريف ده مش سهل ويخوف وحاسس انه شغال في حاجة مش تمام..
أمير : قصدك ايه ؟؟ انه بيشتغل في حاجات مش كويسه
مصطفي : مجرد احساس مش متأكد بس سوا كدا او كدا هو مش أمان عليك..
أمير : ميقدرش يعمل حاجة ..لو هيقدر كان عمل ومستناش..
مصطفي : مهو سكوته ده اللي قلقني ..سكت شويه وبعدها اتكلم دلوقتي ان مليكة بقت بنتك رسمي يعني هي الوريثة الواحيدة ل أمها..
أمير بغضب : متكملش انا مش عايز منهم حاجة وفلوسهم متلزمنيش ومش عايزها

مصطفي : يعني ايه ده حق بنتك هضيعه؟

أمير : ايوة !! مش عايزو بنتي أنا عندي اللي يكفيها ويفيض..
مصطفي : انت عارف انت بتتكلم في ايه دي ملايين مش الف ولامية علشان تسيبها لواحد زي شريف..
أمير : وانا بكره الفلوس دي لانها كانت كل السبب اللي حاصلي زمان وسبق ورفضت منها جنيه واحد يدخل بيتي عايزني دلوقتي اخدها ازاي...
مصطفي : علشان زمان مكنتش حقك بس دلوقتي ده حق بنتك وواجبك كأب انك تحافظ علي حقوقها لحد هي ما تكبر وتستلمها منك ..
أمير نفخ بضيق وبص من شباك العربية ومنطقش وحاسس بنفسه مسحوب منه

مصطفي : ده الصح وكمان دي فرصه كويسه اوي ندخل بيها الشركة ونعرف طبيعة شغلهم كويس..هاه قولت ايه..

أمير افتكر مسكة شريف وضربه واتهامه ليه انه السبب في موتها : قولت هفكر ..
مصطفي : طيب تمام فكر براحتك ..
أمير : انت رايح فين ؟
مصطفي : علي البيت عندك اوصلك..
أمير : لا اطلع علي الشركة مش حابب اروح البيت دلوقتي....

في البيت مليكة وزياد بيتخانقوا حنين جرت فصلت بينهم وخدت مليكة في حضنها وبصت ل زياد بعتاب كده بردو يا زياد بتضربها مش قولتلك عاملها زي اختك..

زياد بعنف : انا بكرها علشان بتسرق اللعب بتاعتي وتلعب بيها وكمان مبحبهاش ومش عايزها هنا خليها ترجع مكان ما جت ده مش بيتها..
حنين مصدومة من عنف زياد وطريقة كلامة ومليكة اول كا سمعت كلامة جرت علي الاوضة وحبست نفسها فيها تعيط..
حنين عنيها علي مليكة وبصت لزياد ليه كده عملتلك ايه علشان تقولها كده ..

زياد بغيره : خدت مكاني وبقت هي كل حاجة في البيت وانا خلاص مش عايزها تعيش معانا تاني..

ناديه بحدة : زياد تعالي هنا ازاي تقول الكلام ده علي بنت خالك اياك اسمعك تقول كلامك ده تاني مفهوم..
زياد بصلها بضيق : يبقي خلوها تبعد عن حاجتي علشان لو قربت لحاجة تخصني هزعلها واضربها كمان قال كلامة ومشي دخل اوضته..وناديه بتنادي عليه..
حنين : سيبه يا ماما وانا هتصرف معاه بس لما ادخل اشوف مليكة الاول وارضيها..
حنين دخلت لقت مليكة بتعيط وعايزا تمشي تروح لمامتها وانها مش عايزا تقعد في البيت ده تاني..
حنين خدتها في حضنها تهديها : طيب اهدي وانا هعملك اللي انتي عايزاه وبعدين زياد عيل صغير وانتي اكبر منه فمتخديش علي كلامة..وبعدين هو انا مش زي ماما ولا ايه..
مليكة بحدة : لا مش زيها وكملت بعياط ناديه ادخلت سبيها يا حنين وانا هتصرف معاها..

عند مايا في الفيلا عند شريف بتكلمة علي الموبيل مبيردش وبغيظ كده بردو يا شريف طيب..ومكملتش كلامها ولقاته داخل عليها فجرت عليه ..كنت فين قلقت عليك..

