رواية فارس عشقي للكاتبة سحر فرج الفصل الحادي عشر

سيدي وحبيبى وعاشقى ..

عانق أحساسي
جاوب صمتي وهذياني
رتلني بين شفتيك عشقا
أعزفني بنبض قلبك همسا
أغرقني في بحر عينيك
وأملآني بعبق أنفاسك
تجاوز عن سيئات همسي
فوق السطور أن لم يجديك حرفي
ولكن لا تدعني أفرغ حرفي فيك هباءا
خبئني في ضلعك الأيسر وأتركني هنالك أهذي
فلا شوقا يرتد عنك يوما.. ولا حنينا يسافر عنك أن أباح
ألقي علي قلبي منك سلاما.. يبلغ العمر آمنا وأمانا

رغد ..... انتى بتحبى شريف صح يا سلمى .

سلمى بإحراج اتفاجأت ان رغد سالتها سؤال زى ده وقالت .. انتى ايه اللى خلاكى تسألى سؤال زى كده .
رغد .. يا سلمى والله ما اقصد اى حاجه ولا اقصد انى احرجك .. بس بصراحه انا حاسه من زمان انك معجبه بشريف والصراحه اكتر الاعجاب ده قلب لحب .. وهو للاسف مش حاسس بيكى خالص .. وشكله كده بيحب همس.

يا سلمى انتى صاحبتى ومن زمان وبعتبرك زى اختى وزعلانه عليكى كل لما اشوف نظراتك لشريف وهو مش بيحس بيها خالص .

سلمى بعيون كلها دموووع .. عندك حق فى كل كلمه يا رغد .. انا فعلا بحبه وهو للاسف مش حاسس بحبى ده خالص .. وفى نفس الوقت هو بيحب همس .. وهمس صاحبتى .. علشان كده انا قلبى وجعنى اوى اوى كل لما اشوفه واعرف انه بيحب حد تانى غيرى والحد ده بيكون اقرب واحده ليا (همس)
قوليلى يا رغد اعمل ايه .. اعمل ايه ارجوكى .

رغد بحزن على صاحبتها ... اصبرى يا سلمى .. همس مش فى دماغها خالص شريف وعمرها ما هاتكون ليه .. هو اودامها على طول ومش بحس خالص انها معجبه بيه .. وهو بالنسبه لها مجرد زميل عمل وخلاص .. اصبرى مع الوقت اكيد هايعرف انه غلطان فى احساسه تجاه همس وهايحس بيكى انتى .

سلمى بألم ... انتى شايفه كده يا رغد .
رغد .. اه يا حبيبتى وقربت منها وضمتها لحضنها وحاولت تهديها وتواسيها .
وفى مكان تانى وبالتحديد فى المطار كانت طياره همس وفارس وصلت .. ونزلوا منها واتوجهوا للباب الخارجى علشان فارس يروح على بيته .. بعد ما همس بلغته انها لسه وراها شغل فى المطار بعد رحلتها ولازم تخلصه .

وفعلا سلموا على بعض وفارس ركب عربيته اللى كان راكنها هناك ووصاها انها تبقى تكلمه على الموبيل اول لما ترجع للبيت .

همس بعد ما سلمت عليه راحت على مكتبها ووصلت لحد الباب وفتحته .
همس ... اناااا جيت يا حلويييين .
سلمى بحزن ... اهلا يا همس حمد الله على السلامه .
رغد .. حمد الله على السلامه حبيبتى وصلتى امتى .

همس باستغراب من منظر سلمى اللى بيدل على انها معيطه ... قربت منها وسألتها .. ايه ده فى ايه يا سلمى انتى كويسه .

سلمى حاولت تدارى حزنها وقالت .. لا ابدا مفيش حاجه اصل تعبانه شويه .
همس ... لا بجد فى ايه انا اول مره اشوفك كده .. انتى هاتكدبى عليا يا سلمى هو انا مش عرفاكى كويس .. فى ايه يا حبيبتى .
سلمى اتفتحت فى العياط اكتر وقعدت على الكرسى وفضلت تعيط جامد وبحرقه .. وده اللى خلى همس تستغرب اكتر وتسال رغد فى ايه يا رغد مالها سلمى انطقى .
رغد ... الصراحه يا همس .. وماتزعليش منى يا سلمى لان همس المفروض تعرف كل حاجه .

سلمى .. لااااا يا رغد لاااا مش وقته .

همس .. حاجه ايه انطقى يا رغد حد حصله حاجه وانا مش موجوده .
رغد .. الصراحه يا همس .. سلمى بتحب شريف اوى .. وشريف بيحبك انتى . وده اللى بيبان فى كل تصرفاته .. وده اللى مخلى سلمى دايما حزينه وزعلانه . كل لما تشوف معامله شريف ليكى .
همس باستغراااب ... شريف .. طب ازاى .. استحاله طبعا .
انا بعتبر شريف ده مجرد زميل وبس وعمرى ما حاولت انى اشجعه على اى حاجه بالعكس انا دايما بهرب من نظراته ليا وعمرى ما فكرت فى حاجه تحصل بينى وبينه ابدا ابدا .

وقربت من سلمى وقالت .. والله العظيم دى الحقيقه يا سلمى .. انا ماليش علاقه بشريف ده خالص ..اطمنى يا حبيبتى ..واصبرى وهو اكيد هايحس بحبك ليه .

سلمى ... بجد يا همس .
همس .. بجد يا روح قلب همس .. انتى اختى يا بت .. وربنا يعلم انا بحبك اد ايه انتى ورغد .. ونستونى اقولكم على المفاجاه الى حصلت وانا مسافره .
رغد وسلمى بصوت واحد .. مفاجاه ايه قولى بسرعه .
همس .. عارفين انا لقيت مين هناك ونزل فى نفس الفندق اللى احنا بننزل فيه تبع الشركه دايما .
البنات بصوت واحد !!!!!!!!!!!! مين ؟؟

همس ... فاااارس الحسن.. وقضينا مع بعض يوم من اجمل ايام حياتى.

سلمى ... اوبااااااا ... انا كنت حاسه ان فى شىء بينكم .. شكله حصل يا همووووس.
رغد ... ايوا بقى اخيرا واحده فينا بدات تحب وتتحب.
احكيلنا ايه اللى حصل بالضبط .
همس .. انا قولتلكم كده علشان اطمن سلمى انى بحب فارس وماليش علاقه بشريف ده خالص .. وماكنتش عاوزه اقول حاجه دلوقتى عن الموضوع ده حاليا .. بس حبيت اعرف سلمى .
فهمانى يا سلمى يا حبيبتى .

سلمى بفرحه كبيره .. فهماكى يا روح قلب سلمى .. والف مبرووووك عليكى فارس.

واد موووووز فعلا حلاوة وجسم وعضلات وانتم تستاهلوا بعض .
ههمس .... وبعدين يعنى .. انتى هاتعكسى الواد اودامى كده عينى عينك ولا ايه يا ست سلمى .
رغد بضحك .. هو فعلا واد مووووز كده فى نفسه وحلو وامووور .
همس .. لااااا بقى اتلمى منك ليها .

وفضلوا يضحكوا ويهزروا وهمس تحكى ليهم على اللى حصل معاهم هناك وحكت كمان عن الزفت اللى اسمه فهد والكلام اللى قاله ليهم .

وبعد فتره همس خلصت كل اللى وراها ورجعت على بيتها .
دخلت همس الفيلا وسلمت على باباها ومامتها اللى كانت مشغوله فى المطبخ ... مساء الخير ازيك يا بابا .. اومال فين ماما وعمر .
الاب .. حمد الله على سلامتك يا همس .
ماما فى المطبخ مشغوله فى تجهيز العشاء علشان الضيف اللى جايلنا باليل على العشاء .
وعمر فوق فى اوضته.

همس باستغراب .. عشاء .. وضيف مين اللى جاى .

الاب حاول يتوه فى الكلام .. وقالها روحى طمنى ماما انك وصلتى علشان كانت قلقانه عليكى من الصبح .
همس .. ماشى يا بابا عن اذنك .
وفعلا راحت على المطبخ بشويش علشان تفاجاه مامتها وقالت .. انا جييييت يا ست الكل .
الام بفرحه ... همس حبيبتى .. حمد الله على السلامه .. وصلتى امتى .. رنيت على موبيلك كتير علشان اطمن عليكى بس كان مغلق .
همس .. شكله كده اكيد فصل شحن .. ولسه هاتسأل مامتها عن العشاء والضيف اللى جاى بس دخل عمر اخوها وفضلوا يسلموا على بعض ويهزروا ويسألها عمر جابتله ايه من الرحله دى .. والكلام خدهم وخرجوا من المطبخ وطلعوا على فوق كل واحد على اوضته .

فارس كان نايم فى سابع نومه فى اوضته من كتر الارهاق والتعب اليومين اللى فاتوا وقله النوم .

فاسمع صوت الموبيل بيرن فقام بسرعه لانه حس انها اكيد هاتكون همس .
وفعلا شاف اسم همس على شاشه الموبيل ورد بسرعه .
فارس من غير اى مقدمات ... وحشتينى اوى اوى اوى .
همس اتفاجأت بكلامه وسكتت خالص .
فارس .. ايه انا ما وحشتكيش يا همس ولا ايه .

همس بتروح فى عالم تانى خالص لمجرد انها تسمع اسمها من فارس .

فارس .. همس انتى معايا يا حبيبتى .
همس .. معاك يا فارس .
فارس ... وحشتك .
همس بخجل .. وحشتنى اوى .
فارس ... يااااه يا همس .. نفسى اغمض عيونى الاقيكى جنبى وفى حضنى .

ههمس .. وانا كمان يا فارس .. انا مش عارفه انت عملت ليا ايه .. لغبط حياتى كلها فى لحظه .. ده اسمه ايه بالضبط .

فارس ... اسمه العشق يا همس .
همس .. فارس عشقى يا حبيبى .
فارس بشووووق وحب .. وانتى عشق الفارس يا همس .
وفضلوا يحبوا فى بعض حوالى ساعتين ونسيوا الوقت خالص والعالم كله .. لحد ما همس سمعت حد بيخبط على الباب .
فاستأذنت من فارس انها هاتقفل وتبقى تكلمه تانى لما تغير لبسها اللى كانت لسه لبساه من ساعه لما رجعت ونسيت العالم وما فيه لمجرد بس انها بتتكلم مع فارس .. وبعدين هاتتعشى وتكلمه تانى .

فارس ... ماشى يا قلبى ما تتاخريش عليا .. هاستناكى على ناااار .

وقفلت الموبيل مع فارس وقامت تشوف مين اللى بيخبط على باب اوضتها .
فتحت الباب لقت عمر اخوها ساند نفسه على الباب ومستنى انها تفتحله .
عمر .. لسه بدرى يا اختى كل ده لحد ما تفتحى .. وايه ده بقى ان شاء الله انتى لسه بلبسك بتاع الشغل ما غيرتيش .. ايه ده كنتى بتعملى ايه يا همووووس من ورايا اعترفى .

همس خبطته على صدره بأيدها وقالتله ... يا شيخ اتلهى .. ابدا اول لما دخلت نمت على السرير وروحت فى النوم .

عمر .. على عمورة برضه يا همس .. ده بزمتك شكل واحده كانت نايمه .
همس بخجل .. يا عم بقى بطل رخامه .. وقولى كنت عاوز ايه اخلص عاوزة اغير لبسى اللى بيه من الصبح ده واخد شور .
عمر ... ماشى ماشى .. اهربى اهربى .. نبقى نشوف الموضوع ده بعدين المهم ماما بتقولك انزلى يالا علشان تجهزى معاها السفرة علشان الضيف اللى جاى يتعشى معانا النهارده زمانه على وصول .

همس باستغراب قلبها اتقبض وخافت لايكون اللى فى دماغها !!!!! ضيف مين ده بقى ان شاء الله وجاى ليه .

عمر .. والله ما عارف يا همس .. انا لسه عارف زيى زيك بالضبط وسألت ماما لما قالتلى اطلع ابلغك .. قالتلى بعدين يا عمر بعدين .. فاطلعت واقولتلك .
وبعدين يا خبر بفلوس بكره هايبقى ببلاش .
همس بخوف ... ماشى يا عمر روح انت وانا هاروح اخد الشور والبس وانزل على طول .

فى شقه سلمى كان الكل قاعد وبيتعشوا مع بعض .. الام وسلمى وعادل .

عادل لسلمى .. مالك يا سوسو انتى تعبانه ولا ايه ولا فى حد مزعلك .. شكلك مش عاجبنى من ساعه ما رجعتى من المطار .. ومش عاويدك فين الهزار والضحك والرخامه بتاعتك اللى اتعودت عليها .

الام ... فعلا يا عادل يا ابنى من ساعه لما رجعت وهى بالمنظر ده مش عارفه مالها .. ولما سألتها مردتش عليا .

سلمى .. مفيش حاجه يا جماعه اطمنوا انا تعبانه شويه وزهقانه مش اكتر .
عادل .. عليا برضه يا سلمى هو انا مش عارفك لما بتكدبى يا سوسو .. قوليلى بس نين مزعل القمر ده وانا اموته والله.
سلمى بحزن .. مفيش يا عادل .. مفيشةحاجه خالص .. وقامت من على السفره واستاذنت وراحت على اوضتها .
الام بحزن على منظر سلمى .. ابقى ادخل يا ابنى شوفها مالها . لانى من ساعه ما رجعت وانا حاولت اعرف مالها وهى مش عاوزة تقولى .. انتم مش اخوات وبس انتم كمان صحاب وهى بتحكيلك على كل حاجه .

عادل بحب ... حاضر يا امى اطمنى انتى ومتزعليش نفسك لا الضغط يعلى عليكى .

الام ... قوم يا حبيبى ادخلها وشوف هى زعلانه ليه وابقى طمنى .
عادل .. حاضر يا حبيبتى .. هادخلها بس بعد ما اشيل انا السفرة بدالك .
الام .. لا سيبها مالكش دعوة انت وانا هاشيلها واحده واحده .. وروح لاختك .
عادل .. حاضر يا امى عن اذنك .

وفعلا قام عادل ووصل لاوضه سلم وخبط على الباب ولما سمحتله انه يدخل دخل على طول .

عادل قرب منها وضمها لحضنه وقال .. مالك يا حبيبتى فى ايه .. انا حسيت انك مش عاوزة تقوليلى حاجه اودام ماما .. فجيتلك اهو علشان تقوليلى كل حاجه مزعلاكى .. مش انا عدوله برضه اخوكى حبيبك اللى بيوصلك كل شويه بعربيته .
سلمى زى ما يكون عادل داس على الجرح وما صدقت واتفتحت فى العياط فى حضنه .
عادل فضل يهديها ويحاول يعرف ايه السبب لحد ما بدأت سلمى تحكيله على كل حاجه مزعلاها وعلى موضوع شريف بالخصوص .. وطلبت منه انه ما يحكيش لمامتها اى شىء ويقولها اى شىء تانى عندها فى الشغل مزعلها وخلاص .

وفعلا عادل وعدها بكده وقالها ان همس ملهاش اى ذنب ومتزعليش منها .. وشريف بكرة يعرف ان همس مش بتحبه ويعرف مين اللى بتحبه فعلا وبجد .

سلمى استريحت من كلامها مع عادل اخوها لانهم اتعودا يحكوا لبعض على كل شىء من صغرهم وده اللى مخليهم قريبين من بعض دايما .. عادل قام وقف وحاول يطلعها من المووود وقالها عاوز كوبايه شاى حلوة كده من ايدك يا سوسو بعد الغدا الدسم ده وهاتيهالى على اوضتى لو سمحتى .
سلمى هانرجع للرخامه تانى والطلبات الكتير بتاعتك يا اخ انت ولا ايه .

عادل ... ايوا كده انا عاوز دايما اشوف سلمى ام لسان طويل ااااااد كده .

سلمى .. ماشى ماشى هاروح اعملك احلى كوبايه شاى يا معلم وجريت بسرعه من اودامه .
عادل !!!!!!!! معلم ... هى حصلت .. المهندس عادل يتقاله معلم .. عشت وشوفت يا نااااااس .
وبعدها خرج وراح على اوضته بعد ما اطمن ان سلمى رجعت لطبيعتها ولسانها الطويل .. ودخل وقفل الباب وراه .
مسك موبيله ورن على فارس علشان يشوفه وصل ولا لسه .. وثوانى وفارس رد عليه .
عادل .. فارس باشا .. اخبارك ايه وصلت ولا لسه يا هندسه .

فارس ... اهلا يا استاذ .. انا كويس ووصلت من بدرى بس كنت نايم ولسه يا دوبك صاحى وكنت هاكلمك .

عادل .. طب كويس انا اللى سبقت وكلمتك .. هاتنزل الشركه بكرة طبعا .
فارس .. اكيد طبعا .. الشغل وحشنى .. وزمانك عاكك الدنيا انا عارفك ما تسدش ابدا طول ما انا غايب .
عادل ... لا والله اخس عليك انا برضه كده يا فارس لا انا كده هازعل .
فارس بضحكه عاليه .. بهزر معاك يا حمار والله .. وبعدين انا عارف انك ادها واودود .. وعارف انى سايب وحش ورايا .. بس بحب استفزك .. ازى البت سلمى وازى طنط .
عادل .. كلهم بخير الحمد لله .. المهم .. مش هاتحكيلى بقى كنت مسافر ليه ومع مين.

فارس ... ماشى يا عادل سلام يا حبيبى هاتوحشنى .

عادل .. اهرب اهرب .. ماشى يا فارس .. بكرة هاعرف كل حاجه .
فارس .. سلام يا صاحبى اشوفك بكرة فى الشركه .
وقفل فارس مع عادل وقام ودخل على الحمام علشان ياخد شور ويفوق .
همس كانت خلصت ولبست طقم حلو وحطت مكياج رقيق وسرحت شعرها ونزلت على تحت علشان تشوف مين الشخص اللى بيجهزوله العشاء من الصبح ده واتمنت من جواها ودعت ربنا مايكنش الحيوان اللى اسمه فهد .

نزلت همس وراحت على الرسبشن وشافت السفرة جاهزة والكل قاعد بيستنى الضيف اللى مش عاوزين يقوله هو مين ولا ليها ولا لعمر اخوها حتى .

ولسه همس هاتتكلم سمعت جرس الفيلا بيرن .. وتوقعت ان اللى وصل هو الضيف المنتظر .
راحت ناحيه الباب وفتحت واتصدمت من اللى واقف اودامها .. بعيونه ونظراته الشهوانيه ليها دايما .
فضلت واقفه من الصدمه حوالى دقيقه من غير ما تتحرك ولا تقول اى حاجه وفاقت على فهد وهو بيقول لها حمد لله على السلامه يا قمر .
بنظرات كلها كره وخوف من همس لفهد جريت همس من غير ما ترد عليه ولا حتى تسمحله انه يدخل من الباب وطلعت بسرعه على اوضتها .
الاب استغرب من تصرف همس ده وقام بسرعه وراح ناحيه الباب علشان يشوف مين .

وقرب من الباب وعرف ان فهد هو اللى رن الجرس فبدا يرحب بيه ودخله على جوا بعد ما سلم عليه .

الاب ... اهلا وسهلا فهد باشا .. معلش سامحنى على تصرف همس معاك .. تلاقيها تعبانه من السفر لسه .
فهد لرضوان ... ولا يهمك يا رضوان انا عمرى ما اقدر ازعل منها ابدا .. ومد ايده وسلم علا عمر وعلى والدته .
عمر مد ايده ليه وقال برخامه لانه هو كمان مش بيستريح لفهد ولا لنظراته لهمس .. اهلا عن اذنكم هاكلع اشوف همس .
الاب اتكسف من تصرف عمر هو كمان وحاول يتوه الموقف وطلب من زوجته انها تبدا تجهز السفرة .

وبعد خمس دقايق قام الكل وراحوا على السفره وكان نزل عمر بعد شويه وبلغهم ان همس تعبانه ومش هاتقدر تنزل للعشاء .

فهد عرف طبعا ان ده حصل بسبب وجوده هنا وعمر طول الوقت كان قاعد ومش طايق فهد ده خالص .. وبالذات لما طلع عند همس وهمس عرفته انها مش بطيق فهد ده خالص ولا بتطيق نظراته الوحشه ليها .

الاب حاول يفك حاله السكوت دى خالص وبدا يسال فهد عن اخر مشاريعه وشغله .

فهد مردش عليه ولا على أسئلته دى .. وفجاه قال لرضوان انه عاوزه فى موضوع تانى خالص مهم جدا وعاوز الاجابه والرد فى اسرع وقت ممكن قبل رجعوه للاسكندريه .

رضوان باستغراب .. موضوع ايه ده يا فهد باشا انا تحت امرك .

فهد بكل بجاحه .... انا عاوز ؟
رواية فارس عشقي للكاتبة سحر فرج الفصل الثاني عشر

رضوان .... خير يا فهد باشا موضوع ايه المهم ده ؟؟؟؟

فهد بمنتهى البجاحه .. انا عاوز همس .
رضوان باستغراب .. عاوز همس .. اللى هو ازى يعنى ؟؟
فهد بضحكه عاليه اوى هزت اركان الفيلااااا

عاوز همس يا رضوان .. يعنى عاوز اتجوزها فهمت .. وعاوز الرد باسرع وقت ممكن بالكتير خلال يومين قبل ما ارجع على الاسكندريه .. وقام وقف وقال لرضوان انت فاهم .

رضوان من المفاجأه دى مكنش عارف يرد يقول ايه بس حاول يجمع نفسه وقال .. بسسسسسسسس .

فهد بغضب وعيون زى الوحش لرضوان قال ... بسسس ايه يا رضوان ... مفيش حاجه فى قاموس فهد الجبالى اسمها بسسسس بتاعتك دى .

وانت عارفنى ومن زمان اوى .. لما يعجبنى حاجه واعوزها بخدها من غير ما اطلب .. بس المرة دى قولت اقولك الاول .. انت مهما كان صاحبى ومن زمان .. ولازم اقولك الاول .
رضوان اتهز من طريقه فهد وشاف الغضب فى عيونه وقال ... بس همس صغيرة لسه على الجواز يا فهد وفى فارق سن كبير ما بينكم .. واحساسى بيقول ان همس مش هاتوافق على الجواز ده خالص .

فهد بغضب اكتر واكتر ... ومن غير ولا كلمه قال .. مستنى الرد خلال يومين يا رضوان .. ولا تحب اعرف الناس كلها مين هو رضوان الكاشف على حقيقته .. وخرج من الفيلا من غير اى كلمه زياده .

رضوان بصدمه ... اهبب ايه انا دلوقتى .. اهبب ايه يا ربى بس .
جت ام همس من المطبخ وهى معاها اطباق الحلويات وسمعت رضوان وهو بيكلم نفسه فاستغربت وحطت الصينيه اللى فى ايديها على التربيزه وسألته و قالت ..... خير يا رضوان فى ايه وفهد بيه راح فين .