شريف بحده : وانتي مالك فين ولا مش فين وبعدين تقلقي عليا ليه شيفاني عيل صغير قدامك..
مايا : مش قصدي يا حبيبي بس..

شريف قاطعها بحزم : انا مش حبيبك وياريت تتفضلي علشان عايز استريح ..ولسه هيمشي ..جرت وقفت قدامة ..اتفضل اروح فين انا مش همشي من هنا ولازم حضرتك تفوق كده وتسمع كلامي البضاعة لازم تخرج اليله وتتوزع علي اصحابها علشان مينفعش نتأخر علي الناس اكتر من كده.. وبعدين انت عامل في نفسك كده ليه زعلان عليها ده بدل تحمد ربنا انك غسلت عارك بإيدك بعد خيانتها ليك..

شريف مسكها من شعرها بقوة وهي صوتت : انتي جبتي الكلام ده منين ؟
مايا وهي بتتألم من مسكتة: من دكتور حازم لما سألتة ..
شريف بغضب : حسك عينك حد يعرف كلمة عن الموضوع ده انتي فاهمة..
مايا بخوف : فاهمة فاهمة..

سابها وهو بيحاول ياخد نفسه ..وهي قربت منه بهدوء : انت عارف اني بخاف عليك ومستحيل اقدر آذيك شريف انا بحبك من اول يوم شوفتك فيه وانا بموت فيك واتمني اعيش خدامة تحت رجلك انت الراجل الوحيد اللي حسيت معاه اني ست بجد....كانت بتتكلم بطريقة الهمس ..وشريف بصلها بكره واتخيل انها ملك اللي واقفة قدامة وبتقول نفس الكلام ده ل أمير اتجنن شدها عليه وحب ينتقم منها يمكن النار اللي جوا قلبة تهدي وترتاح.......


ناديه : كده بردو يا مليكة عايزه تمشي وتسبيني وتسيبي بابي ..

مليكة : ايوة محدش هنا بيحبني وبيكرهوني...
ناديه : انتي جبتي الكلام ده منين كلنا هنا بنحبك دانتي بنت الغالي يا مليكة واذا كان علي زياد يا ستي انا هعلقهولك وعلشان مش يزعلك تاني ..
مليكة بإنتصار : طب لو زعلني ..
ناديه : من النهاردة مش هيقدر يزعلك ولا يدوسلك علي طرف يا ست البنات وكمان هخليه يجي لحد عندك ويعتذرلك
مليكة ابتسمت وناديه ضمتها لحضنها لسه بردو عايزة تمشي وتسبينا ..مليكة : تؤ تؤ ....

أمير وصل الشركة هو ومصطفي وهما داخلين قابلوا طلعت سلموا عليه وراحوا قعدوا في قاعة الاجتماعات ..

طلعت : انا اول ما سمعت الخبر جيت علشان اشوفكم عرفتوا ولا لاء...
أمير : عرفنا انهم ماتوا لكن منعرفش اي تفاصيل...ماتوا ازاي وايه سبب الوفاه..
طلعت : عرفت ان حسين مات في حادثة في لبنان وقالوا انها كانت حادثة طبعيه وقضاء وقدر..
أمير : وملك ؟؟

طلعت بتنهيدة : كانت حامل ولما عرفت وفاه باباها وقعت من علي السلم وحصل معاها نزيف حاد وتسبب في الوفاه..

أمير غمض عنيه : كانت حامل !!
طلعت : ايوة ده الكلام اللي اتقال واللي سمعته..
مصطفي : ولا كلمة من اللي قولتها دي يا طلعت داخله دماغي..وحاسس ان فيه بلاوي وراء الموضوع ده؟
طلعت : وده كمان نفس احساسي ؟
أمير كان ساكت وسرحان ومش سامح اي كلام بينهم ..
طلعت : قولت ايه يا أمير ؟

أمير انتبه ليهم : قولت ايه في ايه؟

طلعت ومصطفي بصوا لبعض : دانتا مش معانا بقي؟
أمير : كنتوا بتقولوا ايه مخدتش بالي؟
مصطفي قام وقف : قوله انت يا طلعت انا هقوم اتابع الشغل واستأذن ومشي ..
طلعت بص ل أمير : مالك فيك ايه ؟
أمير : حاسس ان موتها كسر حاجة جوايا مش قادر انساها يا طلعت رغم انها عملت كل حاجة تخليني اكرها بس بردو مكانها في قلبي موجود ...
طلعت بتنهيدة : حاسس بيك علشان مش انت لواحدك اللي مر بتجربه زي دي ..انسي يا أمير انسي علشان تعرف تعيش ومتنساش ان ربنا كرمك بزوجه بتحبك وبتتمني الرضا ليك ..فكر فيها شويه ..
أمير رجع بدماغة لوراء ونفخ بضيق : هنسي اكيد هنسي !!
طلعت : أمير ممكن اسالك علي حاجة ..
أمير : اه طبعا !

طلعت : انت بتحب حنين !! قصدي يعني بقت مراتك وكدا..

أمير : ايوة عادي حياتنا عادية زي اي اتنين هي صحيح بتحبني وكدا بس انا من ناحيتي مفيش ابيض مش حاسس بحاجة ..حاولت في الاول ابعد عنها ومقربش منها بس ظهور مليكة في حياتي خلاني اعيد حساباتي تاني علشان تكون ام لبنتي ...

طلعت : ياخي الدنيا دي غريبة اوي اللي تحبك بجد واخدها ام لبنتك وبس واللي خانت وباعت موجودة في القلب ..

أمير : لما بتحب بجد بيكون صعب عليك تنسي الحب ده وانا قلبي مادقش غير ل ملك حاولت اكون مع حنين بقلبي بس معرفتش ...
طلعت : انت بتظلم حنين معاك وهي متستهلش منك كده ..حنين بنت حلوة فيها كل المميزات اللي تخلي اي راجل يحبها مش عارف انت ازاي مش شايفها اوي كده ..
أمير بصلة : منكرش انها مميزة واني بضعف كمان قدامها كمية الحب اللي جواها ليا بشدني ليها بس فيه حاجة ناقصه مش حسسها معاها ..
طلعت : النقص ده عندك... انت خايف تسلم ليها قلبك سيب نفسك يا أمير وسلم مفاتيح قلبك للي تستاهلة ..
أمير بتنهيدة : ان شاء الله ..

شريف قام خد دوش ولبس هدومة مايا من وراه رايح فين خليك معايا..

شريف بضيق : اخليني معاكي فين يلي بيتك وقتك خلاص انتهي ومينفعش تكوني موجودة هنا اكتر من كده ..
مايا : شريف انا مش همشي من هنا وانت هتتجوزني !
شريف بحدة : اتجوزك !! لا انا خلاص بطلت الموضوع ده جواز مش هتجوز فريحي نفسك ..
مايا : ليه مش قد المقام ولا وحشه ومش عجباك..
شريف : بالظبط كده يلا بقي شوفي رايحة فين ؟

مايا بغل : دلوقتي مش عجباك يا شريف امال من شويا كنت هيمان معايا ليه ؟

شريف بزهق مش هخلص انا عارف : مكنتش هيمان ولا حاجة كنت براضيكي بس ارتاحتي كده !
مايا : بتراضيني !!! ولما كنت بتهرب من مراتك وتجيني كنت بردو بتراضيني ..
انت فاكر نفسك بتحبها لا يا شريف فوق وبلاش تضحك علي نفسك انت محبتهاش عارف ليه ؟ علشان لو كنت بتحبها بجد مكنتش في يوم فكرت تخونها معايا ومع غيري..
شريف : خلصتي كلام اتفضلي بقي علشان عندي شغل ومش فاضي لكلامك السخيف ده ..
مايا : هتجيب البضاعة ؟

شريف : لا الاهم من البضاعة!

مايا بإستغراب : هو فيه أهم من البضاعة ؟!
شريف : ايوة
مايا بترقب : مين؟؟
شريف : أمير ؟؟ هو ابتدأ العب معايا وهو ميعرفش هو بيلعب مع مين ؟
مايا بصدمة : انت هتعمل ايه متوديش نفسك في داهيه علشان حد ميستهلش
شريف : وانتي مالك ده شيء ميخصكيش اطلعي انتي منها قال كلامة وسابها ومشي وهي نزلت وراه تراقبه شافته رايح علي المخزن الكبير واقفت تسمع هيقولوا ايه ...يا تري انت ناوي علي ايه ياشريف ولو اكتشفت ان انتقامك مش في محلة وان ملك كانت حامل منك هتعمل فيا ايه فلاش باك**
دكتور حازم : انتي بتقولي ايه عايزاني اقوله انه مش ابنه ؟

مايا : ايوة ده الصح وشريف هيصدق علشان هو اصلا شاكك في مراته ولو عرف انه هو اللي قتل ابنه بإيده ممكن يتجنن او يجراله حاجة !