رضوان ليها قال .... نصيبه يا سهير نصيبه وجت فوق دماغى .

سهير .. نصيبه ايه بس يا رضوان اهدى كده وقولى فى ايه بالضبط ومال وشك اصفر كده ليه .
رضوان بخوف وارتباك .... فهد يا سهير فهد .
سهير .. فهد ماله يا رضوان انطق .
رضوان بانكسار وخوف من اللى جاى ... فهد عاوز يتجوز همس .
سهير بصدمه .. انت بتقول ايه انت اكيد بتهزر صح .

رضوان .. اهزر ايه بس يا سهير .. انا فى مصيبه .. ولسه هايكمل كلامه كان نزل عمر من فوق من صوت ابوه العالى .. وقال فى ايه وصوتك عالى كدة ليه بابا؟؟؟؟

سهير اللى مكنتش مستوعبه اى حاجه من كلام رضوان ولا مصدقه كلامه اصلا ردت وقالت لعمر .. ابوك بيقول ان فهد عاوز يتجوز همس ... بس اكيد بيهزر .. صح يا رضوان قول انك بتهزر .

رضوان حط ايده الاتنين على وشه وقال .. انا مش عارف اعمل ايه ولا اتصرف ازاى .. انا عارف فهد كويس اوى وعارف لما يحط حاجه فى دماغه يبقى لازم ينفذها .. وانا مش هاقدر اقوله حاجه ولا موافق اصلا انه يتجوز همس بنتى .. ومتاكد ان همس كمان استحاله هاتوافق على الكلام ده ابدا ابدا . وعارف فهد كويس اوى ده انسان ما يعرفش حاجه اسمها لاااااا ومعندوش رحمه ابدا .. وهايخدها غصب عنها وعنى .. قولى يا عمر يا ابنى اعمل ايه واتصرف ازاى .


عمر بزهول .. انا مش مصدق ولا كلمه من الكلام ده كله .. وايه فهد ده كمان اللى هايمشينا على مزاجه وياخد حاجه مننا غصب عننا .. احنا لازم نوقفه عند حده .. انا هاروح واتكلم معاه وهاقوله انسى الموضوع ده خالص ... وعمر همس ما هاتكون لواحد مجرم ونصاب زيه ابدا .. واحد من عمر ابوها .. لا كده لانبلغ البوليس .

كل ده وهمس كانت واقفه على بعد مترين منهم وسمعت كل الكلام من ساعه ما عمر نزل لانها نزلت وراه على طول وفجاه الكل سمع حاجه وقعت جامد على الارض واتصدموا اول لما شافوا همس واقعه على الارض وفاقده الوعى .

جرى عمر بسرعه اول واحد ليها ونزل على الارض وحاول يفوقها .. همس .. همس .. همس .. حبيبتى فوقى .

وجه الاب والام بسرعه وحاولوا يفوقوها .
الام .. هااااااااامس بنتى حبيبتى .. فوقى يا قلبى .. فوقى .
الاب بعيون كلها دموع .. قومى يا بنتى .. قومى .. حقك عليا .. انا اللى استاهل من الاول .. انى اعرف واحد زى ده .. سامحينى يا بنتى ارجوكى تسامحينى .
عمر بسرعه شالها على ايده وطلع بيها على اوضتها علشان يفوقها .. وطلع وراه الام والاب .. بس للاسف فضلت فاقده الوعى رغم كل المحاولات اللى عملوها علشان تفوق .

لحد ما الاب طلب من عمر انه يطلب الدكتور فورا .

وفعلا اتصل عمر بالدكتور اللى جه فى اقل من عشر دقائق.
وكشف عليها الدكتور وبلغهم انها عندها صدمه عصبيه كبيرة ولازم تتنقل على المستشفى فورا وفى اسرع وقت .
الكل انهار واتصدم من كلام الدكتور .. واتصل الدكتور بالمستشفى وطلب عربيه اسعاف بسرعه على فيلا رضوان الكاشف وداهم العنوان .
فارس كان فى اوضته وكان مستنى على نار ان همس تتصل بيه زى ما وعدته انها هاتتصل بعد العشاء .
مسك موبيله واتصل عليها بس للاسف التليفون كان بيرن ويرن ومفيش حد رد عليه لان الموبيل كان فى اوضه همس على التسريحه والكل كان راح معاها على المستشفى .

عدى حوالى نصف ساعه تانى وفارس حاول يتصل مرة تانيه وبرضه مفيش اى حد بيرد عليه .

بدا فارس يقلق وحس بحاجه غريبه فى قلبه وقرر انه يتصل بسلمى اخت عادل ويحاول يطمن منها على همس .
اتصل فارس بسلمى اللى استغربت اوى اوى لما لقت موبيلها بيرن وعرفت ان فارس هو اللى بيتصل بيها فى الوقت المتأخر ده .

سلمى .. الوووووو

فارس .. ايوا يا سلمى .. انا اسف انى برن عليكى فى وقت زى ده .. اصل الصراحه انا قلقان على همس وبقالى فترة بحاول اوصل ليها مش قادر وحاولت كذا مره ارن عليها مفيش حد بيرد خالص .. فلو سمحتى يا سلمى ممكن انتى تتصلى بيها وتشوفى هى مالها علشان اطمن عليها .
سلمى .. حاضر يا فارس ولا يهمك وما تقولش كده .. انت تتصل فى اى وقت .. احنا اخوات .. ومفيش فرق بينا . .. تلاقيها قاعده فى الجنينه بتاعه الفيلا وسايبه الموبيل فى اى حته ومش سمعاه .. انا هاقفل معاك وارن عليها حاضر وابقى اطمنك .

فارس .. متشكر ليكى اوى يا سلمى معلش قلقتك معايا .

سلمى .. قولنا مفيش حاجه والله .. سلام دلوقتى هاتصل بيها وابقى اطمنك .
وفعلا قفلت سلمى مع فارس واتصلت على همس اللى موبيلها برضه كان بيرن ومفيش حد بيرد عليها خالص .
سلمى بدات تقلق هى كمان على صحبتها وقررت انها تتصل بام همس وتسألها عن همس .. وبعدين افتكرت ان الوقت متاخر اوى وزمان سهير هانم نامت من بدرى .. فقررت انها تتصل بعمر اخوه همس .

وفعلا اتصلت سلمى بعمر ورد عليها بعد كذا رنه .

سلمى .. مساء الخير ازيك يا عمر .
عمر بحزن باين اوى فى صوته قال .. مساء النور يا سلمى ازيك .
سلمى .. الله يسلمك .. معلش يا عمر كنت عاوزة اسألك عن همس اصل عماله ارن عليها علشان اسألها عن حاجه لرحلات بكرة اللى طالعه وهى مش بترد عليا خالص . وبقالى فترة على كده ومش قادرة اوصل لها .
عمر بألم .. همس فى المستشفى يا سلمى .

سلمى بصدمه .. انت بتقول ايه .. مالها همس يا عمر مااااااالها .

عمر بحزن .. تعبت شويه ونقلناها على المستشفى .. ادعيلها يا سلمى تقوم لنا بالسلامه ارجوكى .
سلمى... انتم فى مستشفى ايه انا هاجلكم حالا .
عمر اداها عنوان المستشفى وقفل معاها وراح وقف اودام الاوضه اللى فيها همس علشان مستنى الدكتور يطمنهم على حاله همس .
قفلت سلمى الموبيل وغيرت لبسها وخدت شنتطها وجريت على امها وعادل تبلغهم باللى حصل لهمس وطلبت من عادل انه ينزل يوصلها على المستشفى لان الوقت متاخر جدا .

عادل وامها اتصدموا من الخبر ده ووافق عادل انه ينزل معاها على المستشفى.. بس للاسف نسيت سلمى خالص انها تبلغ فارس اللى كان قاعد على نار مستنى رد سلمى عليه .

ركبت سلمى العربيه هى وعادل وبسرعه راحوا على العنوان الى عمر اداه لسلمى وسألوا عن اوضه همس وراحوا على هناك على طول .
وصلت سلمى لاوضه همس وخبتط ودخلت بسرعه وفضل عادل مستنى بره الاوضه .
سلمى اول لما دخلت شافت همس نايمه على السرير وفى دنيا تانيه خالص وبعيون كلها دموع .

قربت منها وقالت .. مالك يا حبيبتى الف سلامه عليكى .. فى ايه وايه اللى حصلك .

همس مش قادرة تقول ولا كلمه ودموعها هى اللى بتتكلم .
الام رضت على سلمى وقالت .. الحمد لله يا سلمى اطمنى يا بنتى .. هى هاتبقى بخير والدكتور طمنا .
قربت سلمى من همس وباستها وقالتلها الف سلامه عليكى يا حبيبتى ..ان شاء الله هاتقومى بالسلامه وتبقى احسن من الاول .
وفجاه موبيل سلمى رن وكان فارس هو اللى بيتصل عليها .. وسلمى طبعا ما قدرتش ترد عليه وعمر ورضوان وام همس واقفين جنبها فكنسلت عليه .
فارس طبعا كان مش طايق نفسه وقلقان على همس .. وزعل اكتر ان سلمى كنسلت عليه فارن تانى على سلمى .

سلمى سمعت الموبيل بيرن تانى وشافت اسم فارس .. فطلبت من عمر انه يدى الموبيل لعادل اخوها اللى واقف بره وخليه يرد .

عمر خد الموبيل من سلمى وعينه جت على اسم المتصل وشاف اسم فارس وافتكره لما شافه فى عيد ميلاد همس .
عمر خرج بره وسلم على عادل واداله الموبيل وبلغه ان سلمى عوزاه يرد على اللى بيتصل .
عادل استغرب باتصال فارس على سلمى وفى الوقت ده .. فامسك الموبيل من ايد عمر ورد على فارس .
فارس .. ايوا يا سلمى طمنينى همس مالها .

عادل مكنش عارف يقول ايه ولا يرد وعمر واقف .. بس فى الاخر رد وقاله ايوا يا فارس انا عادل .

عمر لما شاف ان عادل مش قادر يرد بحريه على فارس استاذن وراح على الكافيتريا .
فارس اتفاجاه ان عادل اللى رد عليه وساله عن سلمى .
عادل .. ايوا يا فارس معلش مش عارف ارد عليك .. انا وسلمى هنا فى المستشفى .
فارس بدقات قلبه اللى كانت مسموعه جدا من كتر الخوف والتوتر والقلق على همس قال .. انتم فى المستشفى ليه يا عادل همس حصلها حاجه .
عادل باستغراب .. الصراحه يا فارس ااااا .....

فارس .. انطق يا عادل .

عادل .. همس تعبت ونقولها على المستشفى واحنا عندها دلوقتى.
وقبل ما عادل يكمل كلامه كان قفل فارس الموبيل وشد مفاتيح عربيته من على التربيزه اللى جنب السرير .. وفى اقل من دقايق معدوده كان نزل وركب العربيه واتصل على عادل انه يبعت الابلكيشن بتاع المستشفى الى همس فيها .
وفعلا عادل بعت ليه الابلكيشن وساق بمنتهى السرعه الجنونيه ووصل اودام المستشفى.
عادل طبعا عرف ان فارس مجنون وهايجى وممكن يحصل مشكله بسبب وجوده.. فنزل تحت واستناه على باب المستشفى.
وفعلا وصل فارس بمنتهى السرعه وركن عربيته وجرى على ناحيه الباب و اتفاجاه ان عادل واقف مستنيه .

فارس بخوووووف وحزن وقلق .. مالها همس يا عادل ايه اللى حصلها .. انا لازم اطلع واشوفها واعرفها انى موجود وجنبها .. ارجوك يا عادل ودينى ( لهمسى ) ارجوووك .

عادل .. اهدى بس يا فارس ارجوك .. طلوعك دلوقتى وانت فى الحاله دى عند همس .. ممكن تسبب ليها مشكله كبيرة .. ابوها وامها واخوها فوق .. انا هاطلع بحجه انى اجيب سلمى وهاطمن بنفسى على همس واطمنك .

فارس .. انت بتقول ايه يا عادل انا لازم اطلع ودلوقتى حالا .

عادل .. ارجوك يا فارس اهدى واحلفلك انى هاطلع واشوفها بنفسى وانزل عل طول واطمنك .. لكن وجودك انت هايسبب مشكله ليها وليك .. انت مش عارف رضوان ده رخم اد ايه .
فارس بعيون كلها حب ودموع فى نفس الوقت .. بجد يا عادل .
عادل .. بجد يا فارس

فارس هدى شويه لما عادل وعده انه هايطمنه وقاله .. ماشى يا عادل ارجوك اطلع واطمن عليها بنفسك وخلى سلمى تقولها انى موجود ومعاها ومش هامشى من هنا الا وهى معايا .

عادل .. يااااه يا صاحبى .. ايه الحب ده كله وحصل امتى .
فارس .. مش حب يا عادل ده عشق .. همس بقت عشقى وعمرى وروحى وحياتى كلها .. من اول مرة عينى جت فى عيونها .
عادل .. ماشى يا صاحبى انا هاطلع وانزل اطمنك على طول .
وفعلا طلع عادل ووصل لحد اوضه همس وخبط على الباب وفتحله عمر اخوا همس وسمحله انه يدخل .
عادل .. مساء الهير يا حماعه .. والف سلامه على همس يا رضوان بيه وان شاء الله هاتقوم بالسلامه .. هى مالها وايه اللى حصلها .
رضوان .. تعبت شويه وان شاء الله هاتقوم على خير .

سهير .. باذن الله .. ادعيلها يا سلمى يا بنتى هى بتحبك وبتعتبرك اختها .

سلمى ان شاء الله هاتقوم بالسلامه .. واتفضلى انتى يا طنط ارجعى على البيت واستريحى وانا اللى هبات معاها النهارده .
الام .. لا طبعا انتى بتقولى ايه يا سلمى .
عمر لما شاف فى عيون عادل وسلمى كلام كتير عاوزين يقولوه لهمس قال .. سلمى عندها حق يا امى .. اتفضلى ارجعى على البيت انتى وبابا وانا هافضل هنا انا وسلمى وهانخلى بالنا من همس .

الام .. بسسسسسسسس .

الاب .. خلاص يا سهير ..عمر عنده حق . تعالى نرجع على البيت علشان تستريحى .. ومن بدرى هانيجى تانى .
وفعلا مشى رضوان وسهير بعد ما سلموا على الكل ووصوا عمر وسلمى انهم يخلوا بالهم من همس .
ولما نزلوا كان فارس واقف اودام الباب لسه واول لما شافهم حاول يبعد بعيد قبل ما حد فيهم يشوفه .. ويادوبك ركبوا عربيتهم ودخل فارس بسرعه وسأل على اوضه همس وطلع باقصى سرعه على فوق .

عمر وعادل كانوا راحوا يشربوا قهوة فى الكافيتريا ومفيش غير سلمى اللى معاها فى الاوضه .

باب الاوضه خبط وسلمى سمعته وراحت علشان تشوف مين على الباب .
فتحت سلمى الباب واتفاجأت بفارس اللى واقف وشكله ومنظره حزين جدا .
سلمى .. فارس .. انت هنا بتعمل ايه ؟

فارس .. همس عامله ايه يا سلمى انا لازم اشوفها.. فى حد معاها جوا .

سلمى .. لا مفيش بس عمر وعادل نزلوا الكافيتريا يجيبوا قهوة وطالعين تانى .
فارس .. انا لازم ادخل اطمن عليها ارجوكى يا سلمى .
سلمى .. بسسسسسسس .افرض عمر جه هانقوله ايه بس .
فارس .. اتصرفى يا سلمى ارجوكى .
سلمى .. ماشى يا فارس ادخل انت ليها وانا هاتصرف .

وفعلا دخل فارس وقفل الباب وراه .. وشاف همس وهى نايمه على السرير زى الملاك .

قرب منها ومسك اديها وباسها وقال .. الف سلامه عليكى يا همسى.. انا هاموت عليكى فوقى يا حبيبتى ارجوكى تفوقى .. انا بحبك اوى يا همس .. بعشقك يا روحى .. فوقى .. انا هنا وجنبك وعمرى ما هسيبك .. ودموعه كانت نازله من عيونه .. ودمعه منهم نزلت على وش همس .. اللى فتحت عيونها وشافت فارس اودمها وعيونه كلها دموع .

وبصوت ضعيف جدا قالت .. فااااااااارس

اطمن انا كويسه يا حبيبى .. متخفش عليا .
فارس .. انتى حصلك ايه وايه اللى وصلك لكده .
همس بعيون كلها دموع قالت .. مش وقته يا فارس ارجوك .. بعدين هاقولك على كل حاجه .. انا المهم عندى دلوقتى انك جنبى وحاسه بيك وشايفه خوفك عليا هو ده اللى انا محتجاه دلوقتى .. اوعى تبعد عنى يا فارس مهما يحصل ارجوك اوعدنى .

فارس باستغراب .. ليه بتقولى كده بس يا حبيبتى .. انا عمرى ما هاقدر ابعد عنك ابدا .. لاخر نفس فى حياتى هافضل جنبك بحبك وبعشقك انتى ( عشقى يا همسى ) وقرب من وشها وباسها بوسه رقيقه على خدها .

وللاسف الباب اتفتح ودخلت سلمى بسرعه وقالت .. الحق يا فارس .. عمر وعادل جايين هانعمل ايه بسرعه قول .
فارس .. مش هانعمل اى حاجه .. هاقول انى عرفت ان همس تعبت وفى المستشفى وانا جيت اطمن عليها .
سلمى .. ماشى .. ماشى .. وفى ثوانى كان دخل عمر الى كان شايل قهوة وسندوتشات كتير ليهم واتفاجاه بفارس اللى كان واقف قريب جدا جدا من همس . وده اللى خلاه يتاكد ان فى شىء بين فارس وهمس .. ومنظر فارس اللى بيدل على مدى حزنه وزعله على همس دليل كبير على شك عمر .
عمر .. فارس .. اهلا وسهلا بيك .

فارس ... ازيك يا عمر .. انا عرفت ان همس تعبانه وقولت اجى اطمن عليها .

عمر .. تنور يا فارس ويالا جيت فى وقتك .. تعالوا نقعد كلنا ونشرب القهوة وناكل السندوتشات دى علشان همس تتشجع هى كمان وتاكل اى حاجه علشان العلاج .. ماشى يا حبيبه قلبى .
عمر قرب من اخته وشاف عيونها المركزه اوى على فارس وفيها حب كبير ليه .. وده كان اكبر دليل لعمر على حب فارس وهمس .
عمر .. ااااايه روحتى فين يا همس بكلمك .
همس بتعب .. معاك يا عمر .
عمر .. طيب تعالى يالا اساعدك تقعدى علشان تعرفى تاكلى ولا اكلك انا بايدى .. ولا تحبى حد تانى يأكلك بنفسه.

همس ابتسمت وعرفت عمر بيلمح لأيه وقالت .. انا هاقوم لوحدى ما تتعبش نفسك انا الحمد لله بقيت كويسه .

عمر قرب منها اوى وقال بصوت واطى جدا ... يااااااه اخيرا الحمد لله .. بس ايه اللى حصل يعنى وقومتى على طول كده ولا فرحتى ان فارس جه يزورك .. اصل سلمى وعادل هنا من بدرى ..لكن اول لما شوفتى فارس .. قومتى على طول وعيونك بدات تنور تانى .
سلمى خدت بالها من عمر وهمس وقالت ... فى ايه يا عمر وبتقولها ايه خلتها تضحك كده .. ضحكونا معاكم .

همس ابتسمت واكتفت بالابتسامه دى .. وسلمى خدت ساندوتش وادته ليها وبدا الكل ياكل لكن فارس اكتفى بشرب القهوة .

وعدى حوالى ساعه على وجود فارس لحد ما حسوا ان عمر عاوز ينام ومحرج من وجودهم ده مع همس فى الوقت المتأخر ده .
عادل قرب من فارس وقاله انهم لازم يستأذنوا بقى ويمشوا علشان النهار قرب يطلع وكام ساعه كده يبقوا يرجعوا تانى .

فارس مكنش راضى بس من نظرات همس ليه فهمها على طول وقام وقف وطلب من عادل انهم يستأذنوا ويمشوا ويرجعوا تانى بعد كام ساعه .

وفعلا نزل فارس وعادل وعمر على تحت بعد ما طلبت سلمى من عمر انه يرجع هو كمان على الفيلا وهى اللى هاتبات مع همس .
الشباب نزلوا على تحت وخرجوا من باب المستشفى بس للاسف مخدوش بالهم من اللى كان بيراقبهم من بعيد وعرف انهم نزلوا .
رواية فارس عشقي للكاتبة سحر فرج الفصل الثالث عشر

الكل نزل وخرجوا من باب المستشفى ومخدوش بالهم من اللى كان واقف وبيتابع كل خطواتهم لحد ما ركبوا عربياتهم ومشيوا وبعدوا عن المستشفى خالص .

طلع موبيله واتصل بحد وبلغه ان همس لسه هنا وباتت معاها صاحبتها سلمى .
فهد ... تمام خليك عندك وراقب كل شىء وبلغنى بيه اول باول وانا جايلك حالا .
وفعلا خلال نصف ساعه كان وصل فهد بالبودى جارد بتوعه .. ووقف هو والراجل اللى تبعه وعرف كل شىء عن همس وعن حالتها ورقم اوضتها كمان .

فهد .. يعنى انت متاكد ان مفيش حد طلع لها تانى من اخر مرة كلمتنى .

الراجل .. لا يا فهد باشا .. انا متاكد ومتحركتش من مكانى لحد ما حضرتك جيت دلوقتى .
فهد ماشى اقف استنى هنا لما ندخل ونرجعلك ولو حد جه تعرفه من اهلها بلغنى على طول بالتليفون.
الراجل .. اوامرك يا فهد باشا .
فهد دخل للمستشفى ومعاه اتنين من رجالته وشاور لواحد منهم انه ينفذ اللى طلبه ومنه على طول .

وطلع فهد فى الاسانسير وكان البودى جارد اللى معاه شايل بوكيه ورد وعلبه شيكولاته ووصلوا للدور اللى كانت اوضه همس فيه .

ويادوبك خرجوا من الاسانسير وكانت سلمى خارجه من اوضه همس بس للاسف راحت اتجاه تانى غير اللى فهد جه منه .. ومخدتش بالها بوجود فهد واتجاهه ناحيه اوضه همس .

فلاش باك .

سلمى وهمس كانوا قاعدين فى الاوضه .. وهمس طلبت من سلمى انها تفضل قاعده لحد ما هى تدخل الحمام وتغير لبسها وتاخد شور دافىء علشان تعرف تنام كويس .. لانها كانت حاسه بالارهاق الشديد والتعب من كل اللى حصل وبالذات انها مش بتحب نوم السرير خالص ولا جو المستشفيات .
وفعلا دخلت همس وفضلت سلمى قاعده لوحدها وماسكه الموبيل وبتلعب فيه وفجاه التليفون الارضى الموجود فى الاوضه رن وقامت سلمى علشان ترد .
سلمى .. الوووو .. مين معايا .