حازم : والمطلوب ؟!
مايا : كدبة صغننة قدا كده هتريحة من العذاب طول عمرة ...وشوف الرقم اللي انت عايزة وانا هكتبلك شيك بيه
حازم : وانتي هتستفيدي ايه ؟
مايا : هستفاد كتير واول حاجة هيكون شريف بتاعي انا وينسي خالص ملك بقرفها...ها قولت ايه هديك مبلغ متحلمش بيه؟
حازم سكت شويه وبصلها : موافق !!

باك.....

مايا شهقت وحطت ايدها علي بوقها لما سمعت اتفاق شريف مع رجالته معقوله يا شريف هتعمل كده ؟؟

أمير رجع البيت واول ما مليكة شافته قعدت تعيط أمير جري عليه مالك يا قلب بابا مين مزعلك..

مليكة بتمثل العياط : انا مش عايزا اعيش هنا يا بابا وديني عند ماما هنا الكل بيكرهني..
أمير بصدمة خدها في حضنة وبطبطب عليها ازاي هيقولها ان امها مبقتش موجودة بصلها وبإيدة مسح ليها دموعها : مين زعلك ؟
مليكة بعياط : طنط حنين ضربتني علشان اتخانقت انا وزياد كشفت جسمها شوف يا بابا مكان الضرب انا بكرها اوي يا بابا...
أمير شاف جسم بنته اتصدم حس بغليان في جسمة وقام وقف وهو بينادي علي حنييييييين .......؟؟؟؟
رواية انهيار قلب للكاتبة وردة الفصل العشرون

أمير شاف جسم بنته اتصدم حس بغليان في جسمة وقام وقف ونادي بأعلي صوتة حنييييييين...

حنين كانت في المطبخ واول ما سمعت صوته اتنفضت وجرت بسرعة تشوف في ايه لقت أمير الغضب والشر طالعين من عنيه واول ما شافها قدامه مسكها من ايدها بعنف وقوة خلتها صرخت بصوت مكتوم : انتي ازاي تجيلك الجراءه تمدي ايدك علي بنتي هاه انتي مين اصلا علشان تعملي كده فيها ..هاه ردي اوعي تكوني مفكرة نفسك امها وتعملي اللي انتي عايزاه فيها لا فوقي ..انتي ولا حاجة انتي هنا مجرد خدامة ليها وبس مش علشان تمدي ايدك عليها..فاهمة !!

حنين مصدومه من كلامه ومش مصدقة ان الكلام ده ليه ولا فاهمة منه حاجة الدموع لمعت في عنيها اتكلمت بصوت مخطلت بالعياط : طيب اهدي و فهمني انا عملت ايه ومليكة مالها..؟؟


أمير كز علي انيابة بضيق وزقها بعيد عنه ومسك مليكة كشف جسمها يوريها العلامات اللي عليه : ازاي جالك قلب تعملي فيها كده

حنين حطت ايدها علي بوقها وشهقت بصدمه وقربت من مليكة بخوف عليها : حيبتي ايه اللي عمل فيكي كده ..
أمير بعصبية شديده زقها بعيد عنها : اسألي نفسك يا هانم انتي بسألينا احنا ازاي تضربي عيلة بالشكل ده وعلشان خاطر ايه بصلها بإشمئزاز وانا اللي فكرتك كويسه وقولت هتعتبرها بنتها بس طلعتي سودة من جواكي ..

مليكة واقفة متابعه وعلي وشها ابتسامة نصر ..

حنين بعياط : بس انا والله ملمستهاش ولا قربت ليها و معرفش هي حصلها كده ازاي ...
امير بعنف مسكها من دقنها وخلاها تبصله : وهي مليكة هتكدب ليه هتقول حاجة محصلتش ليه
حنين صرخت في وشه : معرفش اسألها بتقول كده ليه بنتك انا بخاف عليها اكتر من نفسي ازاي بقي هقدر أعمل فيها كده
ناديه كانت تحت وسمعت صوت أمير عالي طلعت تشوف في ايه واول ما دخلت شافت حنين بتعيط وأمير واقف قدامها مش علي بعضة : في ايه مالكم وليه صوتكم عالي وجايب اخر الشارع..

أمير بصلها وبص لبنته وعنيه راحت علي حنين اللي بتعيط قدامه ومرة واحده مسكها من ايدها : اطلعي برا بيتي مش عايزك هنا تاني ..

ناديه وهي مصدومة جرت عليه : أمير انت اتجننت استني هنا وفهمني في ايه ..وهي عملت ايه علشان تعاملها بالاسلوب ده ؟
أمير وقف بصلها وزعيق : انا مش عايز حد يدخل في حاجة تخصني تاني وكفايه اني اتجوزتها علشان ارضيكم لكن توصل انها تمد ايدها علي بنتي واسكت واقعدها معايا في بيت واحد فيبقي لا والف لاء

ناديه مصدومه من اللي بتسمعة : مين ده اللي ضرب بنتك حنين !! انت جري لدماغك حاجة الكلام ده محصلش طبعا

أمير : لا حصل وعندك مليكة اهية اسأليها وتسأليها ليه اتفضلي شوفي جسمها بنفسك ساب ايد حنين اللي دموعها نازله زي المطر ومذهوله من تصرفات أمير وبنته ...
أمير كشف جسم بنته قدام أمه اللي صدمتها مكنتش اقل من صدمة حنين : مين عمل فيها كده
أمير بضيق : تقدري تسألي الهانم اللي قدامك وهي تجوبك ليه عملت كده قدامك عشر دقايق ومش عايز اشوفك وشك في البيت ده تاني ..
ناديه : انت اتجننت يا أمير ايه اللي انت بتقوله ده اهدي كده واسمح الاول ونشوف اللي حصل للمليكة ده بسبب ايه مش معقوله حنين هتعمل فيها كده..
أمير بجمود : أنا هادي ومش عايز اسمع منها حاجة وكلامي اللي قولته واضح ومفهوم انا مش محتاجها في حياتي تاني ...

ناديه بعصبية : أمير انت بتقول ايه

أمير بقول اللي سمعتيه يا أمي كنتي عايزه احفاد وبقي عندك ربيها انتي بقي
بص لبنته وخدها وطلع من بابا الشقة وقفلة وراه بقوة هزات جدران البيت !!
وحنين جرت علي الاوضه و جابت الشنطة وفتحتها وبتحط فيها هدومها..
وهي بتعيط بحرقة !!

ناديه : حنين فهميني ايه اللي حصل وايه اللي في جسم مليكة ده..

حنين : معرفش حاجة ومش عايزا اعرف خلاص مبقاش ليا مكان هنا تاني بعد النهاردة..
ناديه : اعقلي يا حنين هتخربي بيتك علي ايه دلوقتي أمير يفهم انه غلطان ويجي يعتذرلك ..
حنين قفلت الشنطة وغيرت هدومها ومهما ناديه تتكلم جنبها مش سامعه منها حرف كل اللي كان بيرن في ودانها كلام أمير انها هنا مجرد خدامة لبنتة وبس ومهما تعمل مش هتقدر توصل لقلبة : ويفيد بإيه الاعتذار ابنك قالها واضحة مش عايزني تاني في بيته ولا حياته
مسكت شنطتها ونزلت وناديه وراء منها بتحاول توقفها معرفتش لحد ما تعبت وقعدت مكانها حاطة ايدها علي خدها وهي مش فاهمة حاجة وليه مليكة عملت كل ده!!

حنين مشت وهي بتحاول تسيطر علي دموعها ركبت تاكسي وطلعت علي محطة القطر وهي بتفتكر كل اللي حصل مليكة رافضة وجودها زي ما هو كمان رافضة افتكرت طريقة أمير وعصبيتة عليها ومفكرش حتي يسمع منها او يخليها تدافع عن نفسها عيطت كتير اوي عيطت من قلبها علي وهم رسمتة في خيالها وعاشت عليه اتخيلت ان أمير بدأ يحبها وقرب منها للسبب ده متخيلتش انه قرب منها بس علشان تكون مجرد خدامه لبنت حببتة اللي محبش ولا هيحب غيرها......