الطرف التانى .. مساء الخير يا افندم .. احنا اداره المستشفى وعاوزين اى حد تحت فى الادارة طرف المريضه همس رضوان لو سمحتى .

سلمى بأستغراب ... ماشى حاضر ثوانى وانا هانزل بنفسى .. بس لو سمحتى هى الادارة فين بالضبط علشان مش عرفاها .
الطرف التانى ... حضرتك اخرجى من المبنى ده كله وهتلاقى مبنى اكبر اودام الباب الرئيسى للمستشفى وهناك المبنى الادارى كله .
سلمى .. حاصر خمس دقايق واكون عندكم سلام .
وفعلا قفلت سلمى معاهم وقربت من باب الحمام وقالت لهمس انها نازله لتحت وجايه علشان الادارة عوزاها .
همس باستغراب .. ماشى يا سلمى بس اقفلى الباب وراكى كويس عقبال ما اخرج .
سلمى .. ماشى يا حبيبتى .

باك .

وخرجت سلمى واتجهت اتجاه تانى خالص غير اللى فهد جه منه ونزلت على تحت .
فهد قرب من باب الاوضه وخد الشيكولاته وبوكيه الورد من البودى جارد وطلب منه انه يقف اودام الاوضه لحد ما هو يخرج .
وفعلا دخل فهد من غير حتى ما يستاءذن على الباب وقفل الباب وراه .
فهد دخل وعينه جت على السرير واستغرب ان همس مش موجوده فيه .. فاقرب من التربيزه اللى فى وسط الاوضه وحط الورد والشيكولاته وعينه جت على باب الحمام المقفول وتوقع ان اللى جوه همس .

فى عربيه فارس اللى كان حزين على همس واللى لحد دلوقتى مش عارف السبب الرئيسى لتعبها المفاجاه كده هو ايه .

كان طول الطريق من المستشفى للفيلا بتاعته سرحان فى همس وافتكر اول لقاء بينهم .. واد ايه هو اعجب بيها وحبها من اول نظره .. وافتكر لما سافر لها وقضوا احلى يوم فى حياتهم مع بعض .

وفضل فارس سرحان فى كل دقيقه وكل ثانيه قضاها مع همس اللى حبها بقى بيجرى فى دمه وبيعشقها وبقت عشق الفارس بالنسبه ليه .. وهايكون حبهم اسطورة كبيرة يحكوا لاولادهم واحفادهم عنه .


وفضل سرحان بالمنظر ده وافتكر لما كان معاها فى المستشفى .. لحد ما وصل لباب الفيلا بتاعته وعمل كلاكس العربيه علشان البواب يفتحله .

فهد قعد على الكرسى اللى جنب سرير همس وحط رجل على رجل واستنى لحد ما همس خرجت من جوا الحمام .
همس كانت لبست بيجامه رقيقه ولفت شعرها فى الفوطه وفتحت الباب واتصدمت اول لما شافت فهد اودامها .
همس بعصبيه ... انت ازاى تدخل اوضتى وتقعد كمان فيها من غير استأذان .. اتفضل اطلع بره .. بدل ما اخلى الامن يجى يطلعك بره .

فهد بضحكه عاليه ... امن يطلعنى برة هههههههه .. انا فهد الجبالى يا همس .. فاهمه مين هو فهد الجبالى .. وبعدين ادخل اى مكان انا عاوزه من غير استأذان يا حلوة .. وقام وقف وقرب من همس اللى بدات تتوتر وتبعد عنه كل لما يقرب هو .

فهد .. انا حبيت اجى بنفسى واطمن عليكى واقولك الف سلامه .
همس .. مالكش دعوة بيا خالص .. انا كويسه ومش عندى اى حاجه .. والموضوع الى انت طلبته من بابا ده تنساه خالص .. انا مش موافقه .. نجوم السماء اقربلك يا فهد بيه .. وبابتسامه كلها استحقار بيه قالت .. وبعدين مش عيب عليك تتجوز واحده من دور عيالك .
فهد بدات ملامحه تتغير للاوحش واتعصب وقال ... انا فهد الجبالى وهاتجوزك يا همس .. برضاكى او من غير راضاكى .. وهاتيجى انتى بنفسك وتطلبى انى اتجوزك .. وقريب اوى اوى .

همس بتوتر .. ده مستحيل يحصل وعلى جثتى انت فاهم واتفضل اطلع بره .

فهد قرب منها اوى وقال .. هو من ناحيه جثه فاهيبقى فى جثه .. لو مش هاتتجوزينى يا حلوة هاموت فارس الحسن حبيب القلب بتاعك انتى فاهمه ولا مش فاهمه .
وخلال يوم باكتير هاتسمعى خبره وتقرى عليه الفاتحه وهاتجوزك برضه .
همس بدات تعيط جامد وفضلت تصرخ لحد ما وقعت على الارض .. وفى اللحظه دى دخلت سلمى على صريخها وجريت عليها وشافت فهد اللى كان واقف قريب منها . واول لما دخلت سلمى فهد قال .. مستنيكى يا قطه .. اوعى تتاخرى عليا يا عروسه .

همس ... ااااااااااخرج برررررره يا حيوااااان .

سلمى .. اهدى يا حبيبتى اهدى ارجوكى .. وجريت بسرعه ورنت على مفتاح الجرس اللى فوق السرير بتاع همس علشان الدكتور يجى بسرعه .
لكن للاسف همس فقدت وعيها من كتر الصريخ والعياط الل كانت فيه .
والكل جه الداكترة والممرضين واستغربوا من همس اللى كانت نايمه على الارض وبسرعه شالوها ورفعوها على السرير وطلبوا من سلمى انها تطلع بره الاوضه خالص لحد ما يكشفوا على همس .

فهد طبعا كان مشى وساب المكان خالص .. وسلمى وقفت بره وكانت خايفه جدا على همس و حاولت تعيد كل اللى حصل لها من ساعه ما التليفون الارضى رن عليها لحد ما رجعت تانى على اوضه همس .

سلمى اول لما نزلت من المستشفى وراحت على المبنى الادارى اللى بلغوها بيه بالتليفون .. راحت وفعلا طلع المبنى الادارى .. ووصلت لحد اوضه المسوؤل وخبطت على الباب .

سلمى خبطت على الباب ودخلت وقالت .. مساء الخير .. انا سلمى اللى تبع المريضه همس رضوان وحضراتكم طلبتوا منى انى اجى دلوقتى.

المسوؤل باستغراب بص ليها اوى وقال .. اهلا بحضرتك بس مفيش حد اتصل بحضرتك وطلب انك تيجى دلوقتى .
سلمى بتعجب ... لا حضرتك فى حد كلمنى وطلب منى انى اجى دلوقتى لامر مهم .
المسوؤل .. لا طبعا مفيش حد .. وبعدين لما نبقى محتاجين اى شىء بنروح بنفسنا لاوضه المريض .
سلمى باستغراب .. مش فاهمه حضرتك طب ازاى وايه الغرض انى اجى هنا دلوقتى واسيب المريضه فوق لوحدها .
المسوؤل .. انا اسف لسيادتك .. بس انا متاكد من كلامى كويس واسفين على ازعاجك يا افندم .

باك .....

وفعلا عرفت واتاكدت سلمى ان الى عمل كده هو فهد والناس اللى تبعه علشان تنزل وتسيب همس لوحدها فى الاوضه وقالت لنفسها طب ليه وهو عاوز منها ايه وايه اللى يجيبه فى وقت بدرى اوى زى ده علشان يزورها ؟؟؟؟؟.. بس استغربت اكتر .. لما افتكرت انهيار همس بسبب فهد وايه السبب اصلا لتعبها ووصولها للحاله دى .
والى استغربت ليه اكتر لما قال فهد لهمس .. سلام يا عروسه .. وفاقت من سراحنها على فتح باب الاوضه.
وخرج الداكترة وطمنوا سلمى .. بس فى نفس الوقت سألوها عن سبب سوء حالتها بالمنظر ده بعد ما كانت بدات حالتها تتحسن وطلبوا منها انها ما تتعرضش لاى ضوغطات خالص واى شىء يزعلها لانه هايضرها اكتر ويقلب الحاله لانتكاسه ممكن تاذيها اكتر وتدهور حالتها .

سلمى شكرتهم وقالت .. انا متشكرة جدا .. وان شاء الله هانخلى بالنا منها ومن صحتها ونفسيتها .. واستاذنت ودخلت لهمس اللى كانت نايمه من الحقن المهدئه .. فشدت كرسى وفضلت قاعده جنبها لحد ما الساعه وصلت لتسعه .

فهد كان رجع على الفندق اللى هو كان نازل فيه وكان طلب من البودى جارد بتوعه انهم ينفذوا حاجه مهمه هو طلبها منهم وهى انهم يراقبوا خطوات فارس كويس اوى من اول لما يخرج من الفيلا بتاعته لحد ما يروح الشركه . ويبلغوه اول باول بكل شىء . وبالذات لو راح على المستشفى عند همس .

وفى فيلت فارس .. كان هو فى اوضته وعلى سريره بس للاسف مش جايله نوم خالص من ساعه ما رجع من عند همس من المستشفى وفضل يفكر كتير جدا فى كل حاجه حلوة حصلت بينهم من ساعه ما شافها ساعه الحادثه البسيطه اللى حصلت بينهم ..

لحد ما سابها نايمه على السرير فى المستشفى .

وفى الاخر اعترف لنفسه انه مش هايقدر يبعد عنها بعد كده خالص و قرر انها اول لما تخرج من المستشفى هايطلب اديها من باباها على طول لانه بيعشقها ومش قادر يبعد عنها نهائى وفضل يفكر كتييير لحد ما عينه راحت فى النوم فترة قصيرة جدا .

وعلى الساعه عشرة قام فارس من النوم واتفاجاه ان الساعه داخله على عشرة وربع واول حاجه عملها انه اتصل بسلمى علشان يطمن على حبيبه قلبه همس .
مسك الموبيل ورن على سلمى وفعلا سلمى ردت عليه على طول لانها كانت صاحيه وكانت يادوبك لسه قافله الموبيل مع رغد وبتبلغها بكل حاجه حصلت لهمس وانها معاها فى المستشفى وبالمرة تبلغ اداره المطار بكده علشان يبقى عندهم خبر .

فارس ... صباح الخير يا سلمى .. اخبار همس ايه دلوقتى طمنينى .

سلمى .. صباح النور .. الحمد لله يا فارس هى بخير اطمن ونايمه من ساعه ما الدكتور............ وسكتت
فارس حس بقلق فى صوت سلمى وقال .. فى ايه يا سلمى بالضبط ومال صوتك .. هى همس تعبت تانى ولا ايه .. انا عاوز اعرف فى ايه بالضبط وايه سبب تعبها ارجوكى يا سلمى .

سلمى .. ابدا ابدا مفيش حاجه بس هى نايمه دلوقتى وتعبت شويه بعد ما انت وعمر وعادل نزلتوا والدكتور جالها واداها حقنه مهدئه ومن ساعتها وهى نايمه .

فارس .. ايه اللى تعبها ما انا كنت سايبها كويسه.. على العموم ماشى يا سلمى مسافه السكه واكون عندكم يالا سلام .
فارس حس بحاجه فى صوت سلمى وقلق تانى على همس وقام بسرعه من السرير ودخل على الحمام علشان ياخد شور ويلبس ويروح على المستشفى .
سلمى بعد ما قفلت مع فارس اتفاجات بعمر ومامته داخلين الاوضه .

عمر .. صباح الخير يا سلمى اخبار همس ايه دلوقتى .

الام .. طمنينى يا سلمى بنتى عامله ايه دلوقتى .
سلمى .. اطمنوا همس كويسه والله وبقت احسن شويه بعد ما خدت الحقن المهدئه تانى .
عمر !!!!!!! حقن ايه يا سلمى .. ما كانت كويسه ورجعت زى الاول .. هو حصل ايه بالضبط علشان تاخد مهدئات تانى .
الام قربت من همس وقلقت عليها وقالت .. فى ايه يا سلمى مالها همس .

سلمى .. اهدوا يا جماعه .. هى تعبت شويه تانى بعد ما انتم مشيتوا يا عمر والدكتور جه بسرعه واداها حقنه مهدئه ونامت .

عمر باستغراب ... لا اكيد حصل حاجه فى ايه يا سلمى .
سلمى ... الصراحه هى تعبت اوى وانهارت لما فهد جه وزارها وقالها حاجه زعلتها وبعدها على طول تعبت جدا وفضلت تصرخ لحد ما انهارت .
عمر ... الحيوان ده انا مش هاسيبه والله لاموته لو قرب منها تانى .. هو عاوز منها ايه .. أنا لازم اوقفه عند حده وقرب من الباب وكان عاوز ينزل يروحله لولا امه جريت عليه وحاولت تهديه لما شافته كده .

الام .. اهدى يا عمر علشان خاطرى .

عمر .. لا يا ماما مش هاهدا .. الحيوان ده مش هاخليه يقرب من همس تانى .. انا هاموته والله لو فكر حتى انه يقرب جنبها .
سلمى .. هو عاوز منها ايه يا عمر وايه اللى وصل همس لكده وايه سبب تعبها اصلا .. انا مش فاهمه حاجه خالص .
عمر .. الحيوان ده اللى من سن بابا تقريبا عاوز يتجوز همس اختى ومن ساعه ما همس عرفت بكده وهى مصدومه وتعبت ونقلناها على المستشفى .
سلمى اتفاجأت من كلام عمر وقالت .. انت بتتكلم بجد .. فهد ده عاوز يتجوز همس ازاى ده .

الام .. خلاص يا عمر مش وقته الكلام ده يا ابنى .

عمر .. لا مش خلاص ولو بابا مش قادر يقف ويبلغه برفض همس انا اللى هاقف واقوله ان همس مش عوزاك واستحاله انك تتجوزها .
وفجاه سمعوا صوت همس وهى بتنادى على عمر بصوت واطى جدا .
همس ... عمر .. عمر
عمر جرى بسرعه وقرب من اخته ومسك ايديها وقال .. حبيبه قلبى الف سلامه عليكى يا عمرى عامله ايه دلوقتى .

همس بصوت هادى قالت .. الحمد لله .. انا كويسه .. وارجوك يا عمر مالكش دعوة بفهد ده خالص .. ده انسان مجرم وممكن يأذيك .

عمر ... متخافيش عليا يا حبيبتى .. المهم دلوقتى انك تقومى بالسلامه وترجعى زى الاول واحسن .
همس .. اطمن انا كويسه .
الام ... الحمد لله يا حبيبتى قلقتينى عليكى.. ومتخافيش استحاله فهد ده يقرب منك تانى وانا بقى اللى هاقف لابوكى فى الموضوع ده .
سلمى اللى كانت واقفه مصدومه ومش قادرة تنطق باى كلمه بعد اللى عمر قاله وبلغها بسبب تعب همس .
وفجاه سمعوا خبط على الباب وراح عمر وفتح وشاف رغد وجنه جايين علشان يطمنوا على همس بعد ما سلمى بلغت رغد .

فلاش باك

سلمى .. صباح الخير يا رغد
رغد .. اهلا سلومه صباح النور .. ايه اللى اخرك يا هانم لحد دلوقتى الساعه داخله على عشرة ونصف ولا راحت عليكى نومه .
سلمى بصوت حزين .. ابدا يا رغد انا صاحيه من بدرى .. ده انا حتى مع همس فى المستشفى.
رغد بصدمه .. مستشفى .. مستشفى ايه .. ومين تعبان طمنينى فى ايه يا سلمى .

سلمى .. همس تعبت جدا باليل ونقلوها على المستشفى وانا اول لما عرفت بكده جيت لها انا وعادل وقولت اتصل بيكى دلوقتى علشان اعرفك وبالمرة تبلغى الادارة بكده .. وكويس ان همس ملهاش رحلات الاسبوع ده .

رغد .. طب هى مالها بالضبط وتعبانه من ايه دى كانت كويسه .
سلمى .. مش وقته خالص يا رغد انا مش عارفه اى شىء لحد دلوقتى .

رغد ... ماشى يا سلمى الف سلامه عليها وانا فورا هاكون عندكم .. ادينى العنوان بسرعه علشان اجيلكم .

وفعلا سلمى اديتها عنوان المستشفى ورغد اتصلت على جنه اختها علشان تبلغها هى كمان بتعب همس لان جنه بتحبها جدا جدا هى وسلمى وبالمرة علشان تقابلها عند الجامعه و تروح معاها على المستشفى .

باااااااك .

دخلت رغد وجنه اللى اول لما شافها عمر قلبه فضل يدق ويدق كتير لمجرد بس انه شاف جنه .
قربت رغد من همس وقالت .. الف سلامه عليكى حبيبتى وقربت منها اكتر وباستها .
جنه هى كمان بكل رقه قربت وسلمت على ام همس وعلى سلمى وعمر ..وراحت اتجاه همس وقالت لها الف سلامه عليكى يا قلبى .
عمر عيونه ما تشالتش من على جنه وحس بحاجه غريبه بتشده ليها اكتر واكتر وفضل على حال ده طول ما هما موجودين .
وفجاه موبيل سلمى رن وكان عادل بيتصل عليها .. ففتحت وردت عليه وفجاه صرخت سلمى بصوت عالى انت بتقوووووول ايه !!!!!!!!!!
عاا
رواية فارس عشقي للكاتبة سحر فرج الفصل الرابع عشر

سلمى ... انت بتقول ايه يا عادل وحصل امتى الكلام ده .

همس قلبها دق جامد وعيونها كلها على ملامح سلمى ورد فعلها من مكالمه عادل .
سلمى .. ماشى يا عادل ثوانى وهاكون عندك سلام .
همس بخوف .. فى ايه يا سلمى حد حصله حاجه .
سلمى بتوتر .. لا ابدا ابدا يا حبيبتى بس انا لازم انزل فورا .

ام همس .. خير يا بنتى فى ايه قلقتينى .

سلمى .. ابدا يا طنط بس لازم انزل دلوقتى حالا عن اذنكم .. وفتحت سلمى باب الاوضه وهى بتهرب من عيون همس علشان مش هاتقدر تبلغها باللى هى عرفته .
خرج عمر ورغد ورا سلمى بسرعه علشان يعرفوا فى ايه بالضبط .
عمر .. خير يا سلمى فى ايه طمنينى .
رغد .. فى ايه يا سلمى ومال وشك مش طبيعى اكيد حصل حاجه .

سلمى بعيون كلها دموع .. عادل قالى ان فارس عمل حادثه كبيرة اوى وناقلوه على المستشفى وحالته خطيرة جدا .

رغد بصدمه صرخت وقالت .. انتى بتقولى ايه .. فارس عمل حادثه طب ازاى وفين .
عمر .. ازاى حصل كده ده لسه كان معانا من كام ساعه وكان كويس .. هو فى انهى مستشفى وانا اجى معاكى .
سلمى ... اهدى يا رغد ارجوكى علشان همس ما تحسش باى شىء كفايه اللى هى فيه .

عمر فهم قصد سلمى .. واتأكد ان فارس وهمس بيحبوا بعض اوى .. ولو همس عرفت حاجه زى كده عن فارس ممكن تتعب اكتر وحالتها تتدهور اكتر واكتر .

سلمى .. انا لازم اروح دلوقتى على المستشفى اللى فيها فارس علشان اطمن عليه .
عمر .. طب ادخلى انتى يا رغد دلوقتى علشان زمان همس قلقانه واخليكى جنبها انتى وجنه لحد ما ارجع من عند فارس واطمنكم .
رغد .. ماشى يا عمر وابقى طمنى على الموبيل اول لما تطمنوا على فارس .
عمر .. ماشى يالا سلام .

وفعلا نزل عمر وسلمى وراحوا على المستشفى اللى عادل قال لسلمى عليها .

رغد كانت دخلت عند همس وشافت مليون سؤال وسؤال فى عيون همس بس طبعا حاولت تهرب منها علشان مش هاتقدر تقولها اى حاجه تخص فارس حبيبها .

عند فهد فى الفندق .. كان ماسك موبيله وبيتكلم مع حد وكان فرحان جدا من اللى بيكلمه وسمعه منه .

فهد .. برافووو عليكم .. هو ده الشغل الصح .. اهم حاجه ان محدش يكون شافكوا وانتم بتقطعوا فرامل العربيه او يكون فى كاميرات صورتكوا .
الطرف التانى .. اطمن يا فهد باشا عملنا حساب كل شىء ومحدش شافنا .. وفعلا كان فى كاميرات بس ما تقلقش قدرنا نكسرها .
فهد .. برافو يا رجاله وليكم عندى مكافأه حلوة .. بس ياريت تكون اصابات وبس وما يحصلوش حاجه .
الطرف التانى.. لا من ناحيه كده اطمن يا باشا .. احنا لسه نازلين من المستشفى اللى نقلوه فيها وعرفنا ان حالته خطيرة بس هايقوم منها ومفيش خطورة على حياته .
فهد بضحكه خبيثه زيه ... ماشى يا رجاله الله ينور عليكم .. يالا سلام .

اودام باب المستشفى كان وصل عمر بعربيته وركنها على جنب ونزل هو وسلمى وبسرعه دخلوا على جوا .

دخلوا على الاستعلامات وسألوا عن فارس الحسن .. وبلغوهم انه دخل العمليات من ربع ساعه .
وفعلا راحوا على الاسانسير ونزلوا اودام الدور اللى يخص اوض العمليات واول لما وصلوا .. كان الكل موجود .
عادل وابوا فارس ووالدته.

سلمى .. سلامو عليكم .. خير يا جماعه طمنونا .

عمر .. اخبار فارس ايه يا عادل طمنى .. وحصل كده ازاى وفين .
عادل بحزن على صاحبه وصديقه وبيعتبره اخوه قال ... هو فى العمليات دلوقتى وربنا يستر .
سلمى .. هو حصل ايه بالضبط يا عادل .

عادل .. انا كنت فى الشركه وعمى اتصل عليا وبلغنى ان فارس عمل حادثه ونقلوه على المستشفى.

الاب .. انا كنت فى البيت وجالى تليفون من المستشفى وبلغتنى ان فارس ابنى عمل حادثه كبيرة اوى وحالته خطيرة ونقلوه على المستشفى .. وطبعا اتصدمت ومعرفتش اتصرف غير انى اتصلت بعادل علشان ابلغه ويجى بسرعه على هنا لان الشركه قريبه جدا من المستشفى وهايكون اسرع منى .
وفعلا بلغت الحاجه والدته وجينا لقينا عادل هنا قبلنا بس للاسف ملحقناش نشوف فارس وربنا يستر ادعوله يا ولاد انا ماليش غيره من بعد ما اخوه مات فى حادثه برضه.