أمير وصل بمليكة عند الدكتور وكشف عليها علشان يطمن ها يا دكتور للي علي جسمها ده ايه ؟

الدكتور : مفيش عادي دي كدمات بسيطة ممكن تكون وقعت عليها مش اكتر ..
بس مفيش حاجة تخوف و البنت كويسه وزي القمر اهيه ..
أمير بتنهيدة : الحمد لله شكرا يا دكتور خد مليكة وضمها لحضنة أنا آسف يا قلبي وطول ماأنا موجود محدش هيقدر يلمس شعره منك
مليكة ضمته هي كمان وحست بفرحة غير عاديه ربنا يخليك ليا يا بابي ....ويخليكي ليا يا قلب بابي هااا يا ستي نفسك تروحي فين شاوري وبابا هينفذ..
مليكة : هتوديني اي مكان ؟
أمير ابتسم : أي مكان !

مليكة : عايزاك تجيب ماما من عند اللي اسمة شريف ده وتخليها تعيش معانا انا وانت وهي وبس

أمير ابتسم بوجع ومش عارف يرد عليها يقول ايه ..
مليكة كملت : نفسي يكون عندي عيلة بجد احبها ويحبوني ..انا النهاردة شوفت خوفك عليا عمري ما شوفته في عيون بابا شريف انت بتخاف عليا زي ماما وده حاجة انا حبتها اوي ونفسي اعيش وسطكم وسط اهلي واحس بالامان وانا في حضنهم..
أمير عيونه دمعت من كلام بنتة وحاسس انه في اللحظة دي اتخرس ومبقاش عارف يتكلم ...كلام بنته قطع قلبه خاف عليها من صدمة موت مامتها وفي الوقت ده اتمني لو كان رجع ل ملك وكمل معاها حياته ونسي كل الماضي ...

فاق علي صوت بنته : قولت ايه يا بابا هتجيب ماما ونرجع نعيش مع بعض عيلة واحده..

أمير ابتسم ابتسامة باهتة وضمها لحضنة : انا ممكن اوديكي دلوقتي الملاهي ونتفسح انا وانتي احلي فسحة ومش هتنسيها ابداااا
مليكة كشرت : طب وماما ؟!
أمير : خليها مرة تانيه وخدها وطلع بيها علي الملاهي وهو سرحان في كل كلمة قالتها ليه النهاردة موبيلة بيرن بس هو متجاهله خالص ومش بيرد علي حد ...

فخر الدين بعصبيه يعني ايه مشت وازاي اصلا تمشي لواحدها من غير راجل معاها ..

ناديه : ابنك يعتبر طردها من البيت هتقعد تعمل ايه ؟
فخر الدين : اي كان متمشيش لواحده كانت جتلي الوارشه وانا كنت حليت المشكلة مش تمشي كده من دماغها..
ناديه : انت سبت كل حاجة ومسكت في ازاي مشت بقولك بنت أمير اتهمتها انها ضربتها وده محصلش والمصيبة الاكبر ان ابنك مصدق العيلة وماشي وراها من غير حتي ما يفكر فين الصح وفين الغلط..
فخر الدين بضيق : وابنك المحروس مابيرودش علي التلفون ..
ناديه طيب كلم حنين ؟

فخر الدين بنرفزة : ما قولتلك موبيلها مقفول ..

نادية : طيب كلم اخوك علي الاقل اطمن انها وصلت ولا لاء..
فخر الدين : مش عايز اقلقهم خايف متكنش وصلت هستني كمان شويه وهكلمهم..
حنين وصلت البيت وكانت نص اليل خبطت وابوها قام يفتح واتفاجي بيها قدامة ..
ابراهيم فرك بإيده عنيه كذا مرة ومش مصدق : حنين انتي هنا ولا انا بحلم..
حنين رمت نفسها في حضن ابوها واتفتحت في العياط وهنا هو استوعب انها حقيقه مش حلم ..خدها دخلها جوا وهو بيحاول يهديها وزعل عليها لما شافها بالشكل ده خلاص يا حببتي اهدي وفهميني في ايه وليه جايه في الوقت المتأخر ده لواحدك ...

حنين بتعيط وبس ومش راضيه تتكلم وابوها مش سامع غير صوت شهقاتها المكتومه ..امها قامت علي الصوت شافت بنتها اتخضت : حنين انتي هنا يا حببتي وراحت خدتها في حضنها بس اول ما شافت دموعها قلقت وبصت علي جوزها يمكن تفهم..

ابراهيم : خدي حنين طلعيها اوضتها تستريح والصبح نبقي نفهم في ايه مش وقته الكلام ولو جعانه اعمليها اكل واي حاجة تشربها..
حنين بصوت واطي : انا مليش نفس عايزة انام بس..

امها : تعالي حببتي معايا هطلعك اوضتك مقفوله من يوم انتي ما مشيتي وكل حاجة مكانها زي ما هي بدخل بس انضفها واخرج تاني ..

حنين دخلت الاوضه ورمت نفسها علي السرير ..امها دخلت وراها وراحت علي السرير وشالت دماغها حاطته علي رجليها وقعدت تلعبلها في شعرها بحب : مالك يا قلب امك مين مزعلك
حنين : مفيش بس نفسي اناااام
امها ابتسمت : بس كده نامي يا حببتي ..

حنين من التعب والعياط طول الطريق نامت وامها سبتها براحة وخرجت لقت ابراهيم في وشها : نامت ..

امها بهمس : ايوة ..هو في ايه ؟
ابراهيم : مش عارف شكلها اتخانقت مع جوزها بكرا نعرف كل حاجة تعالي نامي...
شريف ل رجالته : عرفتوا هتعملوا ايه مش عايز حد يخرج منها فيه الروح عايز المكان يكون عباره عن جهنم..
الرجاله : فاهمين يا بيه..
شريف : يلا انصرفوا وهستني اشوف الاخبار بنفسي...الرجاله مشت وهو ابتسم ابقي وريني هتعمل ايه يا أمير بيه بعد اللي هعمله فيك ...!

مليكه نامت من كتر اللعب وأمير شايلها فتح العربيه وحاطها جنبة ولف ركب العربيه ومشي وكل ما يبصلها يبتسم علي جمالها علي تفاصيل وشها ...كانت واخده ملامح ملك وأمير مع بعض في نفس الوقت حس بوجع في قلبه علي كل اللي راح منه علي كلام بنته وازاي هيقدر يقولها موت ملك افتكر حنين واضايق انها جت علي باله في الوقت ده بالذات كان اكبر غلط لما فكر يخليها ام ل مليكة محدش بيحب عيال حد ودي كمان بنت ملك اللي طول عمرها بتكرها ازاي فكر انها هتحبها بص لبنته صدقيني مش هسمح لحد يأذيكي وانا موجود هحميكي حتي من نفسي ومستعد اخسر اي حد اللي انتي يا مليكة ..وصل البيت شالها وطلع بيها واول ما فتح الباب لقي امه وابوه وفرح وسامح واقفين : بصلهم ورمي عليهم السلام وسامح بس اللي رد.


كمل طريقة ل اوضته ويا دوب هيفتح الباب ابوه اتكلم : دخل بنتك تنام وتعالي علشان عايزك..

أمير رد بأقتضاب : حاضر ! حطها علي السرير وباس خدها بحب ومن منظر الاوضه عرف ان حنين سابت البيت
اتنفس بعمق وقام خرج ل ابوها ..مالكم قاعدين كده ليه ؟
فخر الدين : هو سياتك مش عارف قاعدين كده ليه ؟
أمير ببرود : لا ومش عايز اعرف !!
فخر الدين بعصبية :نعم انت هتستهبل علينا..فهمني انت ايه اللي عملته النهارده وازاي تطرد بنت عمك من البيت ..

أمير : والله دي حياتي الخاصه وانا حر فيها وانا وحنين خلاص هنطلق وده قراري النهائي ومش هرجع فيه..

فخر الدين : هجم عليه وكان عايز يضربه من غيظة منه..بس سامح فصل بينهم..
أمير : سيبه يا سامح يضرب ممكن افهم انت ايه مزعلك واحده ومش شايف راحتي معاها اسيبها علي ذمتي ليه علشان بنت اخوك ...طيب احب اقولك بنت اخوك المحترمة ضربت طفلة بسبب تافه جدااا لدرجة سابت علامات علي جسمها ..
فخر الدين : وانت صدقت انها ممكن تضربها وكمان تسيب علامات علي جسمها انت واحد عاقل انت وعندك مخ بتفكر بيه ولا لغيه وماشي من غيره!
أمير : وايه هيخلي طفله تكدب كدب زي ده ...
فخر الدين : زي ما امها كدبت عليك وخبت عنك انها عندها بنت نسخة مسغرة منها مخلياك ماشي وراها وتسمع ليها هي وبس نفس اللي كان بيحصل معاك زمان مع أمها..

أمير اضايق : ماشي يا بابا اتكلم وقول كل اللي عندك بس رجوع ل حنين لا انا اصلا مش عايز حد في حياتي تاني غير بنتي وبس ولو مضايقين من وجودي انا وهي هاخدها واسافر !!