الام ... يا حبيبى يا ابنى .. يارب تقوم بالسلامه .. انا ماليش غيرك يا قلبى .. خدوا عمرى كله وهو يقوم ليا بالسلامه .. وفضلت تعيط جامد .

سلمى قربت منها وحاولت تهديها وطمنها . وتقولها انه ان شاء الله هايقوم بالسلامه ويرجع احسن من الاول .
الام .. ياااارب يا بنتى ياااااارب .
شويه وكان فى ضابط وصل واتنين عساكر وسألوا عن حد من طرف فارس الحسن .
عادل .. ايوا يا افندم خير فى ايه ؟؟

الضابط .. الف سلامه عليه .. بس كنت عاوز حد ابلغه باللى وصلنا ليه وبدانا نعاين مكان الحادث ونحقق فى سببه واكتشفنا ان الفرامل بتاعه العربيه مقطوعه وهى اللى اتسببت فى الحادثه .

عمر كان واقف جنب عادل وسمع كل كلام الضابط واستغرب جدا وسأل نفسه مين اللى ممكن يعمل كده لفارس وعاوز يخلص منه .. وحس باحساس غريب جدا وحس ان ممكن يكون فهد الجبالى ليه سبب فى كده .. بس رجع فى تفكيره ده وبعد الفكرة دى عن دماغه .
عادل والاب اتصدموا من كلام الضابط واستغربوا اوى مين اللى ممكن يعمل كده فى فارس .. لان فارس محبوب جدا فى مجال شغله والكل بيحترمه ويحبه .
عادل .. طب حضرتك فى ايه ممكن نعمله علشان نعرف مين ورا الحادث ده .

الضابط .. احنا هانحقق فى الموضوع ونعاين العربيه تانى ونرفع البصمات من عليها ونعاين مكان الجراج بتاع العربيه وكاميرات الفيلا كلها .

الاب ... انا عاوز اعرف مين اللى ممكن يتجرأ ويعمل كده فى فارس ابنى .. هما مش عارفين هو مين وابن مين .
الضابط .. اهدى يا افندم وان شاء الله هانوصل لكل شىء فى اقرب وقت .
الاب .. ان شاء الله .

همس كانت فى اوضتها واتوترت اكتر واكتر من ساعه ما سلمى جالها تليفون من عادل اخوها .. وحست ان فى شىء وحش حصل لفارس .. وافتكرت تهديد فهد ليها ان ممكن يأذى فارس علشان توافق بالجواز .

طلبت من رغد تقولها فى ايه بالضبط . بس للاسف رغد مش قادرة تبلغها باى شىء خوفا على صحتها .. فهربت من سؤالها وغيرت مجرى الكلام .
همس حست واتاكدت ان فعلا حصل حاجه لفارس فطلبت من رغد انها تديها موبيلها .
رغد .. هاتكلمى مين بس يا همس وانتى تعبانه كده يا حبيبتى .

همس .. ارجوكى يا رغد لو سمحتى ادينى الموبيل .

رغد .. يا بنتى انتى تعبانه بعدين ابقى اتكلمى براحتك .
همس بصوت عالى .. ادينى يا رغد الموبيل انتم اكيد مخبين عنى حاجه .. فارس حصله ايه قوليلى .. ارجوكى يا رغد قوليلى انا بمووووت من جوايا حرام عليكى .. فاااااارس يا فاااارس .

الام جريت على بنتها ورغد كمان وحاولوا يهدوها بس للاسف انهارت همس وبسرعه جريت جنه وفتحت باب الاوضه وطلبت الدكتور فورا .

فى المستشفى عند فارس كان الدكتور خرج من اوضه العمليات وجرى عليه الكل علشان يطمنوا على فارس بعد العمليه اللى فضل فيها وقت كبير .
الاب .. خير يا دكتور طمنى .. ابنى عامل ايه وحالته عامله ايه بالضبط ارجوك يا دكتور قولى الحقيقه .
الدكتور .. اطمن حضرتك .. هو كويس وان شاء الله هايقوم بالسلامه بعد ما عملنا العمليه .

احنا عملنا العمليه والحمد لله ان الجرح بعيد عن المخ بحاجه بسيطه جدا جدا وكل ده بفضل ربنا ودعواتكم طبعا .. هو هايفضل تحت الملاحظه اربعه وعشرين ساعه وبعدها هايكون كويس باذن الله .. اطمنوا .

الاب بفرحه .. الف حمد وشكر ليك يارب الف حمد وشكر ليك يارب .. انا متشكر جدا يا دكتور .
الدكتور .. الفضل والشكر لله وربنا يطمنكم عليه بعد اذنكم .
وفعلا مشى الدكتور والكل فرح ان فارس الحمد لله عمل العمليه ونجحت والدكتور طمنهم .

الدكتور بسرعه دخل لهمس وطلب من الكل الخروج بره الاوضه وبعدها حاولوا يهدوها وادوها الحقن المهدئه وطلبوا من الممرضه منع الزيارة نهائى عنها لان الحاله كل مادا تدهور اكتر واكتر .

الام .. يا حبيبتى يا بنتى .. ايه بس اللى حصل لده كله .. وفى ايه بينها وبين فارس الحسن ده يا رغد يا بنتى قوليلى كل حاجه .. انا امها ومن حقى اعرف بنتى فيها ايه ارجوكى يا رغد.
رغد .. اهدى يا طنط وان شاء الله هاتبقى كويسه .
الام .. لا قوليلى بنتى مالها ومال فارس وفى بينهم ايه؟؟؟

رغد .. الصراحه يا طنط همس وفارس بيحبوا بعض جدا من فترة .. وفارس عمل حادثه كبيرة .. وسلمى لما عرفت لما الموبيل رن اتصدمت ومكنتش مصدقه لانه صاحب اخوها عادل ومتربين مع بعض .. وعمر وسلمى راحوا بسرعه على المستشفى اللى فيها فارس علشان يشوفه حصله ايه بالضبط ... وهمس شكلها حست ان فارس حصله حاجه .. وانا مقدرتش ابلغها بكده .

الام .. يا حبيبتى يا بنتى .. الله يكون فى عونك انتى هتلاقيها منين ولا منين . مش كفايه اللى انتى فيه من ساعه موضوع فهد الزفت ده .. وهو السبب فى وجودك فى المستشفى وحالتك دى .

رغد .. هو فى ايه بالضبط يا طنط وايه سبب وجود همس فى المستشفى ووصولها للحاله دى .

الام بحزن على بنتها .. همس انهارت لما عرفت ان فهد الجبالى عاوز يتجوزها وطلب ايديها من باباها .
رغد بصدمه مين يتجوز مين؟؟ فهد ده عاوز يتجوز همس اللى من دور عياله هو اتجنن ده ولا ايه .. مش شايف الفارق الكبير اللى بينهم .. وازى يطلب حاجه زى كده اصلا.

الام بحزن وعياط .. اهو ده اللى حصل يا رغد يا بنتى .. ربنا يستر من الجاى .. قلبى مش مطمن .. ربنا يشفيكى يا بنتى يارب .

رغد .. ربنا يستر ان شاء الله . وهمس هاتقوم بالسلامه باذن الله وهاتبقى احسن من الاول .
وفى المستشفى عند فارس كان خرج من اوضه العمليات ونقلوه على اوضه خاصه بيه .. وكان معاه والده ووالدته وعادل .. وسلمى وعمر.
فارس وهو بيفوق من البنج كان الاسم الوحيد اللى بيقوله هو اسم حبيبته وعشقه وروح قلبه همس .
وطبعا الاب والام كانوا مستغربين مين همس دى اللى فارس مش بينطق غير اسمها .
لكن طبعا عادل وسلمى كانوا عارفين هى مين وبتكون ايه لفارس بالضبط .

لكن عمر كان واقف وعرف ان حب فارس لهمس كبير اوى .. ومش حب بس ده يعتبر عشق كمان .

ومن احراجه استاذن علشان يرجع لهمس .
بعد ما اطمن على فارس فاخرج عمر وسلمى ورجعوا تانى على المستشفى لهمس.
عمر بعد ما نزل هو وسلمى وركبوا العربيه بتاعته قال .. سلمى هو انا ممكن اسالك سؤال لو سمحتى وتجاوبينى بصراحه عليه .
سلمى .. اوى اوى يا عمر اتفضل .
عمر .. هو فارس وهمس بيحبوا بعض .
سلمى اتفاجات من سؤال عمر وسكتت .

عمر .. ارجوكى يا سلمى لان اجابتك على سؤالى ده هايعرفنى حاجات كتير لازم اعملها علشان احافظ على الحب ده .. علشان خاطر اختى اولا .. انتى عارفه انى ماليش غيرها ولازم اعمل كل اللى فى وسعى علشان اقدر اسعدها .

سلمى .. بجد يا عمر .
عمر بجد يا سلمى والله انتى اكيد عارفه همس بالنسبه ليا ايه .. دى اغلى ما عندى وعاوزاها دايما سعيده وفرحانه.

سلمى .. فارس وهمس بيحبوا بعض جدا جدا من فترة تعتبر قصيرة مش كبيرة .. بس الحب ده كأنه بقاله سنين طويله .. وهمس سعيده وفرحانه جدا بالحب ده لان فارس فعلا راجل بمعنى الكلمه واخلاقه كويسه و يعتبر صاحب اخويا عادل من وهما صغيرين وكنا ساكنين مع بعض زمان فى نفس العمارة .. بعنى اوضح اننا متربين مع بعض وبعتبره زى اخويا عادل بالضبط .. وانا عمرى ما هلاقى لهمس حد انسب من فارس والله يا عمر .

عمر خد نفس طوييييييل وقال .. كلامك مضبوط يا سلمى .. انا قابلت فارس مرتين تلاته وعرفت وحسيت انه فعلا راجل يعتمد عليه .. ولاحظت حب همس ليه وحبه لهمس من مجرد نظراتهم لبعض .

سلمى ... كل اللى انا خايفه منه يا عمر دلوقتى موضوع فهد ده .. هو عاوز ايه بالضبط من همس .

عمر .. للاسف يا سلمى هو طلب ايديها من بابا .. وهو سبب الحاله اللى وصلت لها همس من ساعه ما عرفت .. بس على جثتى انه يقرب منها او اى حد يقدر يغصبها على حاجه هى مش عوزاها حتى لو الحد ده هو بابا نفسه .
سلمى .. ربنا يستر يا عمر ويعديها على خير ويقوم فارس بالسلامه وتقوم همس هى كمان بالسلامه .
عمر .. يااااارب يا سلمى .

وصل عمر وسلمى عند المستشفى وراحوا على اوضه همس .. وكانت رغد استاذنت هى وجنه علشان سايبين مامتهم لوحدها ووعدوا ام همس انهم هايرجعوا تانى باليل ويطمنوا عليها .. وسابوا همس مع مامتها بعد ما اخدت العلاج والمهدئات بتاعتها .

دخلوا الاوضه وشافوا همس نايمه على السرير والام قاعده جنبها والحزن باين عليها .
عمر .. خير يا ماما همس عامله ايه دلوقتى.

الام بحزن .. همس تعبت اوى بعد ما انتم نزلتوا يا عمر وانهارت خالص والدكتور اداها حقن مهدئه وكان مانع عنها الزيارة خالص لولا انا اترجيته انى افضل جنبها من غير ما ازعجها او اكلمها وبدات تعيط تانى من حزنها على بنتها .. بنتى بتضيع منى يا عمر .

عمر قرب من والدته وضمها لحضنه وبدا يهديها وقالها ان شاء الله همس هاتقوم بالسلامه وتبقى احسن من الاول كمان بس انتى قولى يارب .
الام .. يارب يا حبيبى .. انا ماليش غيركم .. طمنى فارس حصله ايه بالضبط وعامل ايه دلوقتى .
عمر . فارس عمل حادثه كبيرة اوى وحالته خطيرة والضابط اكتشف بعد المعاينة ان الفرامل بتاعه العربيه اتقطعت بفعل فاعل .
الام .. لا حول ولا قوه الا بالله .. ربنا يخليه لشبابه ويقومه بالسلامه .. مين اللى ممكن يعمل كده فيه وعاوز يخلص منه .

عمر .. الله اعلم يا امى .

سلمى كانت متأثرة من كلام عمر ووالدته .. وطلبت من الام انها ترجع على البيت وتستريح وهى اللى هاتفضل مع همس.
الام .. لا يا سلمى يا بنتى .. روحى انتى وغيرى لبسك ونامى انتى فضلتى سهرانه جنبها طول الليل .
سلمى .. استحاله يا طنط اسيب همس وارجع على البيت .
عمر .. اسمعى الكلام يا سلمى ويالا تعالى انا هاوصلك ..استريحى كام ساعه وابقى تعالى تانى باليل .
سلمى .. بببببببس .

عمر .. مفيش بس يالا بينا .

وفعلا نزل عمر وراح علشان يوصل سلمى على بيتها علشان تستريح من السهر طول الليل مع همس .
للاسف همس كانت بدات تفوق وسمعت كل الكلام اللى كان بين عمر ووالدتها وبالذات بخصوص فارس .. فاستنت ان مامتها تدخل على الحمام وقامت من السرير وغيرت لبسها بسرعه وخدت موبيلها ونزلت من مبنى المستشفى كله قبل ما حد يشوفها .
رواية فارس عشقي للكاتبة سحر فرج الفصل الخامس عشر

نزلت همس بسرعه من المستشفى واتصلت على عادل اللى استغرب جدا انها بتكلمه وهو عارف انها محجوزة فى المستشفى واترجته انه يقول لها على عنوان المستشفى اللى فيها فارس .


بس فى الاخر قالها عادل وعرفت منه مكان المستشفى .. وطلبت منه انه يستناها اودم باب المستشفى .

وفعلا ركبت همس تاكسى وطلبت منه انه يوصلها على العنوان اللى هى قالتله عليه وباقصى سرعه .
وفعلا بعد اقل من عشر دقايق كانت وصلت همس بالتاكسى على عنوان المستشفى وفضلت تدور على عادل لحد ما شافته وشاورت ليه انه يجى يحاسب التاكسى لانها نزلت من غير اى فلوس معاها .

عادل شافها وراحلها وحاسب التاكسى وخد همس على جوا وسألها عن صحتها دلوقتى وعن سبب وجودها فى المستشفى دى .

همس بترجى .. ارجوك يا عادل طمنى على فارس عامل ايه دلوقتى .. سيبك منى انا . انا كويسه .. بس لو فارس حصله حاجه انا هاموووت يا عادل ارجوك ودينى ليه .. انا السبب فى كل اللى هو فيه ده انا السبب.

عادل استغرب اوى من كلامها وبالذات من اخر جمله قالتها همس وقالها .. اهدى يا همس ارجوكى .. فارس صدقينى هايبقى كويس المهم انتى .. لونك وشكلك بيدل على انك لسه تعبانه .. تعالى وانا هارجعك للمستشفى حالا .

وفهمينى انت السبب ازاى فى اللى فارس فيه ده .
همس .. انا مش هامشى من هنا غير لما اشوف فارس واطمن عليه بنفسى .. ارجوك ودينى ليه يا عادل .
عادل .. اهدى طيب يا بنتى وانا هاخليكى تشوفيه بنفسك وتطمنى عليه.

همس .. طيب يالا بسرعه ودي ليه يا عادل الله يخليك .

وفعلا عادل خد همس وراح على الاسانسير ووصلوا لحد الاوضه اللى فيها فارس .. بس طبعا كان والده ووالدته معاه فى الاوضه .
عادل خبط على الباب ودخل واستاذن من والد فارس ووالدته ان فيه ضيفه واقفه بره وجايه تطمن على فارس وتشوفه .
الاب .. خليها تتفضل يا ابنى .
عادل خرج تانى وشاور لهمس انها تيجى .. وبسرعه قربت همس من الباب ودخلت وهى مكسوفه من وجود الاب والام .. بس كانت اكتر حاجه شغلاها انها تشوف فارس وتطمن عليه وبس .

همس .. مساء الخير انا همس صديقه فارس وعرفت انه عمل حادثه وجيت اطمن عليه .

الاب والام بصوا لبعض اوى والام قالت .. انتى همس .. انتى اللى فارس بينده باسمها من ساعه ما خرج من العمليات .. اهلا يا بنتى تعالى اتفضلى .
الاب رحب بيها وقالها اتفضلى يا بنتى .
عادل استاذن انه يقف بره شويه .. فالاب فهم ان همس دى اكيد حبيبه فارس وان وجودها هايحسن من صحه ابنه فطلب من ام فارس انها تسيب الضيفه شويه تقعد براحتها مع فارس وهما يروحوا يشربوا اى حاجه فى الكافيتريا.

وفعلا خرج الاب والام وعادل وقفلوا الباب على همس وعلى فارس وفضلوا مع بعض .

همس قربت من سريره ومسكت ايده وفضلت تلمسها بمنتهى الحب لكن هو كان لسه ما فقش من البنج وقالت ووشها غرقان بالدموع ....
فارس حبيبى الف سلامه عليك يا عمرى ما تزعلش منى انا السبب فى كل اللى انت فيه ده .. انا لازم اضحى بنفسى علشان خاطرك انتى يا روحى .. فهد ده شيطان وانا خايفه عليك منه .. وهو هددنى بيك وانا استهترت بكلامه وتهديده ده .. حقك عليا يا عشقى .. بس من هنا ورايح مش هاخليه يقرب منك تانى ابدا . انا هاضحى بنفسى علشان انت تعيش حياتك .. انا هابعد عنك علشان انت تعيش .. انا عارفه ان ده هايبقى صعب عليك وعليا .. بس كل اللى انا طلباه انك تسامحنى .. واوعى تفتكر انى بيعتك او سيبتك علشان خاطر الحيوان ده .

ده اكتر انسان انا كرهته فى الدنيا دى كلها ..

بس علشان خاطر حبى ليك يا فارس عشقى انا هارضى باى شىء علشان تفضل انت عايش .. وكفايه عليا انى اعرف انك بخير دايما . اوعدنى انك تفضل تحب همس مهما يحصل ومهما بعدت عنك لانك هاتفضل جوايا طول عمرى لحد اخر نفس فيا .
وانا هاوعدك انى هافضل همس زى ما انا .. وعمر فهد ده ما هايلمس او يطول شعرة منى طول ما انا عايشه واوعدك يا فارس بكده .
انا هاخليه يندم على اليوم اللى فكر فيه انه يخدنى منك . وعلى كل اللى عمله فيك وفى عيلتك .
سلاااااااام يا فارس عشقي

قامت همس وقربت من فارس اكتر وباسته فى خده ودموعها غرقت وشه .. وخرجت من الاوضه وكان واقف عادل بره مستنيها وشافها منهارة من العياط وحاول يهديها لكن الكلمه الوحيده الل همس قالتها لعادل خلى بالك منه وخليك جنبه يا عادل .

وحاول يوقفها بس هى للاسف مشيت بسرعه من غير ما تنطق ولا كلمه تانى .
وفجاه سمع عادل صوت فارس بينده على همس فجرى عليه وشاف فارس فتح عيونه وبينادى على همس .
فارس بتعب وصوت ضعيف .. همس همس همس .
عادل .. حمد الله على سلامتك يا صاحبى .

فارس .. فين همس يا عادل انا سمعت صوتها .. فين يا عادل فييييييين .

عادل .. اهدى يا فارس انت اكيد كنت بتحلم .. همس زمانها فى المستشفى .
فارس .. لاااااا انت بتضحك عليا .. انا حسيت بيها كانت جنبى وسمعت صوتها .. انت ليه هاتخبى عليا انها كانت هنا .
عادل .. اهدا يا فارس وانا هاخبى عليك ليه بس .

وفجاه دخل والده ووالدته وفرحوا ان فارس فتح عيونه فقربوا منه علشان يطمنوا عليه .

الام .. حمد الله على سلامتك يا حبيب قلبى انا خوفت عليك انا كنت هاموووووت من خوفى عليك يا عمرى .
الاب .. حمد الله على السلامه يا بطل .. ربنا يشفيك وتقوم لنا بالسلامه يا حبيبى .
الام .. انا لو كنت اعرف ان همس دى بوجودها هاتخليك تفتح عيونك وترجع لينا تانى انا كنت قولت لعادل يجبها من بدرى .
فارس عيونه جت على عادل بعتاب انه خبى عليه وجود همس وانكر كمان بس طبعا مش قادر يقول اى كلمه علشان وجود ابوه وامه .. فغمض عيونه ورجع تاه تانى من تاثير البنج .

همس كانت نزلت بسرعه من المستشفى ودموعها مغرقاها وركبت تاكسى وراحت على الفيلا بتاعتها .

ام همس كانت خرجت من الحمام واتفاجات ان همس مش موجوده فى سريرها . فافضلت تدور عليها فى الاوضه والبلكونه والممر اللى فيه الاوضه وفى الاخر اتصلت على عمر ابنها .
الام.. الووووو الحقنى يا عمر يا ابنى انا مش لاقيه همس خالص .
عمر باستغراب .. فى ايه يا ماما اهدى وواحده واحده مش فاهم حاجه .

الام بحزن .. انا كنت فى الحمام وخرجت منه ملقتش اختك فى سريرها انا خايفه لا يكون حصلها حاجه او حد خطفها الحقنى يا ابنى بسرعه .

عمر .. انتى بتقولى ايه بس يا امى .. اقفلى طيب وانا جاى بسرعه .
قفل عمر مع والدته وكان يادوبك وصل سلمى عند باب العمارة بتاعتها وكان راجع فى الطريق على المستشفى .
وفجاه موبيله رن وكان اسم همس اللى ظاهر على الشاشه بتاعة الموبيل .
عمر بلهفه .. انتى فين يا همس ماما قالبه الدنيا عليكى .

همس بحزن شديد .. اطمن يا عمر انا رجعت على البيت واطمن ماما .

عمر .. طب ليه خرجتى اصلا من المستشفى يا حبيبتى .. بس للاسف كان الخط اتقفل بعد ما همس قفلت الموبيل .

همس اول لما قفلت مع عمر راحت اوضتها واترمت على سريرها وفضلت تعيط وتعيط لحد ما راحت فى النووووم .

وبدأت تحلم بفارس انهم مع بعض فى مكان يشبه جزيرة كبيرة بيلعبوا ويهزروا وفرحانين وبيجروا ورا بعض .
فارس بحب .. انا هامسكك انتى هاتروحى منى فين .
همس .. لو شاطر تعال وامسكنى مش هاتقدر .

فارس فضل يجرى وراها وهى تجرى لحد ما همس وقعت على الارض من كتر الجرى ونامت على ضهرها .. فوقع فارس هو كمان جنبها ونام على الارض .