ناديه شهقت وفرح وسامح مستغربين كلامه وازاي مقفل دماغه اوي كده..
فخر الدين بجمود : لو عايز تمشي يا أمير اتفضل امشي وصدقني محدش هيمنعك انت مش هتمن عليا لما تقعد معانا ..طالما انت بالدماغ دي ومش عايز تسمع غير لبنتك يبقي خدها وسافر زي ما انتي عايز
أمير : ماشي دخل اوضته لم هدومه في شنطة وفرح دخلت عليه هي وزياد : انت ليه كده ليه مصمم تحرق قلب امك وابوك عليك انت مبتحسش خالص..

أمير بضيق : انتو اللي مش قادرين تفهموا ولا تحسوا بيا مليكة بنتي حته مني ومش هستحمل فيها اي حاجة تضرها..

فرح : ومين هيضرها حنين اللي ظلمتها النهاردة بصت ل ابنها قوله يا زياد اللي حصل ..
زياد : محصلش حاجة وطنط حنين معملتش ليها حاجة انا ومليكة اللي اتخانقنا وضربتها وممكن تكون ضربتي علمت علي جسمها وتيتا ادخلت وانا اعتذرت لمليكة وكل حاجة خلصت علي كده وطنط حنين مقربتش ليها نهائي..
فرح : سمعت اظن زياد مش هيكدب
أمير : مش بكدب زياد وبردو مش هتجاهل كلام بنتي علشان هي مش هتتبلي علي حد ..

فرح بصتله بضيق وخدت ابنها وطلعت وسابته وهو كمل لم حاجته وخد بنته ونزل وامه بتعيط ولا اهتم لعياطها حجز في فندق واول ما وصل السرير من التعب خد مليكة في حضنه ونام....

الصبح مليكة صحت لقت نفسها في حضن ابوها ابتسمت واستغربت اكتر لما لقت نفسها في مكان غريب ..بابا اصحي احنا فين وجينا هنا ازاي..
أمير ابتسم : صباح الخير الاول وباسها من خدها ...ده يا ستي فندق هنقعد فيه شويه لحد ما اشوف شقة لينا احنا الاتنين نعيش فيها ...
مليكة بفرحة : وهنجيب ماما معانا ؟
أمير سكت شويه : سيبي موضوع ماما ده لبعدين دلوقتي هنقوم نلبس انا وانتي وهنروح مع بعض الشركة ايه رايك..

مليكة بفرحة : موافقة طبعا قامت تطنطت وهي بتضخك هيه هيه هيه..

أمير ضحك علي جنانها وقعد لبسها ونزلوا فطروا مع بعض وبعدها طلعوا علي الشركة قابل مصطفي اللي استغرب وجود مليكه معاه : انت جاي تلعب بقي مش جاي تشتغل ..
أمير : اه جاي العب خليك في نفسك ..
مصطفي رفح حاجبة بإعتراض : والله !! ماشي يا عم براحتك بس طلعت مستنيك من بدري جوا في المكتب ..
أمير : طيب خلي مليكة معاك لما اخلص شغل معاه..
مصطفي بعند : لا مش بحب العب انا ..انا بتاع شغل بس..
أمير : بطل رخامه بقي وخلي البنت معاك لما اخلص..
مصطفي : وانت جايبها معاك ليه
أمير : بعدين هفهمك يلا اخلص

مصطفي : ماشي متزقش ..وبص ل مليكة وفي سره هو انا اخلص من شبح ملك تطلعي انتي ام اشوف اخرتها معاك ايه يا أمير انت وبنتك ..

أمير دخل المكتب كان طلعت مستنيه : عندك تأخير نص ساعة وده مش في قاموسي ...
أمير ابتسم : عديها المرادي ..
طلعت : ماشي هعديها عملت ايه في ورق المشروع اللي عرضته عليك ..
أمير : كويس وهنبدا شغل فيه من بكره ...وهما بيتكلموا سمعوا صوت بيدل ان فيه حريقة في المبني ..
بصوا لبعض بصدمة وفي صوت واحد : هو في ايه وقاموا يجريوا علي برا ساعتها شافوا نار جهنم اتفتحت قدامهم ..

iklan banner

Abdulrhman Sayed
كاتب المقالة
كاتب ومحرر اخبار اعمل في موقع قصص وروايات .

جديد قسم :