صوت انفاسهم ودقات قلبهم هو اللى كان مسموووع .. فقرب منها فارس وضمها ليه وبدأ يلمس شفايفها وخدودها ويرفع شعرها اللى كان نازل على عيونها .. وقالها اخيرا عرفت امسكك .. اخيرا بقيتى فى حضنى .. وقرب اكتر منها وبمنتهى الرقه باسها فى شفايفها وايده بدات تلمس جسمها وده اللى خلى همس تدوووووب بين شفايفه وتحطم كل حصونها .

بس للاسف فجاه سمعت صوت ضرب نار وحست بشىء دافى بينزل على جسمها فلمسته بايديها وعرفت انه دم من فارس .

وفتحت عيونها اوى وشافت فارس بعيون كلها حب وعشق وفجاه غمض عيونه .
قامت همس بسرعه وحاولت تطمن على فارس .. بس للاسف .. عرفت واتاكدت ان صوت النار ده جه فى فارس وشافت فارس غاب عن الوعى .
همس ... فاااااااااااااارس
فااااااااااااااااارس

عمر كان داخل من باب الفيلا هو ومامته بعد ما رجعوا من المستشفى .. ويادوبك فتحوا الباب وسمعوا صوووت صريخ همس اللى جاى من فوووق .

فجرى عمر بسرعه على فوق بعد ما رمى الشنط اللى فى ايده على مصدر الصوت وفتح باب الاوضه بتاعه اخته وشاف همس قاعده على السرير زى الاطفال وضمه رجلها لصدرها ومنهارة من كتر العياط .
قرب عمر بسرعه منها وحضنها وحاول يهديها لما شاف حالتها دى .

عمر بحب وحنيه الاخ ... اهدى يا حبيبتى .. اهدى انا جنبك .. انا مش هاخلى حد يقرب منك طول ما انا عايش .. اهدى يا همس ارجوكى .. متخافيش من اى حد وانا عرفت اد ايه انتى وفارس بتحبوا بعض .. ومحدش هايقدر يفرق بينكم .. اهدى يا قلبى .

همس .. خلااااص يا عمر .. خلااااص .. انا هاتجوز فهد علشان خاطر فارس يعيش .. انا هاضحى بحبى ليه وهابعد عنه علشان فهد ما يئذهوش .. كل ده علشان خاطر فارس عشقى يا عمر .. هو جه المستشفى وهددنى انه هايموت فارس وانا مسمعتلوش للاسف .انا اللى عملت فى فارس كده انا يا عمر انا.

عمر .. ارجوكى اهدى يا همس .. ومفيش اى حاجه من كل ده هاتحصل طول ما انا جنبك يا حبيبتى .

همس .. لا يا عمر .. انا هاتصل على بابا وابلغه انى موافقه بالجواز من فهد وايه فى اسرع وقت ممكن .
عمر .. استحاله يا همس الكلام اللى بتقوليه ده يحصل وعلى جثتى .
همس .. انا هاتجوزه يا عمر .. هااااااتجوزه .
وبدات تصرخ اوى واترمت فى حضن اخوها .
عمر كان هايتجنن على منظر اخته وقلبه بيتقطع علشانها .. فقرر انه يروح لفهد الجبالى ويمنع الكارثه دى قبل ما تحصل .
يا ترى فعلا عمر هايروح لفهد الفندق ويقدر يعمل حاجه .
رواية فارس عشقي للكاتبة سحر فرج الفصل السادس عشر

عمر قرر انه يروح لفهد ويحاول يمنع الكارثه دى قبل ما تحصل فساب همس فى سريرها ونزل جرى علشان يروح لفهد

همس قامت بسرعه ورا اخوها علشان تمنعه من انه يروح لفهد علشان ما يأذيش عمر هو كمان .
للاسف عمر وهو نازل جرى من على السلم بتاع الفيلا وقع من عليه وخد السلم كله لتحت وللاسف فى اخر سلمه دماغه اتخبتط فى السور بتاع السلم وفقد الوعى خالص والدم غرق المكان .

همس شافت اخوها بالمنظر ده صرخت وقالت .. عممممممممممممممر

ونزلت بسرعه السلم وقربت من اخوها لكن للاسف كان فاقد وعيه ومش بيتحرك نهائى .
همس فضلت تصرخ وامها جت بسرعه على صريخها بعد ما كانت فوق معاهم فى الاوضه وسمعت كل كلام عمر وهمس بخصوص فهد الجبالى .
همس .. الحقى عمر يا ماما وقع من على السلم .. نادى على عم عبده البواب بسرعه يشيله معايا على العربيه علشان نوديه المستشفى .. بسرعه يا امى .
الام بحزن .. ابنى حبيبى عمر عمر ... رد عليا يا حبيبى .

همس .. مش وقته يا ماما .. يالا بسرعه علشان النزيف شديد .

وفعلا قامت الام بسرعه وندهت على عبده البواب وجه فى ثوانى وشال عمر هو وهمس وركبوه العربيه وركبت الام معاهم وراحوا بسرعه على المستشفى .
وخلال عشر دقايق نتيجه السرعه الجونونيه اللى كانت سايقه بيها همس عربيتها كانوا وصلوا اودام باب المستشفى ونزلت بسرعه همس وطلبت من الاستقبال ان فى حاله حرجه معاها .

وفعلا خرج بسرعه طقم كامل من المسعفين وخدوا عمر من العربيه على النقاله ودخلوا بسرعه على الطوارىء .

همس قربت من والدتها اللى كانت منهارة ومش عارفه ايه بالضبط اللى بيحصل مع ولادها الاتنين همس وعمر.
همس بحنيه .. اهدى يا ماما ان شاء الله هايقوم بالسلامه ويرجع احسن من الاول .

الام .. اهدى ايه بس يا همس وانا شايفه كل يوم واحد فيكم فى المستشفى .. انتم بتضيعوا منى يا بنتى وابوكى ولا هو هنا .. ولا فى دماغه عياله خالص .. همه الوحيد شغله ومكتبه وخلاص .. انا تعبت والله تعبت ولازم يبقى ليا تصرف تانى معاه بس عمر يقوم بالسلامه .

همس ... اهدى يا حبيبتى .. ان شاء الله هاتعدى على خير ويقوم بالسلامه بس انتى قولى يارب .
الام رفعت ايديها لربنا وقالت ... يااااااارب



فى الفندق عند فهد كان قاعد وهايس مع بنت جبهاله بلال .. بعد ما طلب منه فهد انه عاوز يسهر سهرة حلوة بعد ما عرف اللى جرى لفارس .

فهد قاعد اودام التربيزة اللى كانت مليانه حاجات كتير زى الخمرة والويسكى وشرايط برشام لزوم السهرة الحمرا دى .
والبنت كانت مشغله اغانى وعماله تتمايل وترقص بلبسها اللى كان شبه عريان .
فهد كان بيشرب ويسكر وفرحان بالبنت اللى واقفه وبترقصله وفى الاخر قام وقف وشدها وفضل يرقص معاها ويتمايل على الموسيقى
فهد ... انا عاوز ادلع ورينى هادلعينى ازاى يا حلوة.
البنت بدلع ومياسه .. انا هادلعك اخر دلع يا بيبى بس فى السرير .
فهد .. طب يالا بينا علشان انا هامووووووت وادلع يا قطه .

وفعلا خدته البنت اللى كانت سحباه من ايديه زى الحمار ودخلت اوضه النوم وغرقوا فى المحرمات اللى ربنا حرمها .

بلال كان واقف بره طبعا كالعاده وجاله تليفون من الراجل اللى كان بيراقب الفيلا بتاعه همس وبلغه ان فى حاجه حصلت لاخوها وراحوا على المستشفى .. وانه عمال يرن على فهد بيه ومش بيرد عليه .
بلال ... ماشى يا ابراهيم . خليك مكانك ما تتحركش وحاول تستفسر من البواب بتاعها على اللى حصل بالضبط علشان ابلغ فهد بيه .
ابراهيم .. اللى تؤمر بيه يا بلال باشا واول لما اعرف حاجه هاتصل عليك فورا .
بلال .. يالا سلام وانا هاستنى منك تليفون .

فى المستشفى عند فارس كان لسه عادل موجود هو ووالد فارس ووالدته . وفارس كان بدا يفوق ويتكلم معاهم بس كان فى شىء محتاجه ومخليه حزين ومتألم بعيد عن الحادثه والجرح والالم اللى هو حاسس بيه . فى شىء ناقص وطبعا هى همس .

فارس بصوت ضعيف قال ... بابا وماما يالا لو سمحتوا انتم زمانكم تعبتوا وانا بقيت كويس اهو .. خدوا بعضكم وارجعوا على الفيلا .
الام .. انت بتقول ايه بس يا فارس ..انا هافضل معاك يا حبيبى .. ازاى عاوزنى امشى واسيبك فى الحاله دى .

فارس بتعب .. اسمعى الكلام يا ماما لو سمحتى انا بقيت كويس اهو .. ولا تحبوا اقوم امشى وارجع على البيت بنفسى .

الاب ... انت بتقول ايه بس يا ابنى .. تمشى وتروح ازاى بس وانت فى حالتك دى .. امك خايفه عليك ومش عاوزة تمشى وتسيبك .
عادل .. عمى عنده حق يا فارس .. ازاى عاوز تقعد لوحدك وانت لسه يا دوبك فايق من من شويه صغيرين .
فارس .. هى كلمه واحده ومش هاعيدها تانى . لا اما تسبونى لوحدى هنا . لا اما هاقوم البس وامشى من المستشفى كلها لو فضلتوا معايا .
عادل ... اهدى يا عم انت .. خلاص خلى عمى وطنط يمشوا وانا هابات معاك بنفسى ايه رايك .

فارس .. مش عاوز حد خالص يا عادل انت مش بتفهم ولا ايه .

عادل .. خلاص يا عم فارس هانمشى كلنا ما تزعلش نفسك .
الام .. نمشى ازاى بس يا عادل يا ابنى .
عادل .. خلاص بقى يا طنط . هانسيبه ينام براحته ويستريح ونجيله الصبح بدرى . ايه رايك .
الاب .. عادل عنده حق يا حاجه .. يالا ننزل ونسيبه يستريح شويه .. لانه طول ما احنا موجودين ولا هاينام ولا هايستريح .
الام قربت من فارس وطبطبت على صدره بحنيه .. امرى لله يالا بينا .. ولو عزت اى حاجه موبيلك جانبك اهو يا حبيبى اتصل عليا وانا اجيلك فى ثوانى وقامت بيساه من راسه .

عادل بيغمز لفارس وقال .. اه الموبيل اهو جنبك بس ما ترغيش كتير علشان ما تتعبش اكتر .

فارس .. يالا يا رخم وحسابك معايا بعدين يا حيوان .
عادل .. انا حيوان .. يرضيكى كده يا طنط .
الام بابتسامه ... معلش يا عادل يا ابنى صاحبك واخوك وبيهزر معاك .
الاب .. طيب يالا بينا بقى وهانبقى نيجى من بدرى يا فارس ان شاء الله.. تصبح على خير يا حبيبى .
فارس بتعب .. وانتم من اهله .

وفعلا فتحوا الباب وخرجوا بس عادل حب يرخم عليه وقاله .. خلى بالك الرغى الكتير مضر بالصحه يا ماااان .. نام بدرى احسن .

فارس شد الخوداديه اللى كانت جنبه على السرير وحدفها فى عادل اللى بسرعه خرج من الباب وقفله وراه .
فارس خد نفس كبييييير ومسك الموبيل واتصل بهمس .
همس كانت فى المستشفى واقفه اودام باب الطوارىء مستنيه حد يخرج من جوا ويطمنها على عمر اخوها .. سمعت الموبيل بيرن فى شنتطها فاطلعته واستغربت ان فارس هو اللى بيرن عليها .

قلبها بدا يدق جامد اوى اوى لدرجه انها كانت سمعاه ولسه هاترد عليه .. رجعت عن قرارها ده وافتكرت فهد وتهديده ليها .

فخافت ترد على فارس وحطت الموبيل تانى فى الشنطه .
فارس طبعا استغرب ان همس ما ردتش عليه .. فطلبها تانى وقال يمكن اول مرة ما سمعتهوش او كانت نايمه .
همس موبيلها رن تانى ومسكته وعرفت ان فارس بيرن تانى عليها . وفى اللحظه دى كان اتفتح باب الطوارى وخرج الدكتور من عند عمر .. فدخلت همس الموبيل تانى فى شنتطها .

فارس بدات اعصابه تتوتر وقلق على همس لايكون حصلها حاجه ورزع الموبيل على السرير .

الدكتور خرج من عند عمر ووشه باين عليه الحزن فقربت بسرعه همس ووالدتها منه وبالهفه سألته عن حاله عمر اخوها .
همس .. خير يا دكتور طمنى لو سمحت عن اخويا اخباره ايه .
الدكتور .. للاسف لازم يدخل عمليات فورا لان الخبطه اثرت على المخ وفى فص من المخ مسؤل عن الحركه حصل فيه شرخ .
همس بصدمه .. انت بتقول ايه . يعنى عمر مش هايتحرك تانى ولا ايه !!!!!!
الام .. يا حبيبى يا ابنى .. رحمتك ياااارب .

الدكتور .. اهدوا يا جماعه وادعوله .. بعد اجراء العمليه هايقوم بالسلامه ان شاء الله وهايبقى كويس .. وفى اسرع وقت لازم يدخل على العمليات . بس عاوزين اقرار الموافقه منكم قبل اجراء العمليه .

همس .. ليه يا دكتور هو فى خطورة فى العمليه .
الدكتور . يا ماما اهدى اى عمليه كبيرة بتتعمل لازم ناخد موافقه الاهل عليها .. وما تقلقوش هو ان شاء الله هايقوم بالسلامه .. بس لو سمحتى روحى على الإدارة واكتبى الموافقه باجراء العمليه عقبال ما نجهزه للعمليه .. واستاذن ومشى .

الام .. يا حبيبى يا عمر .. يارب انا ماليش غيره . اشفيه وقومه بالسلامه والنبى يارب .

همس حاولت تتمالك نفسها علشان خاطر والدتها فقربت منها وبدات تواسيها وتطمنها انه هايعمل العمليه وهايقوم بالسلامه . بس دلوقتى هاتتصل على باباها وتبلغه بكل اللى حصل .
وفعلا همس طلعت موبيلها وعرفت ان فارس اتصل اكتر من مرة وهى بتتكلم مع الدكتور .. بس طبعا مش وقته خالص الاهم دلوقتى صحه عمر اخوها.. فاتصلت على ابوها اللى كان فى عشاء عمل مع ناس تقيله جدا فى البلد وشاف الموبيل بيرن ومن مين من همس وكنسل عليها .

ولا همه همس اللى المفروض انه عارف انها فى المستشفى بتتصل ليه .. ولا همه ان ممكن يكون فى حاجه كبيره حصلت زى اللى حصل مع عمر.. كل اللى همه شغله وفلوسه وموكلينه وبس . ومش مشكله عياله ولا بيته .

همس استغربت جدا انه كنسل عليها فخدت بعضها ونزلت على الادارة وكتبت الموافقه على اجراء العمليه. وبالفيزا بتاعتها سابت مبلغ كبير تحت الحساب للمستشفى .
فارس كان على امل ان همس تكلمه بس للاسف فضل سهران طول الليل ومستنى اى تليفون منها .

وبدا يقول لنفسه .. ازاى ارن عليها كذا مرة ومتردش عليا .. للدرجه دى يا همس انا مش فارق معاكى . للدرجه دى وانتى عارفه انى عامل حادثه ومرمى فى المستشفى .. للدرجه دى انا هونت عليكى .. وانا اللى كنت هاموووت من حزنى عليكى وانت فى المستشفى .

ويرجع يقول لنفسه .. اكيد نايمه وعامله الموبيل سايلنت . همس بتحبنى واكيد زعلانه علشانى . ما هى جت وزارتنى وانا لسه فى البنج .. لا لا همس بتحبنى .. همس بتعشقنى وزمانها لسه تعبانه ونايمه من كتر المهدئات بلاش التفكير ده يا فارس وما تظلمهاش .
فمسك الموبيل ورن عليها تانى وفجاه ردت عليه همس.

فارس ... همس حبيبتى انتى نايمه ولا ايه ..انا رنيت عليكى كتير علشان اطمن عليكى يا روحى وعرفت انك جيتى وزورتينى انا حسيت بيكى جنبى .

همس وقلبها بيتقطع علشان الكلام اللى بيقوله فارس ليها بس حاولت تقاوم الاحساس ده وجمدت قلبها وقالت ببرود .. فى ايه يا فارس .. كل دى رنات عليا . افرض انا نايمه وفعلا كنت نايمه وانت بتليفونك ده صحتنى . عاوز ايه دلوقتى سياتك .
فارس اتصدم من رد همس وقال .. انتى بتقولى ايه يا همس.. انتى زعلانه انى رنيت عليكى وانتى نايمه . وانا اللى بتوجع وبتقطع من جوايا علشان انتى بعيد عنى ومش جنبى .. مش علشان الجروح اللى فيا .

همس حاولت تكره فارس اكتر فيها فقالت .. وعاوزنى اعملك ايه دلوقتى انا عاوزة اكمل نومى .. يالا سلام وقفلت فى وشه الخط .

فارس اتصدم من تصرف همس واستغرب هى بتعمل كده ليه .. وكمان تقفل الموبيل فى وشه .. مش معقوله يا همس .. اكيد فى حاجه غلط حصلت .. اكيد حصل حاجه خلتها تعمل كده معايا . وانا الل هاموووت وهى بعيده عنى .. ليه يا همس ليه يا حبيبتى .
همس كانت قفلت الموبيل واتفتحت بالعياط على طريقتها وردها مع فارس وانها كانت قاسيه عليه جدا بكلامها واكيد جرحته . بس افتكرت كلام وتهديد فهد ليها وقالت ان دى احسن حاجه علشان فارس يكرها ويبعد عنها ويبعد فارس عنه هو كمان .

همس تمالكت نفسها ومسحت دموعها وراحت على اوضه العمليات اللى دخلوا فيها عمر اخوها وفضلت واقفه هى ومامتها .

الام.. خير يا بنتى كتبتى الاقرار بالموافقه .
همس .. اه يا ماما كتبته ودفعت مبلغ تحت الحساب كمان.
الام .. طيب اتصلتى بابوكى وبلغتيه باللى حصل لعمر .
همس .. اه اتصلت بس الموبيل بتاعه مقفول ممكن يكون عنده شغل وموبيله فصل من غير ما يحس .
الام بحزن لانها حست ان همس بتكدب عليها .... ماشى يا حبيبتى.

عادل كان رجع على بيته وطلب من سلمى انها تجهزله لقمه خفيفه علشان كان ميت من الجوع عقبال ما يغير لبسه وياخد شور سريع بانه كان تعبان ومرهق جدا .

سلمى . ماشى يا عادل ثوانى واجهزلك العشاء . بس الاول طمنى على فارس اخباره ايه دلوقتى .
عادل .. كويس الحمد لله وسيبناه فى المستشفى لوحده بعد ما طلب من الكل انهم يمشوا علشان قال ايه تعبان وعاوز ينام لوحده . وانا اللى كنت فاهمه هو بيوزعهم ليه اكيد علشان يسهر يحب طول الليل هو وهمس مع بعض على الموبيل .

سلمى بضحك .. طب كويس انك قولتلى انهم زمانهم بيكلموا بعض ده انا لسه كنت هارن على همس واعتزر لها انى ما رجعتش لها تانى بعد ما صحيت من النوم .. بلاش ارخم عليهم بقى وهابقى اكلمها الصبح .. يالا اسيبك تاخد الشور واروح اجهزلك الاكل .

وفعلا دخل عادل على الحمام وراحت سلمى على المطبخ علشان تجهزله الاكل .

فى المستشفى كان عمر لسه فى العمليات اللى استمرت اكتر من خمس ساعات لانها كانت عمليه كبيرة وفى المخ وصعبه .

همس وامها كانوا كانوا قاعدين واعصابهم متوترة وخايفين على عمر لا الخبطه تاثر عليه .
الاب كان رجع على الفيلا متاخر جدا طبعا ومن كتر تعبه نام على كنبه الانتريه لانه كان مرهق جدا ومش قادر يطلع على فوق وطبعا نام ومعرفش ايه الى حصل لعمر.
باب العمليات اتفتح وخرج الدكتور اللى كان باين عليه الارهاق .
جريت همس عليه وسألته عن عمر وعن العمليه .
الدكتور .. اطمنى العمليه نجحت بس...

همس باستغراب .. بس ايه يا دكتور طمنى فى ايه بالضبط .

الدكتور .. العمليه نجحت بس هاتاثر على الجزء اليمين كله من الجسم وهاتأثر على الحركه بتاعته لمده طويله وان شاء الله مع العلاج الطبيعى والعلاج والصبر هايقدر يتحرك تانى ويرجع زى الاول .
همس بصدمه .. انت بتقول ايه يا دكتور .. عنر مش هايقدر يتحرك تانى .

الدكتور . انا مقولتش كده .. اهدى واستوعبى كلامى صح . انا بقول العمليه نجحت لكن الفص بتاع المخ ده بياخد وقت طويل ليرجع زى الاول . وان شاء الله هايعمل اللى هانقوله عليه ويرجع زى الاول بس انتم شجعوه وافقوا جنبه .. واستاذن ومشى .

همس بحزن وانكسار .. انا السبب . انا السبب فى اللى حصلك يا عمر . انا السبب فى كل اللى بيحصلكم انت وفارس .
كله بسبب فهد الجبالى .. مل اللى بيحصل ده بسببه وانا هادفعه تمن كل ده كويس اوى وهانتقم للى حصلك يا عمر وحصل لفارس كمان
رواية فارس عشقي للكاتبة سحر فرج الفصل السابع عشر

همس بحزن وانكسار من كلام الدكتور عن حاله عمر ..

انا السبب.. انا السبب فى اللى حصل لعمر وحصل لفارس كمان .. انا السبب فى كل اللى بيحصلكم بسببى .. بس اوعدكم انى هاخد حقكم كويس اوى من فهد الجبالى وهاخليه يندم على كل اللى عمله معاكم.

الام بعيون كلها دموع .. اهدى يا حبيبتى .. ما تقوليش كده ... بكره يقوم لنا بالسلامه ويملى الدنيا بضحكه وهزاره زى الاول ويرجع لشغله فى النادى قولى يارب .

همس اترمت فى حضن امها وبدات تعيط جامد وقالت .. انا هاسفره لاكبر مستشفيات فى العالم وهاخليه يرجع زى الاول ان شاء الله .. ياااااارب .. ياااااارب .
وفضله على الحال ده لحد ما النهار طلع وكانوا خرجوا عمر من اوضه العمليات وودوه على اوضه خاصه بيه .

فى الفيلا كان الاب صحى لانه مكنش عارف ينام على الكنبه كويس وكان عنده جلسه مهمه فى المحكمه ولازم يحضرها .. فقام وطلع على فوق واستغرب ان مراته مش موجوده فتوقع انها تكون مع همس فى المستشفى ..

فادخل الحمام وخد شور وجهز لبسه اللى هايلبسه ولبس وخد بعض الملفات من مكتبه ونزل على تحت ونده على الشغاله علشان تحضرله الفطار .
صفوان .. يا هناء جهزيلى الفطار بسرعه .

هناء .. هو حضرتك معرفتش اللى حصل لعمر بيه امبارح يا صفوان بيه .

صفوان باستغراب .. هو هايكون حصل ايه يعنى .. ماله الاستاذ عمر حصله ايه انطقى .
هناء .. الاستاذ عمر كان نازل من فوق من عند الست همس والظاهر كان نازل بسرعه فوقع على السلم واغمى عليه ودمه كان سايح ومغرق الدنيا .. والست همس خدته فى العربيه ومعاها الست الكبيرة وراحوا على المستشفى ومن ساعتها ومحدش يعرف عنهم حاجه .

صفوان .. انتى بتقولى ايه .. يعنى عمر فى المستشفى دلوقتى .. وهمس اصلا خرجت امتى من المستشفى مش كانت محجوزة هى كمان .

هناء .. ما الظاهر يا ساعه البيه انها خرجت امبارح بس شكلها لسه تعبان لانها كانت عماله تصرخ اوى امبارح بصوت عالى .
صفوان .. طيب غورى انتى دلوقتى على المطبخ .

هناء .. طب والفطار يا صفوان بيه اجهزه لحضرتك .

صفوان بغضب ... غوووورى من وشى مش عاوز زفت .
ومسك موبيله ورن على همس اللى ردت عليه بعد فترة .
صفوان .. خير يا همس حصل ايه لعمر وانتم فين دلوقتى .
همس بحزن .. ياااااااه لسه فاكر يا بابا تتصل بينا وتشوفنا فين والله كتر خيرك .

صفوان .. مش وقته الكلام ده يا همس وطمنينى على عمر حصله ايه .

همس .. عمر للاسف الخبطه كانت جامده واثرت على فص من المخ .. وعمله ليه عمليه امبارح والدكتور بعد العمليه قال انه مش هايقدر يحرك الجزء اليمين ده خالص وهاياخد وقت علشان يرجع زى الاول مع العلاج الطبيعى وبعض الادويه .

صفوان بص فى الساعه بتاعته وقال .. لا حول ولا قوه الا بالله .. طيب انا عندى قضيه مهمه جدا دلوقتى فى المحكمه ولازم احضرها بنفسى واول لما اخلصها هاجلكم على المستشفى .. ادينى العنوان يا همس .

همس اتصدمت من رد فعل ابوها على حاله عمر وعلى طول قفلت السكه من غير ما حتى ما صفوان يكمل كلامه .
صفوان استغرب ان الخط قطع .. فتوقع ان الشبكه هى السبب وقال .. مش مشكله بقى يادوبك الحق الجلسه وابقى اروح لهم .

فى المستشفى عند فارس كان حزين على تصرف همس معاه ومكنش متوقع ردها عليه هايكون بالمنظر ده بعد الحادثه .. اللى لسه لحد دلوقتى ما يعرفش انها بفعل فاعل وان فى حد دبرها وحاول انه يموته .

وفضل على الحال ده لحد ما راح والده ووالدته اول لما النهار طلع علشان يطمنوا عليه .
واول لما وصلوا لوضه فارس كان الدكتور والممرضه معاه وبيغيروا على الجرح بتاعه .
الام قربت منه وباسته وقالت .. اخبارك ايه يا حبيبى دلوقتى .
فارس .. الحمد لله اطمنى يا امى .

الاب .. عال عال يا بطل شد حيلك كده الشركه لوحدها .. والكل بيسأل عليك وزعلوا لما عرفوا اللى حصلك .. قوم بالسلامه بقى علشان تشوف اللى وراك .

فارس بحزن .. ربنا يسهل . ان شاء الله انا هانزل من بكرة على الشركه مالوش لزمه القاعده فى المستشفى اصلا .
الام باستغراب .. ازاى بس يا فارس يا ابنى ده انت مكملتش يومين على بعضهم وبعدين انت عامل عمليه كبيرة وما ينفعش تخرج من هنا غير لما نطمن عليك يا عمرى .
الدكتور .. والدتك عندها حق يا فارس خروج ايه اللى بتتكلم عنه ده لسه بدرى اوى على الكلمه دى .

فارس بصوت عالى ... هى كلمه واحده مش هاقعد فى المستشفى تانى دقيقه واحده .

وفجاه دخل عادل وكان معاه سلمى على صوت فارس العالى واستغربوا اوى من كلامه .
عادل .. صباح الخير يا جماعه .. وخروج ايه بس يا فارس اللى بتتكلم فيه ده .. انت مش شايف نفسك عامل ايه .
سلمى .. ازيك يا فارس عامل ايه دلوقتى .
فارس عيونه جت فى عيون سلمى وكأنه بيحاول يوصلها حاجه او يسألها عن همس .. فسلمى لاحظت نظراته دى وفهمت وقربت منه وكأنها بتسلم عليه وقربت اوى وقالت .. مالك يا فارس عاوز تقول حاجه .

فارس ما صدق ان سلمى تقرب كده منه وقالها فين همس وعامله ايه دلوقتى طمنينى .

سلمى باستغراب .. همس اكيد لسه فى المستشفى انا سبتها امبارح ورجعت على البيت .
فارس .. همس جاتلى هنا يا سلمى امبارح بس انا كنت لسه نايم من تأثير البنج وجيت كلمتها باليل على الموبيل علشان اطمن عليها ردت عليا باسلوب انا استغربتله اوى .. هى حصل معاها حاجه انا معرفهاش .. ولسه لحد دلوقتى معرفتش ايه سبب تعبها ده ومروحها المستشفى اصلا .. ارجوكى يا سلمى لو تعرفى اى حاجه قوليلى متسيبونيش كده مش فاهم اى حاجه بتحصل حواليا .

عادل كان خد باله من الحوار اللى بين سلمى وفارس وتوقع ان السبب اكيد هايكون عن همس فقرب من ابوا فارس وامه وحاول يشغلهم شويه لحد ما سلمى وفارس يخلصوا كلام .

سلمى .. الصراحه يا فارس حصل حاجه المفروض انت تعرفها كويس اوى .
فارس باستغراب .. حاجه ايه يا سلمى انطقى .
سلمى بتردد انها تقول .. الصراحه سبب تعب همس هو فهد الجبالى .

فارس اتحول خالص لشخص تانى اول لما سمع اسم فهد الجبالى وقال بغضب .. ماله الحيوان ده بيها وعاوز منها ايه يا سلمى .

سلمى .. فهد الجبالى طلب ايد همس من باباها .. وهمس لما عرفت كده انهارت وتعبت وعلشان كده دخلت المستشفى .
ومن واقحته راح لها المستشفى بعد ما انتم كنتم موجودين انت وعمر وعادل ونزلتوا وهو جه وقالها كلام وحش جدا ومستفز وهددها كمان وخلاها تتعب اكتر وتنهار وفضلت تصرخ لحد ما الدكتور جه وايداها الحقن المهدئه .

فارس فجاه قام من السرير وشال كل المحاليل اللى فى ايده وحاول يفتح الباب ويخرج .. لولا عادل وابوا وقفوه واستغربوا هو بيعمل كده ليه .

فارس ... سيبونى سيبونى انا هاروح اقتله .. انا هاموته انا هاموت فهد الجبالى بايدى واخلص منه كل اللى عمله معانا .. سيبوووووونى .. ووقع على الارض والجرح انفتح وغرق المكان دم للاسف .
عادل جرى ينده الدكتور بسرعه وفى ثوانى كانوا جم وشالوه على السرير وحاولوا يوقفوا النزيف .
الاب كان فى صدمه هو والام اول لما شافوا فارس فى الحاله دى واول كمان ما سمعوا اسم فهد الجبالى.
الاب لعادل .. ايه علاقه فهد الجبالى بفارس يا عادل .

عادل اتلغبط ومكنش عارف يقول ايه او يتصرف ازاى .. وفضل انه يسكت احسن علشان يهدى الموقف .. وقال بعدين يا عمى مش وقته لما نطمن على فارس الاول .

الدكتور كان قدر يوقف النزيف واداله حقنه مهدئه وفى اقل من تلت دقايق كان فارس هدى خالص وغمض عيونه .
الام كانت عماله تعيط وافتكرت كل اللى حصل زمان مع ابنها الكبير وموته وكان فهد الجبالى هو السبب فى كده .. ورغم كل التحقيقات بس مقدروش يوصلوا لاى دليل يدين فهد .

سلمى فضلت تهديها وتطمنها انه هايبقى كويس وهايرجع زى الاول .

الاب فجاه قال .. انا عرفت دلوقتى مين ورا حادثه فارس ابنى .. اكيد فهد الجبالى زى ما عمل ما ابنى زمان وكان سبب فى موته كان عاوز يعمل مع فارس كده علشان السوق يفضاله ويبقى ملكه هو وبس .. انا هابلغ عنه واوديه فى ستين داهيه .

عادل .. اهدى يا عمى لحد ما فارس يفوق من اللى هو فيه ده ونشوف هانتصرف معاه ازاى .. اهدى يا عمى علشان خاطر صحتك .

الاب .. اهدى ايه بس يا عادل وانا بتفرج على عيالى وهما بيضيعوا منى .. اهدى ازاى بس قولى .
عادل .. ان شاء الله الامور هاتتصلح وانا بنفسى هاعدى على قسم الشرطه وابلغ عن فهد الجبالى .

فهد كان قام من النوم وخد شور بعد الليله الحمرا اللى قضاها فى الحرام .. وطلب انهم يجهزوا الفطار بسرعه .. ومسك موبيله واتصل على صفوان .

فهد .. صباح الخير يا صفوان .. طمنى اخبار تلجلسه و النطق بالحكم ايه .
صفوان .. صباح النور يا فهد بيه .. القضيه اتأجلت لشهر اودام .
فهد .. ماشى يا سيدى وانت لسه فى المحكمه ولا رجعت على المكتب .
صفوان .. لا انا لسه خارج من المحكمه وركبت عربيتى وطالع على المستشفى.
فهد ابتسم ابتسامه خبيثه وقال .. هى العروسه لسه فى المستشفى ولا ايه .

صفوان .. لا يا سيدى همس الظاهر خرجت وعمر هو اللى اتحجز فى المستشفى وعمل عمليه وانا رايح دلوقتى علشان اشوفه .. لان همس ووالدتها معاه من امبارح وانا معرفتش غير الصبح قبل ما اروح على المحكمه .

فهد بخبث قال لنفسه همس معاه طيب .. ماشى يا صفوان الف سلامه عليه وانا مسافه السكه وهاكون عندكم .. ادينى عنوان المستشفى .
صفوان .. هههههه تصدق مش عارف هما فى انهى مستشفى .. انا هاتصل على همس واخد العنوان وابقى ابعتهولك .
فهد .. ماشى يا صفوان يالا سلام .

فهد قفل الموبيل وقال .. اخيرا هاشوفك يا عروسه وضحك ضحكه عاليه اوى وقال هاتروحى منى فين .. كلها يومين بالكتير وتبقى فى حضنى واخد كل اللى انا عاوزه منك .. وبعدها نده على بلال وقاله جهز العربيه علشان هانروح مشوار مهم بسرعه .

بلال .. ثوانى والعربيه تكون جاهزة يا فهد بيه .
وفعلا دخل فهد وغير لبسه ولبس بدله حلوة واخد موبيله ولبس نضارته ونزل من الفندق وركب العربيه وكان وراه عربيه البودى جارد بتوعه .. اللى بيمشوا وراه زى ضله.

وبعد شويه كان وصله موقع المستشفى الى بعته صفوان وراح على العنوان بعد ما كلب من سواق العربيه يوديه عليه .. ونزل اودام باب المستشفى ودخل على طول هو وبلال وواحد بس من البودى جارد بتوعه .

ووصل لاوضه عمر بعد ما سأل على رقم اوضته وطلب من بلال والراجل بتاعه انهم يفضلوا بره الاوضه وهو دخل على طول وزى عاويده من غير استئذان .
كان عمر نايم على سريره وصفوان ووالدة عمر قاعدين على كنبه من غير كلام خالص واتفاجؤا باللى دخل من غير ما يستأذن.

صفوان اول لما شاف فهد اودامه قام وقف ورحب بيه وشد كرسى ليه علشان يقعد عليه .

فهد مد ايده لام همس علشان يسلم عليها لكن هى مرديتش تسلم عليه وقامت خرجت من الاوضه خالص .
صفوان اتحرج من موقف مراته تجاه فهد بس اعتذرله وقال ان نفسيتها تعبانه بسبب كل اللى بيحصل لهمس وعمر .
فهد .. مش مشكله .. المهم عمر عامل ايه وفين همس مش شايفها يعنى .
صفوان .. دقيقه وتكون همس هنا .. انا اصلا جيت من شويه وسألت عليها وامها قالت انها راحت الكافيتريا تشرب قهوة لانها طول الليل سهرانه جنب اخوها ومنمتش خالص .. زمانها جايه على طول ما تقلقش.

فهد .. تمام .

صفوان .. تحب اطلبلك شىء تشربه يا باشا .
فهد حط رجل على رجل وسند ضهره لورا وقال .. هاتلى قهوة .
صفوان قام وقف وقال .. دقيقه وتكون عندك يا باشا وطبعا بتحبها مضبوط صح .
فهد .. اه مضبوط .

فارس كان لسه نايم من تاثير الحقن وسلمى كانت قاعده بره فى الرسبشن الخاص بالزوار مع عادل ووالد فارس .. فمسكت موبيلها وحبت تطمن على همس وتعرف اخبارها ايه .

همس كانت فى الكافيتريا لسه بتشرب فى القهوة وسرحانه فى فارس واللى عملته معاه .. وفجأه سمعت الموبيل بيرن ففرحت انه ممكن يكون فارس علشان تسمع صوته اللى وحشها بجنون .

للاسف مسكت الموبيل وشافت اسم سلمى وردت عليها .

همس .. اهلا يا سلمى .
سلمى ... همووووس اخبارك ايه .. وعامله ايه يا حبيبتى دلوقتى .
همس بأرهاق .. الحمد لله يا سلمى.. انا هنا فى المستشفى مع عمر وبدأت تعيط .........
سلمى .. خير يا همس عمر ماله طمنينى يا قلبى .

همس حكت لسلمى كل شىء حصل لعمر اخوها من ساعه ما سابت المستشفى وراحت لفارس لحد ما حصل اللى حصل لعمر .

سلمى بحزن .. يا لهوووى كل ده حصل فى الكام ساعه اللى سيبتك فيهم يا همس .. اخص عليكى وليه ما اتصلتيش بيا وقولتيلى وانا كنت جيت ووقفت معاكى فى موقف زى ده .. انت اختى وعمر اخويا يا همس .

انا مسافه السكه واكون عندك مش عاوزه اى شىء اجيبه ليكى وانا جايه انا وعادل .

همس .. ما تتعبيش نفسك وتنزلى مخصوص يا سلمى . ولا تتعبى عادل معاكى .
سلمى .. يا بنتى احنا اصلا هنا عند فارس فى المستشفى واول لما اقول لعادل هايجى معايا على طول انتى عارفه انه بيحب عمر جدا وهايزعل عليه اوى وعلى اللى حصله .

همس ... فارس عامل ايه دلوقتى يا سلمى .. ما سألكيش عليا ؟؟؟؟

سلمى .. لما اجى هاحكيلك على كل اللى حصل .. سلام دلوقتى ومسافه السكه وهاكون عندك .
همس .. ماشى يا سلمى.
وفعلا قفلت سلمى مع همس وبلغت عادل بكل اللى حصل مع عمر اخوا همس ..

عادل زعل جدا جدا وقام وقف واستاذن من والد فارس وخد سلمى ونزلوا على تحت وركبوا العربيه وراحوا على المستشفى اللى فيها عمر .

فارس كان بدا يفوق وبينده على همس كل شويه وكانت والدته معاه وقلبها بيتقطع عليه واتمنت ان همس تيجى علشان فارس يفرح ويخف بوجودها .
دخل الاب علشان يطمن عليه وشاف مراته وهى بتعيط على منظر فارس .. فقرب منها وفضل يهدى فيها.

الام بحزن ودموع مغرقه وشها .. هاتله همس من ساعه ما بدا يفوق وهو بينده عليها .. قول لعادل يجبهاله علشان ابنى يفرح هو بيحبها اوى اوى.

الاب .. عادل نزل هو وسلمى وراحوا على المستشفى لان اخو همس محجوز وعمل عمليه كبيرة واكيد هى مش هاتسيب اخوها وتيجى لفارس يا ام فارس .
الام بحزن .. ماشى يا حاج .. ربنا موجود وقادر يخفف عنه .

همس كانت خلصت قهوتها ورجعت على اوضه عمر واتفاجأت بفهد قاعد مع ابوها .

فهد فرح اوى اول لما شافها وقام وقف ومد ايده ليها وقال .. ازيك يا همس وياريت تكون رسالتى وصلتك .
همس بنظرات كلها استحقار لفهد قربت من سرير عمر وقالت ... اه وصلت وحسابى ليك بعدين .
فهد بنظره شهوة ليها وجابها بعيونه من اول شعرها لحد ........ ( عيب )
قال .. وانا اموت فى الحساب اللى يجى منك يا حلوة .. لان اى شىء يجى منك هاحبه اوى اوى اوى .

همس .. اتفضل اطلع بره بقى علشان الدكتور مانع الزياره عن عمر .

صفوان فى ايه يا همس عيب الكلام اللى بتقوليه لفهد بيه ده .
فهد .. سيبها يا صفوان براحتها الظاهر ان الرساله اللى بعتهالها مش مكفياها .. بس اوعدك ان المرة الجايه الرساله هاتعجبك اوى اوى يا عروسه .
همس سكتت خالص و خافت من تهديده ليها تانى وافتكرت المرة اللى فاتت وتهديده اللى حصل وكان ممكن فارس يموت فيها لولا ستر ربنا فخافت من تهديده دلوقتى وفجأه وقفت اودام فهد وقالت...
انا موافقه على الجواز منك
رواية فارس عشقي للكاتبة سحر فرج الفصل الثامن عشر

همس حست من كلام فهد انه بيهددها تانى وانه ممكن ياذى فارس وممكن المرة دى يموته فعلا فخافت على حياته ففكرت للحظات وخدت تنهيده كبيييييرة وقربت من فهد ووقفت اودامه وقالت ... انا موافقه على الجواز منك.


فهد بفرحه انتصار ... وانا تحت امرك حددى الوقت اللى يناسبك وانا اعملك فرح الكل يحكى عنه .. واجبلك الشبكه اللى تختاريها واجبلك فستان الفرح من باريس .

رضوان .. احسن قرار انتى ختيه يا همس يا بنتى .. بنات كتير تتمنى ان فهد بيه يتجوزها .
لكن هو ساب بنات الدنيا كلها وطلب ايدك انتى .

همس عملت نفسها انها مسمعتش اى حاجه من كلام ابوها ووجهت كلامها لفهد وقالت ... وانا مش عاوزة فرح ولا عاوزة شبكه ولا عاوزة فستان .. كل اللى انا عوزاه اننا نخلص من الموضوع ده فى اقرب وقت ونعمل قاعده صغيره فى البيت عندنا .

طلبى الوحيد هو انى افضل زى ما انا فى شغلى واعيش هنا ف القاهرة طبعا علشان اكون قريبه من المطار .
فهد بصدمه .. شغل ؟؟ وتعيشى فى القاهرة ؟؟ طب ازاى وانا كل شغلى فى اسكندريه .

همس .. مش شغلى هو ده شرطى الوحيد على الجوازة دى موافق ولا لا .

فهد .. موافق موافق وامرى لله .. تحبى نتجوز امتى يا روحى ولسه هايقرب منها ويلمس ايديها رجعت لورا وقالت .. نطمن على عمر الاول ويرجع للبيت ونبقى نحدد ميعاد .. وسابتهم مستغربين كلامها ده .

وفتحت باب الاوضه وخرجت وحست انها عاوزة تصرخ بأعلى صوتها وجريت ووقفت ناحيه شباك لانها كانت فى امس الحاجه للهواء وبعدها اتفتحت فى العياط .

فى اللحظه دى كانت سلمى وصلت هى وعادل وشافوا همس فى الحاله دى فاستغربوا عن سبب حالتها دى وهمس ما صدقت شافت سلمى واترمت فى حضنها .
.سلمى .. اهدى يا همس ..خير يا حبيبتى انتى كويسه .. وعمر كويس .

عادل .. مالك يا همس فى ايه يا بنتى .

هما افتكروا عمر حصله حاجه لا قدر الله بس بعد دقايق اتفاجؤا باللى خارج من اوضه عمر واتصدموا اول لما شافوا فهد الجبالى .
سلمى .. ايه اللى جاب الحيوان ده هنا يا همس .. هو زعلك تانى ولا ايه .
فهد شاف نظراتهم ليه فحب يدايقهم اكتر فاقرب من همس وقال .. متنسيش بقى يا حبيبتى تبقى تكلمينى علشان ننزل نجيب احلى شبكه لاحلى عروسه ماشى يا روحى وايده كانت على خدها .

همس نطرت ايده بعيد عنها وعيونها جت فى عيونه باستحقار .

سلمى اتصدمت هى وعادل وقالت .. شبكه ايه يا همس اللى بيتكلم عنها الراجل ده .
فهد .. ايه ده انتم متعرفوش .. انا وهمس هانتجوز وقريب اوى باركولها .. وسلام يا روحى بقى وبينا تليفون علشان اروح اضبط شغلى فى اسكندريه تشااااااو .
سلمى وعادل الكلام ده مضبوط يا همس .

همس كل اللى جه عليها السكوت والدموع اللى كانت مغرقه وشها .. بس للاسف عادل طلب من سلمى انهم يمشوا من غير حتى ما يستنوا رد من همس .

عادل .. بقولك يالا يا سلمى مالوش لازمه الكلام خلاص ومبرووووك يا عروسه عليكى فهد الجبالى.
همس بنظره عتاب لعادل وسلمى كانت كفيله انها تفقدها الوعى .
وفى ثوانى كانت همس واقعه على الارض فقرب منها ابوها وحاول يفقوها
رضوان .. همس .. همس .. فوقى يا بنتى .. اطلبولنا الدكتور بسرعه .

بس للاسف عادل شد ايد سلمى ونزلوا من المستشفى خالص من غير حتى ما يطمنوا على همس .

عادل وسلمى ركبوا العربيه وكانت الصدمه لسه مسيطرة عليهم .
سلمى .. انا مش مصدقه الكلام ده خالص .. واستحاله همس توافق على الحيوان ده وتسيب فارس اللى بتحبه .. اكيد فى حاجه غلط غصبتها على كده .
عادل .. ولا فى ولا مفيش .. هى بصت مين اللى عنده فلوس ونفوذ اكتر يا هانم .. همس لو بتحب فارس بجد ما كنتش وافقت على المسخرة دى .

سلمى .. ما تظلمهاش يا عادل لو سمحت .. همس صاحبتى وزميلتى من زمان .. انا حاسه ان همس بتمر بحاجه غريبه فى حياتها ومش عاوزه تقولى عليها .. ده لسه كانت بتسألنى على فارس وعلى صحته .. ومنين هى دخلت المستشفى وانهارت لما عرفت ان فهد ده طلب ايديها .. اكيد فى حاجه انا مش عرفاها .

المهم دلوقتى يا عادل اوعى تقول لفارس على اللى انت سمعته ده كفايه اوى اللى هو فيه .. بدل ما يتهور ويروح يقتل فهد الجبالى ده . مع ان حلال فى القتل والله .
عادل .. لا لازم فارس يعرف حقيقه الهانم اللى بيحبها وكان ممكن يموت بسببها .. انا كده اتاكدت فعلا ان فهد الجبالى ليه يد فى حادثه فارس .. ولازم اروح ابلغ الشرطه بكده .

سلمى ارجوك يا عادل اهدى ومتخلهاش تيجى منك انت .. متقلوش اى شىء لحد لما اعرف من همس ليه هى وافقت على الجوزاه دى وقدرت انها تبعد عن فارس بالسهوله دى .

عادل بقله حيله .. خلاص ماشى بس فى اقرب وقت اعرفى منها السبب وبلغينى علشان مش هاقدر اشوف فارس بيضحك عليه من همس وهاسكت .
سلمى .. وانا موافقه بس ادينى فرصه لكده وانا هاقولك والله كل اللى هى قالتهولى وكان السبب فى انها تسيب فارس وتضحى بحبها ليه بالسهوله دى وعلشان مين علشان الزفت فهد ده .

فى المستشفى عند فارس كان فاق وقام وقف وكان مصمم انه يخرج من المستشفى بحجه انه سايب الشركه لوحدها وعاوز يرجع ويشوف شغله .

الاب .. اصبر يا ابنى يومين تلاته كده عقبال لما ترد صحتك .. الشغل مش هايطير وكده كده عادل واخد باله من كل شىء وانا بروح شويه واخلص كل الشغل اللى متعطل .

الام .. اسمع الكلام يا فارس يا ابنى علشان خاطرى .. احنا ما صدقنا انك بقيت كويس .

فارس .. هى كلمه واحده انا هامشى يعنى هامشى ولسه هايكمل كلامه الدكتور دخل وسمع ان فارس عاوز يسيب المستشفى دلوقتى .
الدكتور .. ياه للدرجه دى زهقت مننا يا فارس ولا ايه .. خليك معانا يومين لحد منطمن عليك خالص ونسمحلك بالخروج .. وبالمرة نضمن ان الجرح لم خالص وماشى مضبوط على الادويه .

فارس .. لا يا دكتور انا اصلا مش بحب نوم السرير ده خالص ولا جو المستشفيات اطلاقا وبعدين انا اصلا بقيت كويس وبعد اذنك اكتبلى على الخروج واوعدك انى هاخد العلاج وهابقى تمام .

الدكتور بص لابوه فارس ووالدته وقال امرى لله بس كمان اسبوع لازم ترجع المستشفى علشان نطمن على الجرح .
فارس .. اوعدك بكده .. انا هانزل دلوقتى يا بابا اروح على الشركه وابقوا حصلونى على البيت .
الاب .. اللى تشوفوا يا ابنى وخلى بالك من نفسك .. وعلى فكرة مفاتيح عربيتك الجديده اهى انا بعت جبتلك واحده هاتعجبك اوى واحسن من الاولى كمان .
فارس .. شكرا يا بابا يالا سلام .. وقرب من امه وباس راسها وفتح الباب وخرج من المستشفى خالص .

فارس اول لما نزل ركب العربيه واول حاجه فكر فيها انه يتصل على همس ويعرف هى فين بالضبط .

للاسف همس كانت سايبه موبيلها على السرير بتاع عمر فى المستشفى وهى كانت فى الكافيتريا بتشرب قهوة زى العادة اللى بقت ادمان بالنسبه لها .
عمر سمع الموبيل بيرن فمسكه علشان يعرف مين بيرن على همس .. وشاف اسم فارس فامرديش يرد عليه وفضل الموبيل يرن لحد ما وقف وبعدها على طول الموبيل رن تانى وبرضه كان فارس فارد عليه .

عمر بتعب وارهاق .. الو ايوا يا فارس انا عمر .

فارس استغرب ان عمر اللى بيرد عليه فقال .. اهلا يا عمر اخبارك ايه .. هى همس فين عاوز اطمن عليها .
عمر .. انا بخير الحمد لله .. وهمس نزلت كافيتريا المستشفى بتشرب قهوة وزمانها جايه .
فارس بتعجب !!!!!!!! هى همس لسه محجوزة ولا ايه فى المستشفى يا عمر .
عمر لا لا ابدا همس بقت كويس .. ده انا اللى محجوز وهى اللى قاعده هى وماما معايا .. وبدا يحكى لفارس عن سبب وجوده فى المستشفى وكمان عن السبب الرئيسى وهو طلب فهد الجواز من همس .

فارس .. كل ده يحصل وانا معرفش .. ادينى عنوان المستشفى لو سمحت يا عمر .

وفعلا عمر اداله اسم المستشفى وخلال عشر دقايق كان وصل فارس اودام باب المستشفى نتيجه سرعته الجنونيه .
فارس وصل المستشفى ودخل على طول وسأل على الكافيتريا علشان يروح لهمس هناك .
وفعلا اول لما دخل الكافيتريا شافها قاعده فى ركن لوحدها وباين عليها الحزن والأسى.
قرب فارس بشويش من همس وحط ايده على كتفها وقال .. وحشتينى اوى يا همسى .
همس اتفاجأت بفارس وقامت وقفت وعيونها جت فى عيونه وعلى طول اترمت فى حضنه وبدأت تعيط جامد .

فارس استغرب جدا من تصرف همس وعيونها وشكلها اللى بيدل على ان فى شىء كبير اوى حصل لها فابدأ يهديها ويطمنها وقال .. انا عرفت كل شىء وعرفت ان الحيوان ده عاوز يتجوزك .. اطمنى انا جنبك ومش هاسيبك لوحدك تانى ابدا يا عمرى .. اوعى تخافى منه مهما يقول او يعمل او حتى يهددك واوعدك انه لا يمكن يقرب منك طول ما انا جنبك .


همس برقه وبصوت كله الم وحزن .. انا بحبك اوى يا فارس .. انا بعشقك يا حبيبى وعمرى ما حبيت حد غيرك انت وبس . وعمرى ما هاقدر ابعد عنك ولا اكون لاى حد غيرك .. اوعدنى يا فارس انك مهما تعرف او تسمع عنى انك تنسانى او تكهرنى لاى سبب ..اوعدنى يا فارس ارجوك .

فارس باستغراب .. ليه بتقولى كده بس يا حبيبتى .. اوعى تخافى او تضعفى او تعملى اى شىء يبعدنا عن بعض .. انا مش هاخلى اى حد يخدك منى فاهمه .
ولسه هايكمل فارس كلامه سمعوا صوت حد بيقول .. ما شاء الله .. ممكن اعرف انتم بتعملوا ايه مع بعض .

ههمس اتصدمت اول لما سمعت صوت فهد وهى فى حضن فارس فابعدت بسرعه عن فارس ووقفت بعيد عنه .

فارس لف نفسه اول لما سمع صوته وبعزم ما فيه اداله بوكس جامد خلاه يقع على الارض .
البودى جارد فى ثوانى جريوا وشالوا فهد من الارض وراحوا لفارس وفضلوا يضربوا فيه هما الاتنين وده اللى خلى همس تصرخ وتترجى فهد انهم يسيبوه وطبعا هى عارفه انه تعبان وصحته ضعيفه ولسه خارج من المستشفى .

فهد كان فرحان بالضرب اللى خده فارس ومن محايله همس ليه أمر البودى جارد انهم يسبوا فارس .. وقال .. خلاص سيبوه بدام همس هانم امرت بكده يا بهايم .

وفعلا سابوه على الارض وكان منظره وحالته فظيعه .. وعيونه كلها على همس .

ولسه همس هاتقرب من فارس شدها فهد وقال .. يالا يا عروسه ورانا حاجات كتير لزوم الفرح .

فارس اتصدم من كلام فهد وحاول انه يقوم ويقف وقرب من همس وقال .. فرح ايه يا همس اللى بيتكلم عنه ده ؟؟؟؟
همس زادت فى العياط وقالت .. سامحنى يا فارس غصب عنى سامحنى يا عمرى .
فهد بضحكه انتصار .. اديك سمعت بنفسك يا فارس الحسن انا وهمس هانتجوز قريب اوى .. واياك اشوفك بعد كده تيجى جنبها انت فاهم .
فارس بغضب وبصوت عالى ... انت تخرس خااااالص ما اسمعش صوتك وقرب من همس وشدها من دراعها وقال .. جواز ايه اللى بيقول عليه ده يا همس فهمينى .. انتى هاتتجوزيه بعد كل الحب اللى بينا .. بعد كل اللى قولتهولك عنه اااااانطقى .. اوعى يكون مهددك باى شىء او خايفه منه انا جنبك وهافضل جنبك دايما وعمره ما هايقرب منك .

همس بحزن ودموع مغرقاها .. سامحنى يا فارس غصب عنى انا بعمل كل ده علشان وبصت لفهد بكره ............ وسكتت .

فارس .. علشان ايه انطقى .. ومع سكوت همس قال .. انا ندمان على كل دقيقه انا حبيتك فيها .. على كل لحظه اتمنيت انك تكونى ليا .. ده انا عمرى كله محبتش حد غيرك انتى يا همس .. تقومى فى الاخر تسيبينى انا علشان الحيوان ده اللى فى يوم من الايام كان السبب فى موت اخويا .
بس على العموم انتم الاتنين تشبهوا بعض مبروووووووك عليكى يا عروسه.

وسابهم ومشى وهو مش مصدق ان همس ممكن تعمل معاه كده رغم كل الحب اللى حبه ليها بس خلاص من هنا ورايح مفيش همس ولا فيه حب

وعند همس اللى كانت منهارده من كتر العياط والكلام اللى قاله ليها فارس وقلبها المجروح .. وعيونها على المكان اللى فارس خرج منه .. قرب منها فهد ومسك اديها وقال .. ولا يهمك يا قطه سيبك منه وانا هاعوضك عن كل ده وهاخليكى اسعد واحده فى الدنيا .. وكل ده وهمس فى عالم تانى خالص ولسه هايضمها فى صدره وياخدها في حضنه الا وخد حته قلم من همس رن رنه وقالتله ابعد عنى يا قذر يا حيوان وسابته ومشيت .
فهد حط ايده على وشه وبمنتهى السفاله والقذاره قال .. اووووووووف امووووت انا فى الخربشه والشراسه دى يا قطه ومد ايده على شفايفه وباسها .. ولما لاحظ نظرات رجالته ليه فاق وقال فى ايه يا بهيم منك ليه .. ورايا على العربيه .

فارس كان وصل اودام باب الشركه وركن عربيته ونزل بمنظره ده ووشه كان فيه دم من اثار الضرب بتاعه رجاله فهد والكل كان بيبص عليه وفى نفس الوقت كانوا مفكرين ان اللى هو فيه ده من الحادثه بتاعته فبدؤا يسلموا عليه لكن هو مداش حد فرصه لكده ولاحتى رد عليهم بالعكس هو مكنش شايف اودامه اصلا وراح على طول على مكتبه حتى السكرتيرة بترحب بيه مردش عليها ودخل على اوضته ورزع الباب وراه .

شد كرسى المكتب وخد نفس كبيييييييير وفى ثوانى كان كل اللى على المكتب على الارض وكسر كل شىء اودامه .
السكرتيرة كانت بره مستغربه جدا جدا من اللى هو بيعمله واتفأجات بدخول عادل للمكتب .
السكرتيرة بلهفه ... كويس ان حضرتك جيت يا باشمهندس عادل كنت لسه هاتصل عليك فى مكتبك .
عادل .. خير يا هند ؟ انا عرفت ان فارس وصل الشركه بجد الكلام ده .

السكرتيرة .. ايوا يا افندم علشان كده كنت هابلغ حضرتك .. لانه من ساعه ما وصل وشكله وتصرفاته غريبه جدا وعلى ما اعتقد كده كل شىء فى الاوضه جوه اتكسر وعمال يكسر لسه .. الظاهر فى حاجه مزعلاه .

عادل باستغراب ... طب خلاص انا هادخله واشوف فى ايه بالضبط اهدى انتى ومتدخليش اى حد علينا .
وفعلا فتح عادل باب مكتب فارس ودخل وقفل وراه الباب .. وعينه جت على فارس اللى كان قاعد على كرسى المكتب ومديله ضهرة وحاطط ايده على راسه .. وكل شىء فى الاوضه متكسر ومرمى على الارض فاتأكد ان فى حاجه سبب كل اللى عمله فارس ده .
فقرب منه وقال .. حمد الله على السلامه يا فارس الشركه كلها نورت بيك يا صاحبى .

فارس بغضب وعيون حمرا .... عاوزك تجبلى كل شىء يخص فهد الجبالى .. بيشتغل فى ايه بالضبط جوه مصر وبره مصر غير اللى احنا عارفينه عنه .. ومين الشركات اللى بتموله من برة مصر ؟؟؟وكمان الصفقات اللى بيعملها وياخدها لصالح مين ؟؟؟عاوز اعرف كل حاجه وفى اسرع وقت يا عادل.

عادل ضربات قلبه زادت وشك ان فارس عرف عن جواز همس من فهد وقال .. انت اكيد عرفت صح ؟؟
فارس .. عرفت ايه انطق .

عادل بتردد .. عرفت موضوع جواز فهد من همس صح .

فارس قام وقف وقرب من عادل وبعيون كلها غضب قال ... انت كنت تعرف وما قولتليش يا عادل ؟؟؟ ازاااااى فهمنى تبقى عارف حاجه زى كده وانا معرفش ازاااى يا صاحبى يا اخويا .. تسيبنى مضحوك عليا الفترة دى كلها فهمنى .. انا خلاص هاتجنن . انا بموووووووت يا عادل بموووت ومش مصدق اللى همس عملته معايا ده .. انا اكيد بحلم.

عادل .. اهدى يا فارس ارجوك اقسملك بالله انى لسه عارف النهارده بس عن موضوع فهد وهمس ده وعملت معاها موقف وكنت هاعرفك كل شىء صدقنى يا فارس .

فارس بحزن بص لعادل وبعيون كلها عتاب شد مفاتيح عربيته من على المكتب ومن غير ما يرد على عادل فتح باب المكتب وخرج .
عادل .. رايح فين يا فارس ارجوك استنى ..فارس فاااااااارس .
رواية فارس عشقي للكاتبة سحر فرج الفصل التاسع عشر

عادل فضل ينده على فارس ... فااااارس .. فاااارس استنى يا ابنى .

فارس كان نزل خالص من الشركه وكان مش طايق نفسه ولا عاوز يشوف اى حد خالص فاركب عربيته وساقها باقصى سرعه .

فضل سايق كتير ومش عارف هو رايح فين خالص ..وكل تفكيره فى اللى حصل من اول مرة شاف فيها همس لحد اللحظه اللى اعترف فيها بحبه ليها وهى اعترفت بحبها ليه وافتكر كمان رحله ايطاليا واليومين اللى قضاهم مع همس وكانوا احلا يومين عاشهم فى حياته .

لحد ما دمعه نزلت من عيونه لما افتكر همس وهى واقفه اودام فهد وبمنتهى القسوة تعترف انها هاتتجوز من عدوه الوحيد طول حياته فهد الجبالى .

وبكل قوته فضل يضرب على الدركسيون اوى اوى وفرمل فاجأه مع سرعته دى ونزل من العربيه وراح وقف اودامها وفضل يضرب العربيه بايده ويقول

ليه يا همس لييييه تعملى فيا كده بعد كل الحب اللى حبيته ليكى ليه يا همس لييييييييييه .
ودموعه نازله ودى كانت اول مرة تنزل على حد عزيز اوى كده عليه
فضل يضرب ويضرب لحد ما تعب ووقع على الارض وقعد وحط ايده على راسه .. وفضل مده طويله على الوضع ده لحد ما الليل ليل عليه وهو على حاله ده .
و فى المستشفى كانت همس قاعده هى وعمر اخوها وامها .

وعمر كان فاق من اللى هو فيه وعرف ان همس خلاص وافقت على الجواز من فهد وفضل يكلمها ويترجاها انها تلغى الفكرة دى خالص من دماغها هو وامها لكن هى صممت انها هاتكمل اللى هى بدأته خوفا على فارس اللى بتحبه وعلى حياته .

عمر .. بس يا همس ده مش حل ولازم فارس يعرف كل حاجه ويعرف تهديد فهد ليكى وهو قادر يحمى نفسه كويس اوى منه .. فارس كبير برضه وقوى وليه نفوذه ومش ضعيف ومش ممكن واحد زى فهد ده يعمله حاجه .

همس بضحكه هستيريه .... فهد ده حيوان وقدر انه يوصل لفارس وكان هايموته يا عمر لولا ربنا ستر ولا نسيت وانا مش هاقف اتفرج لحد ما يحاول يموته تانى اودام عيونى .

انا هاضحى بحياتى علشان احافظ على فارس يا عمر .. انت مش عارف انا بحبه اد ايه واللى بيحب حد للدرجه دى يضحى بحياته علشان يحميه .. وانا هايجى الوقت اللى هاقدر اقف اودام فهد واحاسبه على كل شىء عمله فيا وفى فارس حتى انت يا عمر لانه كان السبب فى اللى انت فيه دلوقتى ده .. وهايندم اشد الندم على كل حاجه وحشه هو عملها فى حياته .

عمر بحزن ... بس انا خايف عليكى يا حبيبتى ومش عاوز الزفت ده يقرب منك غصب عنك انتى فهمانى يا همس .. ده هايكون جوزك ولو عرفت انه اذاكى انا هاموته اقسم بالله .

همس .. انا عمرى ما هاكون ليه يا عمر والنجوم السماء اقربله من انه يلمس شعرة منى او يقرب منى حتى وبكره افكرك بالكلام ده كويس اوى .
المهم عندى دلوقتى صحتك انت وبس ولازم تاخد العلاج مضبوط وتعمل العلاج الطبيعى يا حبيبى .
الام ... منك لله يا فهد منك لله وفضلت تعيط .

عمر .. انا شاء الله .. انا راضى باللى ربنا كتبهولى وباذن الله هابقى احسن من الاول بكتير .

وفجاه الباب خبط وكانت سلمى ورغد واختها جنه جايين يطمنوا على حاله عمر .
همس بحزن .. اهلا وسهلا يا بنات اتفضلوا .
سلمى ورغد اتصدموا من منظر همس والحاله اللى هى فيها وقربوا منها وسلموا عليها هما وجنه .
جنه برقه قربت من عمر ومدت اديها وسلمت عليه وقالت . حمد لله على السلامه يا كابتن عمر والف سلامه عليك وان شاء الله ترجع زى الاول واحسن .
عمر بنظره كلها حب قال ... الله يسلمك يا جنه ومتشكر ليكى جدا مكنش ليه لزوم تتعبى نفسك .
جنه .. ما تقولش كده ده انا زعلت اوى من ساعه عرفت اللى حصلك وصممت انى اجى واطمن عليك بنفسى انت متعرفش انت عزيز عندى اد ايه ☺...... قصدى انت وهمس.

عمر .. متشكر جدا ليكى وما تحرمش منك .

وقربت سلمى ورغد وسلموا عليه وفضلوا يقوه ويشجعوه علشان يواظب على علاجه الطبيعى والادويه وان شاء الله يرجع زى الاول واحسن .
سلمى خدت همس على جنب وسألتها على حالها ومنظرها ده .. وهمس ما صدقت وحكت لها على كل اللى حصل .

سلمى بحزن .. لا يا همس انتى غلطانه ولازم تقولى لفارس على كل حاجه .. فارس بيحبك اوى وانتى بتحبيه واستحاله واحد مجرم زى فهد ده يفرق بينكم اوعى يا همس اوعى مهما يهددك او يقولك الحيوان ده .. فارس هايقدر يقف قصاده ويوقفه عند حده والبلد فيها حكومه وقانون ويقدروا يوقفوا برضه عند حده هو مفكر نفسه مين .. وانا معاكى وعمر اخوكى معاكى وكلنا هانقف فى ضهرك متخافيش يا حبيبتى .. وربنا كبير قادر يخسف بيه الارض .


همس بعيون كلها دموع على حالها واللى وصلت ليه .. انا خايفه اوى يا سلمى .. وكل خوفى على فارس نفسه وعلى حياته .

المرة اللى فاتت لما فهد هددنى انا مسمعتش كلامه واستهونت بتهديده وكانت النتيجه الحادثه اللى دبرها لفارس ونجى منها .. وانا مش هاستنى مرة تانيه يهددنى ويموته يا سلمى افهمينى .

سلمى .. يا حبيبتى افهمينى قولى لفارس واحكيله كل حاجه وهو هايقف قصاده وهايقدر يحميكى منه ويحمى نفسه .. لازم فارس يعرف كل حاجه يا همس .

انا مش عارفه ابوكى فين فى ده كله الصراحه .. همه الوحيد الشغل والفلوس وبس .. ازاى يوافق و يبيعك كده لواحد كبير عنك وعارف كل البلاوى بتاعته ليه وعلشان ايه .. يغور الشغل اللى هايجى على حساب وحياه اعز الناس ليا .

اسمعى كلامى يا همس قولى لفارس كل حاجه ولا هاقوله انا واللى يحصل يحصل بقى .

همس ... لا يا سلمى ارجوكى متخلنيش اندم انى قولتلك على كل حاجه .. اوعى تجيبى سيرة لفارس او حتى عادل .. انتى كده ممكن تقضى على حياته وتكونى سبب فى موته يا سلمى اوعى اوعى .. اوعدينى يا سلمى.
سلمى همس صعبت عليها اوى اوى وقربت منها وخدتها فى حضنها وقالت .. خلاص يا همس مش هاقول حاجه لفارس بس خلى بالك من نفسك وفكرى مليون مرة فى الكلام اللى انا قولته ليكى .

همس.. ادعيلى يا سلمى انى اكون بحلم وفهد ده مجرد كابوس ودخل حياتى .

سلمى .. قولى يارب يا همس هو اللى سامع دعاكى وحاسس بيكى .
رغد استغربت تأخير همس وسلمى بره الاوضه فراحت علشان تنده لهم وشافت همس وهى بتمسح دموعها فقالت ... مالك يا حبيبتى شكلك مش عاجبنى خالص .. ودبلانه وحزينه فى ايه يا همس .

همس .. ابدا يا رغد مفيش حاجه .. كل اللى فيها انى زعلانه اوى على الحاله اللى وصل لها عمر وخايفه ما يرجعش زى الاول والخبطه تأثر عليه .

رغد بحب .. ان شاء الله اطمنى حبيبتى هايتحسن ويرجع زى الاول .. عمر انسان رياضى وبيحب الرياضه وهاياخد علاجه ويعمل العلاج الطبيعى وان شاء الله هايتحسن على طوووول .

همس .. يارب يا رغد ياااااااارب .

جنه كانت لسه جنب عمر والكلام خدهم ولما حست ان البنات كلها خرجت بره وام عمر قاعده على الكرسى وبتقرا فى المصحف اتكسفت واستاذنت من عمر انها تروح تشوفهم .
عمر .. انتى زهقتى منى ولا ايه وعاوزة تهربى بحجه انك تشوفى البنات .

جنه .. ابدا والله يا كابتن عمر اصل مش معقول افضل ارغى معاك كل الوقت ده والبنات واقفه بره وبعدين طنط تقول عليا ايه بس .

عمر .. اولا ايه كابتن دى .. خليها عمر على طول فاهمه .. وبعدين متخافيش طنط بتحب اللى انا بحبهم.
جنه اتكسفت اوى من كلام عمر وجريت عند الباب وفتحته وراحت عند البنات .
عمر ... دى بتتكسف وشها احمر كمان ... لا انا لازم اخف بسرعه واشوف ايه حكايتها معايا بالضبط جنه دى .

البنات كلهم استاذنوا ونزلوا وراحت همس معاهم توصلهم لحد تحت وقربت من سلمى وبصوت ضعيف جدا وقالت .. اوعى تقولى لحد يا سلمى ارجوكى .

سلمى .. متقلقيش يا حبيبتى مش هاقول لحد حاجه متخافيش .. المهم خلى بالك من نفسك انتى وشجعى عمر انه يمشى على كلام الدكتور بالضبط علشان يتحسن على طول .
همس .. بأذن الله يالا سلام .

فارس عدى وقت طويل عليه وهو قاعد على الارض فى الشارع وكان سايب موبيله فى العربيه . فقام وركب عربيته وهو حاسس انه متكسر ومتدشدش .. ومسك موبيله وشاف عليه اكتر من خمسين اتصال من عادل ومن ابوه وامه .

فاتصل على امه وطمنها عليه وقالها انه فى شغل وكان سايب الموبيل فى العربيه وقالها تبلغ ابوه بكده .
وشغل العربيه ومشى بيها بسرعه وبعد شويه وقف اودام العمارة اللى فيها عادل .
ركن العربيه وطلع فوق وخبط على شقه عادل .

عادل كان فاتح اللاب وبيخلص شويه حاجات مهمه للشغل فاسمع جرس الباب بيرن فافتكر سلمى وقال ما الحمارة دى معاها مفتاح مفتحتش ليه . ماشى يا سلمى فقام وقف وراح اتجاه الباب وفتح وقال .. يا جذمه انتى مش معاكى مفتاح بترنى الجرس ليه واتصدم اول لما شاف فارس اودامه .

عادل باحراج .. اهلا فااارس اتفضل ادخل .. معلش كنت مفكر سلمى رجعت من المستشفى.
فارس من غير ولا كلمه دخل وراح قعد على اقرب كرسى.
عادل .... كنت فين يا ابنى .. انا غلبت اتصل عليك وانت مش بترد قلقتنى عليك .

فارس ... مش وقته يا عادل انا تعباااان جدا ومش عاوز اتكلم عن اى حاجه دلوقتى .

عادل .. ماشى يا صاحبى هاسيبك براحتك دلوقتى .. بس قوم ادخل الحمام وهاجبلك غيار من هدومى وخد دوش يفوقك كده عقبال لما اجهزلك لقمه تاكلها .
فارس بتعب وارهاق وقلب مكسور ... انا هاقوم فعلا اخد دوش لكن مش عاوز اكل انا عاوز سرير انام عليه لحد ما النهار يطلع علشان مش هاقدر ارجع على البيت دلوقتى بالمنظر ده .

عادل .. ماشى يا فارس بس قوم يالا معايا هاطلعلك لبس واوريك الاوضه اللى هتنام وتستريح فيها .

فارس .. انا متشكر ليك يا عادل .. بس معرفتش اروح فين وانا بالمنظر ده وملقتش غيرك انت .
عادل .. ما تقولش كده يا فارس .. احنا عشرة عمر ومش اول مرة يعنى تيجى وتبات معايا ما انت ياما جيت وسهرنا مع بعض كتير من واحنا صغيرين .
فارس .. انت بتقول سلمى فين ولا انا من كتر التعب سمعت غلط .!!!!!!!!

عادل .. سلمى راحت هى ورغد يزورا عمر فى المستشفى ويطمنوا عليه وعلى همس .

فارس قام وقف ومن غير ولا كلمه دخل على الحمام اول لما سمع اسم همس .
عادل اتحرج انه قال اسمها بس ما كنش يقصد واكيد فارس هايعزره .
عادل راح على المطبخ وحاول يجهز اى حاجه خفيفه لفارس علشان ياكل اول لما يخرج وفعلا جهز شويه حاجات كده وسابها على السفره لحد ما فارس يخرج وراح علشان يكمل بقيت شغله على اللاب .

وبعد شويه سلمى كانت وصلت وطلعت المفتاح وفتحت باب الشقه وشافت عادل قاعد على اللاب وجنبه شويه ملفات .

سلمى .. مساء الخير ازيك يا عدوله .
عادل .. اهلا يا سلمى اتاخرتى كده ليه يا بنتى قلقتينى عليكم .
سلمى .. اسكت يا عادل اصل انا زعلانه جدا وقلبى وجعنى اوى على منظر همس والحاله اللى هى بقت فيها .
عادل .. هى لسه برضه صعبانه عليكى يا سلمى .. دى وحده سابت حبيبها فى عز تعبه وراحت تتجوز عدوه .
سلمى .. انا هاقولك على كل حاجه بس اوعى تجيب سيرة لفارس والنبى يا عادل علشان همس ما تزعلش منى .. همس مظلومه يا عادل ماتظلمهاش انت كمان زى ما فارس ظلمها .

همس وافقت على الجوزاة دى علشان بتحب فارس وخايفه عليه وعلى حياته لما فهد هددها انه هايموت فارس لو هى مرديتش تتجوزه .

وهددها اول مرة وهى اتهيئلها انه مجرد كلام لكن تهديده ده نفذه ودبر الحادثه بتاعه فارس وكان ممكن يموووت فيها .
وهى مش هاتستحمل انه يعمل حاجه تانى لفارس .. ووافقت انها تضحى بحبها وبحياتها وتتجوز فهد بس علشان فارس يقدر يعيش .
وفارس مفكر انها سابته واستغنت عن حبها علشان تتجوز فهد وبس .

همس بتمووووووت يا عادل ومحدش حاسس بيها .. بس كل ده علشان حبها لفارس كبير اوى اوى .

وفجاه عادل بيلف نفسه اتصدم اول لما شاف فارس واقف وسمع كل كلام سلمى .
رواية فارس عشقي للكاتبة سحر فرج الفصل العشرون

سلمى بدموع ... همس بتموت يا عادل ومحدش حاسس بيها وبتعمل كل ده علشان بتحب فارس اوى اوى وهى صعبانه عليا جدا .

ولسه عادل هايقوم يقف وبيلف نفسه شاف فارس واقف مصدوم من الكلام اللى سمعه من سلمى عن همس .

عادل بصدمه ... فاااااارس !!!!!

انت خرجت امتى من الحمام .
سلمى .. ايه ده هو فارس هنا من امتى وماقولتليش ليه يا عادل ان فارس عندنا .. مكنش ينفع انه يعرف اى حاجه همس محلفانى انه ما يعرفش .
فارس كانت الصدمه لسه مسيطرة عليه فقرب من سلمى ووقف اودامها وقالها ... الكلام اللى سمعته ده مضبوط .
فهد هدد همس انه يموتنى وهى بتعمل كل ده علشان تحمينى منه يا سلمى . وهاتضحى بحبها وحياتها علشان فهد ما يقربش منى .
سلمى بتوتر... اصصصل...

فارس قرب منها ومسكها من درعها وقال .. قوليلى كل حاجه يا سلمى ارجوكى .. انا بمووووت وهى بعيد عنى .. وقلبى مجرووح وبتعذب اوى ومش مصدق ان همس تعمل معايا كده وتسيبنى علشان واحد زى الحيوان ده .. ارجوكى يا سلمى احكيلى على كل حاجه انتى تعرفيها ارجوكى يا سلمى .. لازم انقذ همس من الزفت اللى اسمه فهد ده وانتقم منه عن كل لحظه دايق فيها همس وزعلها وخلاها تعيش اللى هى فيه ده .. وهانتقم منه وهاخلص منه القديم والجديد وهاوديه فى ستين داهيه .. انطقى يا سلمى انطقى ارجوكى .


عادل قرب من فارس وقاله .. اهدى يا فارس واقعد علشان نشوف هانتصرف ازاى ونعمل ايه .

وسلمى هاتقولك على كل حاجه .. وبص لسلمى وقال خلاص يا سلمى ملوش لازمه انك تخبى حاجه عن فارس هو سمع كل حاجه خلاص ولازم نشوف هانعمل ايه علشان نمنع الجوازة دى باى شكل قبل ما همس تضيع مننا كلنا .

همس حست ان كل شىء انكشف وفارس عرف كل حاجه فقعدت وطلبت منه هو وعادل انهم يقعدوا وهى هاتقولهم على كل شىء .

وفعلا فارس قعد هو وعادل وسلمى بدات تقولهم عن كل حاجه عملها فهد مع همس ومرواحه ليها المطار ومدايقته ليها اكتر من مرة وحاحات كتير جدا وعلى موضوع ٦مر والوقعه الى وقعها من على السلم بسبب فهد برضه لانه كان نازل بسرعه وعاوز يروح لفهد ويموته بسبب همس اخته والى عمله فيها وفى صحتها ورفضه جوازه منها طبعا .

وطبعا عادل وفارس محدش فيهم كان يعرف ان وقعه عمر من على السلم ايه سببها اصلا .

وقالت كمان ان همس رافضه ان اى حاجه تحصل وبالذات موضوع الجواز ده غير لما عمر يخف خالص وتطمن عليه وبعدها هى موافقه عن الجواز من فهد بشرط انه يبعد عن فارس نهائى .

سلمى سكتت خالص وفارس وعادل استغربوا جدا واتصدموا من كلام سلمى والهدوء سيكر على المكان وفجاه ........

خبط فارس ايده على التربيزه اللى قصاده وزقها بعيد عنه وقال.. انا ازاى افكر فيها كده .. انا ازاى محستش انها مظلومه واستحاله انها تبعد عنى وتبيع حبى علشان خاكر فهد ..انا ظلمتك يا همس ظلمتك يا همسى وحبى وعشقى .

وقام وقف وعيونه بتطلع نااار وقال .. انا لازم اروح اموته .. انا هاموته علشان الكل يستريح منه انا هاقتله يا عادل هاقتله .

عادل بسرعه قرب منه ومسكه قبل ما يتحرك من مكانه وقاله اهدى يا فارس ارجوك واقعد موتك ليه مش هايحل حاجه بالعكس انت هاتروح فى ستين داهيه علشان كلب ولا يسوا وهاتتسجن او ممكن كمان تتعدم .
وبكده هاتبعد عن همس وترجع تندم طول حياتك .

سلمى .. عادل عنده حق يا فارس احنا لازم نفكر كويس اوى ونخطط اننا نوديه فى ستين داهيه ونشوف شغله والبلاوى كلها بتعتوه اكيد عنده حاجات توديه لحبل المشنقه برجليه.

فارس استوعب كلام عادل وسلمى وهدى شويه وقال لسلمى .. همس فين دلوقتى يا سلمى ارجوكى انا لازم اشوفها حالا .
سلمى قالت لفارس .. يا سيدى انا كنت سيباها بايته مع عمر فى المستشفى .

فارس رجع على الاوضه بسرعه وغير لبسه وخد مفاتيح عربيته وقالهم انه رايح لهمس على المستشفى .

سلمى .. طيب استنى اجى معاك يا فارس .
عادل .. سيبيه يا سلمى .. الوقت ده بالذات لازم يكونوا هما الاتنين لوحدهم .
وفعلا نزل فارس من عند عادل وركب عربيته بسرعه وباقصى سرعه ساق العربيه وراح على المستشفى .
وبعد عشر دقايق بالضبط نزل فارس من عربيته ودخل المستشفى وسأل على اوضه عمر رضوان وطلع على طووول .
بس للاسف كانت رجاله فهد قاعده اودام باب الاوضه ومنعوا فارس من الدخول بأوامر من فهد طبعا .
فارس حاول اكتر من مرة انه يدخل وهما طبعا منعوه وبدا فارس يضربهم بكل قوه فيه وافتكر كل حاجه وحشه حصلت ليه ولعيلته ولهمس بسبب فهد وطلع كل غله فيهم وهو بيضربهم .

همس كانت سمعت صوت دوشه بره وصوت حد بيزعق ففتحت الباب بسرعه ولسه هاتخرج لقت اللى واقف زى الفارس اودامها .

همس بصدمه .... فاااااااارس .
فارس بحب وعشق... عيون فارس وقلب فارس يا همسى .
همس حست انها بتحلم وصعبت عليها نفسها اوى وبدات عيونها تدمع .. فقرب منها فارس وشدها لصدره وضمها اوى اوى لحضنه .
وقال بهمس .. انتى ليا انا وبس يا همسى فاهمه .

همس بدات تعيط جامد وهو يضمها لصدره اكتر علشان يحسسها بالامان ويطمنها انه معاها وقريب منها وهايقدر يحميها ويحافظ عليها .

مد ايده لوشها ورفع راسها لفوق وبص فى عيونها بكل شووووق ولهفه فبدا وشها يحمر من الكسوف فثار اكتر واكتر وبحركه لا اراديه منها عضت على شفتيفها فاشعلت جنونه اكثر.

فاقترب من شفتيها والتهمهم حتى تكاد انفاسهم تنقطع.. وهمس امام شفتيها بطلاصم عشق تدل على عشقه لها.. واقترب مرة اخرى من شفتيها والتهمها فى قبله عصفت بكيانهم.. فبادلته قبلته بعمق اكثر وتمسكت برقبته وكاد ان ينقطع انفاس العاشقين .


ليفترقوا على صوت عمر ... هو فى ايه عندك يا همس .. وايه صوت الزعيق ده .

فهد طبعا كان رجع اسكندريه . ووصله خبر من الراجل بتاعه اللى واقف اودام المستشفى ان فارس الحسن دخل المستشفى .
فهد بغضب ماشى يا حيوان انا هاكلم البهايم الى موقفهم فوق اودام الاوضه واشوف محدش بلغنى ليه لحد دلوقتى
وغور انت وخليك واقف مكانك وبلغنى بكل شىء .

وفعلا قفل فهد الموبيل فى وش الراجل بتاعه واتصل على الاتنين التانين اللى موقفهم اودام باب الاوضه وطبعا من كتر الضرب اللى خدوه من فارس محدش رد عليه خالص .. فاتجنن اكتر وارجع اتصل باللى واقف تحت وقاله اطلع للبهايم اللى فوق وشوفهم مش بيردوا ليه .

همس كانت فاقت من اللى هى فيه وسمعت صوت عمر بصعوبه من الحاله اللى هى كانت فيها وبسرعه دخلت على جوا وردت عليه .
همس .. فى حاجه يا عمر بتقول حاجه .

عمر استغرب الحاله اللى همس فيها وقال .. فى ايه بره وايه الى بيحصل بالضبط .

همس ☺☺☺ااااااا............ ومعرفتش تقول ولا كلمه .
وفجاه دخل فارس بكل وقار وقال .. انا اقولك يا عم عمر فيه ايه بالضبط .
عمر اتفاجاه بدخول فارس وقال .. فارس .. انت هنا من امتى وخرجت امتى من المستشفى .

فارس قرب من عمر وقال .. انا هاحكيلك على كل حاجه . وفعلا قاله وفهمه كل حاجه هو ناوى يعملها علشان يوقف فهد ده عند حده .

عمر ... ايوا كده يا فارس انا كده اطمنت على اختى وعلى حبها .. وعرفت واتاكدت انك تستاهلها وانك راجل هايقدر يحافظ عليها وكويس انك عرفت كل حاجه .
فارس عيونه جت فى عيون معشقوته وغمز لها بعيونه من هنا ورايح انا اللى هاقف لفهد .. وياريت تسامحينى يا همس .. ياريت يا حبيبتى .. انا كنت اعمى ومقدرتش اشوف الحقيقه بعيونى .. وناوى النهار يطلع وهاروح اجيب الماذون ونتجوز هنا فى المستشفى .

ايه رايك يا عمر .

عمر بص لهمس وقال .. اللى تشوفه همس انا موافق عليه .
همس بعد ما كانت فرحانه وسعيده بكلام فارس ليها .. رجعت خافت تانى وحست ان فهد مش هايسبهم فى حالهم لو عرف موضوع الجواز ده .. وابوها كمان لانه موافق على فهد ودايما فى صفه علشان مصلحته وشغله وبس .
فارس حس بقلق همس فقام وقف وقرب منها ومسك اديها وقال .. انا مش عاوزك تخافى من اى شىء خالص يا روحى طول ما انا جنبك .. واعتبريه كابوس وحش وقومتى منه .

ههمس ابتسمت ليه وقالتله .. اوعى تبعد عنى تانى يا فارس ارجوك انتى فارس عشقى .

فارس .. وانا استحاله ابعد عنك تانى يا همسى من هنا ورايح .
عمر كانت عيونه عليهم وكان فرحان بيهم اوى اوى وحس ان لسه فيه حب حقيقى يستاهل التضحيه زى ما همس كانت هاتضحى بحبها علشان تحمى اللى بتحبه .. وانه من هنا ورايح هايقف فى وش اى حد حد ابوه نفسه اللى كل تفكيره فى الفلوس والشغل وبس ومش مهم عنده عياله وحياتهم .

الراجل بتاع فهد كان طلع على فوق وملقاش الاتنين الرجاله واقفين اودام الاوضه فاستغرب اوى وفضل يدور عليهم .

لان فارس كان شدهم فى اوضه وربطهم من أيديهم ورجليهم وربط بلاستر على بوقهم كمان وقفل الباب بالمتاح .
فهد كان قاعد على نار ومستنى تليفون من الرجاله بتاعته واخر ما زهق اتصل على الراجل تانى وقال .. ما تقولى يا بهيم انت عملت ايه .
الراجل .. يا فهد باشا من ساعه ما طلعت وانا بدور عليهم فى كل مكان ومش لقيهم خالص وكأنهم ملح وداب.
فهد باستغراب .. يعنى هايكونوا راحوا فين الكلاب دول بس .. خليك واقف اودام المستشفى وبلغنى بكل شىء واستنى اى اوامر منى .
الراجل .. اللى تؤمر بيه يا فهد باشا .

فارس كان لسه مع همس وعمر .. وبدا النهار يطلع .. فاستأذن انه هايروح يغير لبسه ويجيب الماذون واتنين شهود ويجى ويكتب كتابه على همس .

همس .. ماشى يا حبيبى وانا كمان زمان ماما هاتيجى واول لما تيجى هارجع على البيت وانقى فستان حلو لزوم كتب الكتاب واقول لسلمى اللى حسابها معايا بعدين على لسانها الطويل ده واجى ونتقابل هنا كلنا .
فارس .. ماشى يا حبيبتى.. وانت يا عمر مش عاوز اى حاجه اجبهالك وانا جاى .
عمر بهزار قال .... اه عاوز جنه.

همس عيونها جت فى عيون فارس وفضلوا يضحكوا .. وفارس قال .. وانا هاروح بنفسى اجبلك جنه يا عم واخت جنه كمان ايه رايك .

وفضلوا هما التلاته يضحكوا وفارس وقف وسلم عليهم ووعدهم انه مش هايتاخر عليهم ومسافه السكه وهايجى على طول .
عدى الوقت ومامت همس كانت راحت المستشفى وعمر وهمس عرفوها كل شئ وفرحت اوى اوى لهمس بنتها .
وهمس كانت بلغت سلمى بكل اللى حصل واتصلت على رغد وقالت لها اعملى حسابك ان عادل وسلمى هايعدوا عليها هى وجنه علشان يجبوهم على المستشفى علشان يحضروا كتب كتاب همس وفارس .

الكل كان فرحان اوى لما عرف الخبر ده وبدؤا يستعدوا ويلبسوا ويروحوا على المستشفى.

عادل وسلمى كانوا خلصوا ونزلوا ركبوا عربيه عادل وراحوا على بيت رغد علشان يخدوها هى وجنه .
عادل فضل يبص على رغد وجمالها اللى بيزيد فى عينه كل مرة يشوفها فيها وقرر انه فى اقرب وقت هايعترف لها بحبه ده ويروح يتقدم لها .
فارس كان خلص لبس واتصل على همس علشان ياخدها فى سكته على المستشفى .
فارس بغشق وشوووق .. همسى .

همس بحب .. فارس عشقى .

فارس بهيام ... نور عينى يا همسى .
همس .. روح قلبى يا فارس .
فارس .. خلاص يا حبيبتى كلها ساعه بالكتير وهاتكونى ملكى انا وبس ملك فارس الحسن .. او اقولك .. مدام فارس الحسن افضل .
همس ... يااااااه يا فارس .. نفسى اوى فى اللحظه دى اللى اكون فيها ملكك انت وبس .
واعيش انا وانت بعيد عن الناس دى كلها فى جزيره فى قلب البحر .. ونعيش اجمل ايام حياتنا .

فارس .. وانا اخدك فى حضنى واضمك لصدرى ونغمض عيونا ونعيش اجمل لحظات حياتنا يا همسى انا وانتى والبحر وبس .

همس .. وانا مش هلاقى مكان افضل من حضنك احس بيه بالامان يا فارس وفجاه
عااااااااااااااااا الحقنى يا فارس عاااااااا وانقطع الصوت عن فارس .
يا ترى حصل ايه لهمس ؟؟؟؟؟؟
تواقعتكم ايه .
وعاوزة تعليقات وريفوهات كتير تحسسنى بان الروايه عجباكم وناجحه وبتحبوها وبتحبوه فارس الحسن وهمس .

iklan banner

Abdulrhman Sayed
كاتب المقالة
كاتب ومحرر اخبار اعمل في موقع قصص وروايات .

جديد قسم :